قوعام • 10 تامىز، 2020

سەناتور ءدارى-دارمەككە قاتىستى قاراعاندى وبلىسىنداعى احۋالدى باقىلاۋعا الدى

15 رەت كورسەتىلدى

سەنات دەپۋتاتى ءلاززات سۇلەيمەن ءدارى-دارمەككە قاتىستى قاراعاندى وبلىسىنداعى احۋالدى باقىلاۋعا الدى. وڭىرگە جاساعان ساپارىندا ول جەرگىلىكتى اۋرۋحانالارعا، پروۆيزورلىق ورتالىقتارعا، ءدارىحانا جەلىلەرىنىڭ قويمالارىنا بارىپ، مەديتسينالىق قىزمەتكەرلەرمەن جانە ەمدەلۋشىلەرمەن كەزدەستى، - دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.

"پاندەميا ءورشىپ تۇرعان كەزدە سەناتتىڭ دەپۋتاتتارى قول قۋسىرىپ وتىرمادى. ءبىز دە ەل ازاماتتارىمەن بىرگە قايعىرىپ، قابىرعامىز قايىستى. ناۋقاستاردى ءدارى-دارمەكپەن قامتاماسىز ەتۋ جۇمىستارىنا قاتىستىق، مۇقتاج ازاماتتارعا ءتۇرلى كومەك كورسەتتىك. الداعى ۋاقىتتا دا جەرگىلىكتى ازاماتتاردىڭ كوتەرگەن ماسەلەلەرى دەپۋتاتتاردىڭ نازارىنان تىس قالمايدى"، – دەدى ءلاززات سۇلەيمەن.

سەناتور دارىحانالارداعى جاعدايعا دا كوڭىل ءبولىپ، ءىرى فارمجەلىلەردىڭ ءبىرىنىڭ قويماسىنا ارنايى باردى. جەرگىلىكتى مامانداردىڭ ايتۋىنشا، قازىر مۇندا الەۋمەتتىك ماڭىزى بار پرەپاراتتاردىڭ، ونىڭ ىشىندە انتيبيوتيكتەردىڭ قاجەتتى قورى بار. سونداي-اق سەنات دەپۋتاتى جىلجىمالى الەۋمەتتىك ءدارىحانانىڭ جۇمىسىمەن تانىستى.

جەرگىلىكتى تۇرعاندار سەناتوردىڭ نازارىن مەديتسينا قىزمەتكەرلەرىنە لايىقتى جاعداي جاساۋ، ولاردى باسپانامەن قامتۋ ماسەلەسىنە اۋداردى. ءلاززات سۇلەيمەن بۇل باعىتتا مەملەكەت تاراپىنان ءتيىستى جۇمىستار قولعا الىنعانىن تىلگە تيەك ەتىپ، ەلىمىزدىڭ مەديتسينا سالاسىن دامىتۋعا، سالا ماماندارىنىڭ تۇرمىس ساپاسىن ارتتىرۋعا باسا ءمان بەرىلىپ وتىرعانىن جەتكىزدى.

سونىڭ اياسىندا قازىرگى تاڭدا وڭىردە مودۋلدىك جۇقپالى اۋرۋلار اۋرۋحاناسىنىڭ قۇرىلىسىن باستالعانىن ايتا كەتكەن ءجون. نىسان كوروناۆيرۋستان ەمدەۋگە قاجەتتى جابدىقتارمەن قامتاماسىز ەتىلمەك.

ىندەت جۇقتىرعان ازاماتتارمەن كەزدەسۋىندە ەمدەلۋشىلەر ەمدەۋ شارالارى جانە مەديتسينالىق قىزمەت جۇيەسىندە تۋىنداعان ماسەلەلەر جونىندە ايتتى.

ودان بولەك، ءلاززات سۇلەيمەن ساتباەۆ جانە جەزقازعان قالالارىنا بارىپ، مەملەكەتتىك باعدارلامالاردىڭ جۇزەگە اسىرىلۋ بارىسىمەن تانىستى. سەناتور ساتباەۆ قالاسىنداعى №1 قالالىق ورتالىق اۋرۋحاناعا ارنايى ات باسىن بۇردى. اتالعان نىسانعا كۇردەلى جوندەۋ جۇرگىزۋ ءۇشىن مەملەكەتتىك باعدارلاما اياسىندا 223 ملن. تەڭگە بولىنگەن. ودان بولەك، اۋرۋحانا اۋماعىن اباتتاندىرۋعا 79 ملن. تەڭگە قاراستىرىلعان.

بۇل مەديتسينالىق مەكەمە 140-تان استام توسەك-ورىنعا ەسەپتەلگەن. ونىڭ 120-عا جۋىعى تاۋلىك بويى، 25-ءى كۇندىزگى ستاتسيونار ءۇشىن. كوروناۆيرۋس پاندەمياسى باستالعالى نىساننىڭ جۇقپالى اۋرۋلار بولىمىندە 160 ادام ەمدەلىپ شىقتى. اتالعان ءبولىم 30 ورىندىق. ونىڭ ىشىندە 6-ۋى رەانيماتسيالىق، 10-ى جۇكتى ايەلدەرگە ارنالعان. نىسان وكپەنى جاساندى جەلدەتۋ اپپاراتىمەن جابدىقتالعان.

بۇگىندە قالادا جاستاردى جۇمىسپەن قامتۋ، قولجەتىمدى باسپانا سالۋ ماسەلەلەرى بويىنشا 30-عا جۋىق الەۋمەتتىك جوبا ىسكە اسىرىلىپ جاتىر.

بۇدان باسقا، سەناتورمەن كەزدەسكەن ايماق تۇرعىندارى پەدوفيلدەرگە جانە سىبايلاس جەمقورلىق قۇقىق بۇزۋشىلىقتارعا قاتىستى زاڭنامانى كۇشەيتۋ تۋرالى ماسەلەنى قاراۋدى ۇسىندى. سونداي-اق، ەسكى، اپاتتى جاعدايداعى ۇيلەردى بۇزۋ ماسەلەسىن كوتەرىپ، كەزەكتە تۇرعان وسى ۇيلەردىڭ تۇرعىندارىن باسپانامەن قامتۋ، جۇمىسسىزدىقتى جويۋ سياقتى باسقا دا الەۋمەتتىك پروبلەمالارعا نازار اۋداردى. سونىمەن قاتار، ولار كوپ بالالى انالارعا مەملەكەت تاراپىنان ۇلكەن قولداۋ كورسەتىلىپ جاتقانىن دا اتاپ ءوتتى.

ءلاززات سۇلەيمەن جەرگىلىكتى بيلىك وكىلدەرىنە اتالعان ماسەلەلەردى تەزىرەك شەشۋ ءۇشىن بەلسەندى تۇردە جۇمىس ىستەۋ كەرەكتىگىن ايتتى.

سوڭعى جاڭالىقتار

تاعى ءبىر اكىم قىزمەتىنەن كەتتى

ايماقتار • بۇگىن، 18:06

مەننيدىڭ تاعى ءبىر مارتتىگى

كاسىپقوي بوكس • بۇگىن، 16:32

ۇقساس جاڭالىقتار