ەكونوميكا • 14 تامىز، 2020

قازاقستاندىق ينۆەستور سقو-دا ەلەكتروتەحنيكالىق زاۋىت سالماق

23 رەت كورسەتىلدى

«Alageum Electric» سولتۇستىك قازاقستان وبلىسىندا ەلەكتروتەحنيكالىق جابدىقتار شىعاراتىن زاۋىتتى ىسكە قوسادى. كاسىپورىن ءوز جۇمىسىن كەلەسى جىلى باستاۋدى جوسپارلاپ وتىر. جوبا «KAZAKH INVEST» ۇك» اق قولداۋىمەن جۇزەگە اسىرىلۋدا، - دەپ حابارلايدى Egemen.kz.

بۇگىنگى كۇنى بۇرىنعى پەتروپاۆل شاعىن ليتراجدى قوزعالتقىشتار زاۋىتىن قايتا جاڭارتۋ جۇمىستارى جۇرگىزىلۋدە. مامانداردىڭ ايتۋىنشا، جىل سايىن اۋماعى 22 مىڭ شارشى مەتردى قۇرايتىن جاڭا كاسىپورىندا 13 مىڭ ەلەكتر تەحنيكالىق جابدىق دايىنداۋ جوسپارلانۋدا. جالپى قۇنى 7 ملرد تەڭگە بولاتىن جوبا 300-گە جۋىق ادامدى جۇمىسپەن قامتاماسىز ەتەدى.

«پەتروپاۆلداعى زاۋىت تمد-داعى ەڭ زاماناۋي جانە تەحنولوگيالىق زاۋىتتاردىڭ ءبىرى بولادى. جابدىق ەۋروپادان اكەلىنەتىن بولادى. بيىلعى جىلى نەگىزگى مىندەت – قۇرىلىس-مونتاج جۇمىستارىن اياقتاۋ، قىسقى كەزەڭدە ىشكى ارلەۋدى باستاۋ، كەلەسى جىلدىڭ باسىندا تەحنولوگيالىق جابدىقتىڭ شەف-مونتاج جۇمىستارىن باستاۋ جانە 2021 جىلدىڭ 3 توقسانىندا زاۋىتتى ىسكە قوسۋدى جوسپارلاپ وتىرمىز.ء بىز ينۆەستورلار رەتىندە سقو اكىمدىگى مەن KAZAKH INVEST تاراپىنان جاقسى قولداۋ الامىز»، - دەدى «Alageum Electric» اق بيزنەستى دامىتۋ جونىندەگى ديرەكتورى سۇلتان ءىلياسوۆ.

ينۆەستوردىڭ ايتۋىنشا، جاڭا جۇمىس ورىندارىن قۇرۋمەن قاتار، زاۋىت قۇرىلىسى وڭىرلىك بيۋدجەت كىرىستەرىن ۇلعايتا وتىرىپ، اۋماقتىڭ ەكونوميكالىق جانە ونەركاسىپتىك الەۋەتىن دامىتۋدى قامتاماسىز ەتەدى.

«جوبا «Qyzyljar» اەا اۋماعىندا جۇزەگە اسىرىلادى. وعان قاتىسۋ بىرقاتار پرەفەرەنتسيالاردى، ونىڭ ىشىندە شيكىزات پەن جابدىقتى اكەلۋ كەزىندە سالىق تولەۋدەن، كەدەندىك باج سالىعىنان بوساتۋدى كوزدەيدى، سونداي-اق كوممۋنالدىق قىزمەتتەرگە ارنالعان ارنايى تاريفتەر وندىرىستىڭ تيىمدىلىگىن ارتتىرادى»، - دەپ اتاپ ءوتتى KAZAKH INVEST سقو بويىنشا وڭىرلىك ديرەكتورى دانيار شالاباەۆ.

مۇنداي ءوندىرىس سولتۇستىك قازاقستان وبلىسىندا العاشىندا اشىلماق. مامانداردىڭ ايتۋىنشا، ەلەكتروتەحنيكالىق ونىمدەر تمد نارىعىندا اسا ۇلكەن سۇرانىسقا يە. بۇل جوبا قازاقستان نارىعىنداعى يمپورتتىق تاۋار ۇلەسىن ازايتىپ قانا قويماي، ەلدىڭ ەكسپورتتىق الەۋەتىن ارتتىرۋعا مۇمكىندىك بەرەدى – ءونىمنىڭ 95%-ىن ەكسپورتتاۋ جوسپارلانۋدا.

«Alageum Electric» - قازاقستاننىڭ ءىرى ەلەكتروتەحنيكالىق كومپانياسى، ەلەكتر ەنەرگەتيكاسى، ەلەكتر ماشينا جاساۋ جانە قۇرىلىس سالاسىندا تابىستى جۇمىس ىستەيتىن 30-دان استام ءىرى كاسىپورىندار مەن زاۋىتتاردى قامتيدى. كاسىپورىنداردىڭ قاتارىندا – «كەنتاۋ ترانسفورماتور زاۋىتى» (كەنتاۋ قالاسى) جانە كەز-كەلگەن قيىندىقتاعى ەلەكتر مونتاجداۋ جۇمىستارىن ورىندايتىن، ايتارلىقتاي تاجىريبەسى بار جانە 10 مامانداندىرىلعان مونتاجداۋ باسقارماسى بار «ەلەكترومونتاج بۇيىمدارى زاۋىتى» اق مامانداندىرىلعان كومپانياسى – قازاقستانداعى كابەلدىك تراسسالار جۇيەسىن وندىرەتىن جالعىز كاسىپورىن.

سوڭعى جاڭالىقتار

ۇقساس جاڭالىقتار