نۇر-سۇلتاندا ساۋدا ورتالىقتارىنىڭ, قوناقۇيلەردىڭ, كافەلەردىڭ, مەيرامحانالار مەن دۇكەندەردىڭ دايىندىعى تەكسەرىلدى. اكىمدىك وكىلدەرى سانيتارلىق دارىگەرلەرمەن بىرىگىپ, "حان شاتىر" وسو, "تەحنودوم", "مير كەراميكي" دۇكەندەرىنە, "فەرۋم" كافەسىنە جانە "ايشا ءبيبى" اپارت-قوناقۇيىنە تەكسەرىس جۇرگىزدى. توپ سانيتايزەرلەر, اراقاشىقتىق بەلگىلەرى, ماسكالار, قولعاپتار, تەپلوۆيزور مەن قوناقتاردىڭ تەمپەراتۋرا جۋرنالىنىڭ بولۋىن تەكسەردى.
"ارالاۋ بارىسىندا بيزنەستىڭ كارانتيننەن كەيىن اشىلۋعا دايىندىعىن تەكسەردىك. كارانتين شارالارى حالىقتىڭ قاۋىپسىزدىگىن قامتاماسىز ەتۋگە باعىتتالعان. قازىرگى ۋاقىتتا ستاتيستيكا تۇزەلىپ كەلەدى. سوندىقتان قر پرەزيدەنتى جانىنداعى كوميسسيادا وسى سۇراق قارالۋ ۇستىندە. كوميسسيانىڭ ءتيىستى شەشىمىنەن كەيىن قالادا بيزنەس نىساندارى اشىلاتىن بولادى", دەدى نۇر-سۇلتان قالالىق ينۆەستيتسيالار جانە كاسىپكەرلىكتى دامىتۋ باسقارماسىنىڭ باسشىسى ەرلان بەكمۋرزاەۆ.
ەستەرىڭىزگە سالا كەتەيىك, قازاقستاندا كوروناۆيرۋس ينفەكتسياسىمەن اۋىرۋ دەڭگەيى ايتارلىقتاي تومەندەدى. وسىعان بايلانىستى كارانتين شارالارىن كەزەڭ-كەزەڭىمەن الۋ جوسپارى مەملەكەتتىك كوميسسيادا قارالۋدا.
بۇعان دەيىن نۇر-سۇلتان قالاسى اكىمىنىڭ ورىنباسارى باقتيار ماكەن قالا كارانتيننەن كەيىنگى كەزەڭگە دايىندالىپ جاتقانىن جانە جۇمىس ورىندارىندا دەزينفەكتسيا جۇرگىزۋگە ەرەكشە نازار اۋدارۋ قاجەتتىگىن اتاپ وتكەن بولاتىن.
قالا اكىمى التاي كولگىنوۆ نۇر-سۇلتان تۇرعىندارىن كارانتين توقتاتىلعاننان كەيىن دە ساق بولۋعا شاقىردى.
سونىمەن قاتار, جرۆي-ءدىڭ ماۋسىمدىق كەزەڭ ەسكەرىلىپ, دايىندىق جۇمىستارى جۇرگىزىلۋدە. مەديتسينالىق مەكەمەلەرگە قوسىمشا مەديتسينالىق جابدىقتار كەلىپ ءتۇستى: 600-دەن استام فلۋومەتر, 500-گە جۋىق وتتەگى كونتسەنتراتورى, 500 ارنايى اربا, وكپەنى جاساندى جەلدەتۋ اپپاراتى جانە كت. جەدەل مەديتسينالىق كومەك ۆاگوندارى جەتكىزىلەدى دەپ كۇتىلۋدە. ەكى اپتا ىشىندە قالاعا 110 توننادان استام ءدارى جەتكىزىلدى. بۇل جۇمىستار جۇيەلى تۇردە جۇرگىزىلەدى.
