«بيىل جاڭا وقۋ جىلىندا 196 مەكتەپتە 131 900 وقۋشى ءبىلىم الادى. الايدا, 16 693 وقۋشىعا كومپيۋتەر قاجەتتىگى انىقتالدى. وسىعان وراي وقۋشىلارعا مەكتەپتەردەگى 15 246 كومپيۋتەر قايتارىمدى كەلىسىممەن تاراتىلىپ بەرىلدى. ءبىرىنشى كەزەكتە كوپ بالالى وتباسىلار مەن از قامتىلعان جانۇيالارعا قامتىلدى. ال, ينتەرنەتكە قوسىلۋدى قاجەت ەتەتىن 3000 وقۋشى ءۇشىن ءموبيلدى بايلانىس وپەراتورلارمەن كەلىسىمسوز جۇرگىزىلىپ, جالپىعا مىندەتتى وقۋ قورىنان قايتارىمسىز نەگىزدە 3000 روۋتەر ساتىپ الىنۋدا. سونداي-اق, 355 مۇعالىمگە كومپيۋتەر تەحنيكاسى قاجەت. ولارعا مەكتەپ كومپيۋتەرلەرى بەرىلەدى. مۇعالىمدەردىڭ مەكتەپكە كەلىپ, جۇمىس ىستەۋىنە مۇمكىندىك جاسالادى», دەدى وبلىس اكىمى ماحامبەت دوسمۇحامبەتوۆ.
اكىمنىڭ ءمالىم ەتۋىنشە, 1611 نوۋتبۋك ساتىپ الۋعا جەرگىلىكتى بيۋدجەتتەن 282 ملن تەڭگە ءبولىنىپتى. سونىمەن بىرگە, رەسپۋبليكالىق بيۋدجەتتەن قارالعان قارجىنىڭ 250 ملن تەڭگەسىنە 1389 نوۋتبۋك ساتىپ الۋ جوسپارلانىپتى. مۇنىڭ ءبارى تامىزدىڭ سوڭىنا دەيىن ساتىپ الىنعالى وتىر.
