ءبىلىم • 12 تامىز، 2020

الماتىدا كەلەر جىلى وقۋشى ورنىنىڭ تاپشىلىعى 83%-عا قىسقارادى

37 رەت كورسەتىلدى

الماتى قالاسىنىڭ اكىمى باقىتجان ساعىنتاەۆ "الماتى" تەلەارناسىنىڭ Aكimat Live باعدارلاماسىندا وتكەن تىكەلەي ەفير بارىسىندا مەكتەپتەر قۇرىلىستارىنىڭ قارقىنى جانە جاڭا وقۋ جىلىنا دايىندىق بارىسى تۋرالى اڭگىمەلەدى، دەپ جازادى Egemen.kz

حالىقتىڭ قارقىندى كوشىپ-قونۋى مەن بالالاردىڭ تۋ دەڭگەيىنىڭ ۇلعايۋىنا وراي الماتىدا وقۋشىلار سانى جىل سايىن ورتا ەسەپپەن 12 مىڭعا ارتىپ وتىر. وتكەن وقۋ جىلىندا وقۋشىلاردىڭ جالپى سانى 17 مىڭنان استام بالاعا ءوستى. بۇگىنگى تاڭدا وقۋشى ورنىنىڭ تاپشىلىعى 30 مىڭ ورىندى قۇرايدى.

سوندىقتان وتكەن جىلى مەكتەپ قۇرىلىستارىن جەدەلدەتۋ قارقىندى جۇرگىزىلدى. بيىلعى 1 قىركۇيەكتە اۋەزوۆ جانە تۇركسىب اۋداندارىندا 1800 ورىندى ەكى جاڭا مەكتەپ اشىلادى. سونىمەن قاتار، قالا مەكتەپتەرىنىڭ جانىنان 3642 ورىندى سەگىز قوسالقى نىساندار سالىنۋدا.

بۇلاردان وزگە، "جۇمىسپەن قامتۋدىڭ جول كارتاسى-2020" باعدارلاماسى بويىنشا 13 200 ورىندى توعىز مەكتەپ، مەكتەپتەر جانىنان 6550 ورىندى 13 قوسالقى نىسان سالۋ جوسپارلانعان. ءمجا اياسىندا 5700 ورىندى بەس مەكتەپ سالۋ ۇسىنىلدى.

"وسىلايشا، 2021 جىلدىڭ سوڭىنا دەيىن وقۋشى ورنىنىڭ تاپشىلىعىن 83%-عا قىسقاراتىن بولادى"، دەپ حابارلادى ب.ساعىنتاەۆ.

الماتى اكىمى جاڭا وقۋ جىلىنا دايىندىق تۋرالى ايتا كەلە، كوروناۆيرۋس ينفەكتسياسىنىڭ ىندەتىنە بايلانىستى بالالار مەن پەداگوگتاردىڭ دەنساۋلىعىن ساقتاۋ ماقساتىندا ءبىلىم جانە عىلىم مينيسترلىگىنىڭ ەپيدەميالىق احۋال جاقسارعانعا دەيىن قاشىقتان وقىتۋ تۋرالى شەشىم قابىلداعانىن ەسكە سالدى. بۇرىنعى وقۋ فورماتىنا كەزەڭ بويىنشا كوشۋ جوسپارلانعان. شتاتتى رەجيمگە ءبىرىنشى كەزەڭدە 1-5 سىنىپ وقۋشىلارى، ەكىنشى كەزەڭدە 6-11 سىنىپ وقۋشىلارى كوشەدى ءارى سانيتارلىق قاۋىپسىزدىكتىڭ پارمەندى شارالارى قامتاماسىز ەتىلەتىن بولادى.

ب. ساعىنتاەۆ ءبىرىنشى كەزەكتە از قامتىلعان وتباسىلار بالالارىن كومپيۋتەرلىك تەحنيكامەن قامتاماسىز ەتۋگە ەرەكشە كوڭىل بولىنەتىنىن ايتتى. جۇرگىزىلگەن مونيتورينگ ناتيجەسى بويىنشا 70 مىڭنان استام ادامعا، ونىڭ ىشىندە وقۋشىلار مەن مۇعالىمدەرگە كومپيۋتەرلەر مەن نوۋتبۋكتار بەرىلەتىن بولادى.

"بۇدان وزگە، ينتەرنەتكە قولجەتكىزۋ جانە ءموبيلدى بايلانىس ناشار ايماقتارعا مونيتورينگ جۇرگىزىلدى. ۇيالى بايلانىس وپەراتورلارى ورناتاتىن قوسىمشا تاراتۋشى انتەننالاردىڭ ورنى انىقتالدى"، دەپ اتاپ ءوتتى الماتى اكىمى.

سوڭعى جاڭالىقتار

الىستان جەتكەن العىس

ايماقتار • بۇگىن، 14:10

ۇقساس جاڭالىقتار