سول بايقاۋدا ماعان ءبىرىنشى ورىن بۇيىردى. قازىلار القاسىنىڭ توراعاسى ءشامشى قالداياقوۆ ەكەن. ول كىسى سولايشا ەڭ جاس جانە تالانتتى ءانشى رەتىندە قولداپ, ونەرىمە ءسات-ساپار تىلەگەن ەدى. بۇل وقيعا مەنىڭ كوڭىلىمدە ۇمىتىلماستاي ساقتالدى. ەكىنشى ءبىر ەستەن شىقپايتىن وقيعا – 1991 جىلى تاعى ءبىر ۇلكەن رەسپۋبليكالىق بايقاۋدا ءشامشى قالداياقوۆتىڭ اندەرىن ورىندادىم. ءشامشى اعا مەنىڭ ورىنداۋىما سونشالىقتى ريزا بولدى. ساحناعا شىعىپ, قولىمدى كوتەرىپ, بالاداي قۋانعانى ءالى ەسىمدە. ءدال سول ساتتەگى كادر كومپوزيتورعا ارناپ تۇسىرىلگەن دەرەكتى فيلمدەردە بار.
ء شامشى اعانىڭ كوپتەگەن اندەرىن ءسۇيىپ ورىندايمىن. وسىدان ءبىراز ۋاقىت بۇرىن دەمەۋشىلەردىڭ كومەگىمەن تەك قانا سول كىسىنىڭ اندەرىنەن تۇراتىن ءان ديسكىسىن شىعارعانىمدى ايتقىم كەلەدى. اسىرەسە سول كوپ ءاننىڭ ىشىندە ء«انىم سەن ەدىڭ», «كەشىكپەي كەلەم دەپ ەڭ» دەيتىن اندەرىن ءجيى ايتامىن. ءشامشى قالداياقوۆتىڭ ەسىمى ونىڭ مۋزىكاسىن سۇيەتىن, قادىرلەيتىن جانداردىڭ ەسىنەن شىقپاق ەمەس. ول ءوزىنىڭ تاماشا, قايتالانباس اندەرىمەن ءبىزدىڭ جۇرەگىمىزدە, ياعني قازاق حالقىنىڭ جۇرەگىندە ماڭگى جاسايدى دەپ ويلايمىن. ويتكەنى ول حالىق كومپوزيتورى, ەسىمى حالىق ۇعىمىمەن تۇتاسىپ كەتكەن تۇلعا.
روزا رىمباەۆا,
قازاقستاننىڭ حالىق ءارتىسى,
مەملەكەتتىك سىيلىقتىڭ لاۋرەاتى
