سپورت • 14 تامىز، 2020

«بۇقالار» «اتلەتيكونى» ابىگەرگە ءتۇسىرۋى مۇمكىن

74 رەت كورسەتىلدى

نۇر-سۇلتان ۋاقىتىمەن ساعات 00:50-دە چەمپيوندار ليگاسىنىڭ شيرەك فينالدىق ويىنى وتەدى. «رب لەيپتسيگ» (گەرمانيا) «اتلەتيكوعا» (يسپانيا) قارسى تۇرادى. جەڭىمپاز تەك ءبىر عانا كەزدەسۋدە انىقتالادى. اتالعان ماتچتى «Qazsport» تەلەارناسى كورسەتەدى.

گەرمانيا بۋندەسليگاسىن ءۇشىنشى ورىنمەن اياقتاعان «لەيپتسيگ» چەمپيوندار ليگاسى توپتىق كەزەڭىنىڭ جەڭىمپازى اتاندى. سونداي-اق 1/8 فينالدا بىلتىرعى چەمپيوندار ليگاسىنىڭ ءفيناليسى «توتتەنحەمنەن» ەكى ويىن قورىتىندىسى بويىنشا 4:0 ەسەبىمەن باسىم ءتۇستى. بىراق بۇل ويىندار اقپان-ناۋرىز ايلارىندا بولعان ەدى. ۇزاق ۇزىلىستەن كەيىنگى قازىرگى جاعداي باسقاشا. سوڭعى بەس ويىندا تەك ەكى رەت قانا جەڭىسكە جەتكەن «بۇقالارعا» لا ليگادا ءوز قاقپالارىنا ەڭ از گول جىبەرەتىن كوماندالاردىڭ ءبىرى «اتلەتيكوعا» قارسى تۇرۋ قيىنعا سوعادى. ايتكەنمەن، يۋليان ناگەلسماننىڭ شاكىرتتەرى ءبىرىنشى بولىپ گول سوقسا، يسپان كومانداسىن ابىگەرگە تۇسىرەتىنى ءسوزسىز. ويتكەنى «اتلەتيكونىڭ» قارسىلاس كومانداعا كوپ گول سوعا بەرمەيتىنى دە بار.

اتاقتى ديەگو سيمەونە جاتتىقتىراتىن «اتلەتيكو» يسپانيا لا ليگاسىن ءۇشىنشى ورىنمەن اياقتادى. چەمپيوندار ليگاسىنىڭ توپتىق كەزەڭىن جەڭە الماي، الدىنا «يۋۆەنتۋستى» جىبەرىپ الدى. سوعان قاراماستان 1/8 فينالدا بىلتىرعى چەمپيوندار ليگاسىنىڭ جەڭىمپازى «ليۆەرپۋلدەن» باسىم ءتۇسىپ، سەنساتسيا جاساعانىن ءالى ۇمىتا قويعان جوقپىز. سوندىقتان بۇل كوماندادان بارلىعىن كۇتۋگە بولادى.

بۇل ەكى كوماندانىڭ ناتيجەسىن بولجاۋ قيىن. سەبەبى ەكى ۇجىم دا ىشكى بىرىنشىلىكتەرىندە ءوز قاقپالارىنا ەڭ از گول جىبەرەتىندەر قاتارىندا. اسىرەسە، مادريدتىكتەر 38 ويىندا نەبارى 51 دوپ سوعىپ، 27 دوپ جىبەرگەن. 

 

دەرەكتەر:

- ليسسابونداعى «جوزە الۆالادە» ستاديونىنداعى ماتچ «لەيپتسيگتىڭ» يسپان كلۋبتارىنا قارسى العاشقى رەسمي ماتچى;

- توپتىق كەزەڭىنىڭ ءبىرىنشى راۋندىندا پورتۋگاليادا «لەيپتسيگ» «بەنفيكانى» جەڭگەن ەدى (2:1);

- «لەيپتسيگ» پورتۋگاليادا چەمپيوندار ليگاسىندا 2017/18 جىلعى ماۋسىمىندا «پورتۋدان» 1:3 ەسەبىمەن جەڭىلدى.

- چەمپيوندار ليگاسىنىڭ 14 ماتچىندا «لەيپتسيگ» جەتى رەت جەڭىسكە جەتىپ، ءتورت رەت جەڭىلىسكە ۇشىرادى جانە ءۇش رەت تەڭ ءتۇستى;

- «لەيپتسيگتىڭ» چەمپيوندار ليگاسىنىڭ 2019/20 جىلىنداعى ستاتيستيكاسى: 3 جەڭىس، 1 تەڭ ويىن; – «لەيپتسيگتىڭ» ەۋروكۋبوكتاعى پلەي-وففتاعى ستاتيستيكاسى: 6 جەڭىس، 1 جەڭىلىس;

- «اتلەتيكو سىرت الاڭدا ەۋروكۋبوكتىڭ سوڭعى 17 ويىنىندا بەس رەت جەڭىلىسكە ۇشىرادى جانە جەتەۋىندە جەڭىسكە جەتتى;

- گەرمانيا كلۋبتارىمەن بولعان سوڭعى 44 ويىندا «اتلەتيكو» 21 رەت جەڭىس تويىن تويلادى. 7 رەت تەڭ تۇسسە، 16 رەت جەڭىلىس تاپقان;

- «اتلەتيكو» گەرمانياداعى سوڭعى التى ويىندا بەس رەت جەڭىلىس تاپتى. سوڭعىسى «بايەرگە» قارسى ماتچتا تىركەلدى; 

- «اتلەتيكونىڭ» پورتۋگاليا الاڭىنداعى ستاتيستيكاسى: 3 جەڭىس، 2 تەڭ جانە 5 جەڭىلىس.

سوڭعى جاڭالىقتار

ۇلت ۇستازى ۇلىقتالدى

احمەت بايتۇرسىن ۇلى • كەشە

الماتىنىڭ اۋاسى

ەكولوگيا • كەشە

ۇقساس جاڭالىقتار