اباي • 10 تامىز، 2020

ن.نىعماتۋلين: اباي مۇراسى قازاق حالقىنىڭ سان عاسىرلىق دانالىعىنىڭ كورىنىسى

27 رەت كورسەتىلدى

ءماجىلىس توراعاسى نۇرلان نىعماتۋلين بارشا قازاقستاندىقتاردى تۇڭعىش رەت اتالاتىن اباي كۇنى مەرەكەسىمەن قۇتتىقتادى. بۇل تۋرالى ول ءوزىنىڭ تۆيتتەر پاراقشاسىندا جاريالادى، - دەپ حابارلايدى Egemen.kz.

"بارشا قازاقستاندىقتاردى بيىل تۇڭعىش رەت اتالاتىن اباي كۇنىمەن قۇتتىقتايمىن! اباي مۇراسى-ەلىمىزدى، حالقىمىزدى ارقاشاندا جاڭاشىلدىققا،ادىلدىككە، عىلىم-بىلىمگە، وركەنيەتكە جەتەلەيتىن باعا جەتپەس قۇندىلىق. ەلىم، جەرىم دەيتىن ءاربىر ازامات ءۇشىن ۇلى اقىننىڭ وسيەتىن ءبىلۋ قاسيەتتى پارىز"، -دەپ جازدى ءوز پاراقشاسىندا.

ودان ءارى ءماجىلىس توراعاسى ءدال بۇگىن ۇلى اقىن، دانىشپان ويشىل، ۇلتىن ۇلىلىققا ۇندەگەن دارا تۇلعا اباي قۇنانباي ۇلىنىڭ تۋعانىنا 175 جىل تولعانىن العا تارتا كەلىپ، اباي كۇنى مەرەكەسىنىڭ ماڭىزدىلىعىنا توقتالدى. وسى ورايدا، نۇرلان نىعماتۋلين ەل باسشىلىعى ارقاشاندا اباي مۇراسى ارقىلى ەلىمىزدىڭ رۋحاني باعىتىن دامىتۋعا زور كوڭىل ءبولىپ كەلە جاتقانىن اتاپ ءوتتى. وعان ەلباسى نۇرسۇلتان ءابىش ۇلى نازارباەۆتىڭ ابايدى قازاقتىڭ بويتۇمارى رەتىندە، ال، مەملەكەت باسشىسى قاسىم-جومارت كەمەل ۇلى توقاەۆتىڭ ابايدى رۋحاني رەفورماتور رەتىندە دارىپتەپ، قازاقستان قوعامىن اباي ۇستانىمىنا ساي دامىتۋ قاجەتتىگى تۋرالى باستاماسى دالەل دەۋگە بولادى.

ءماجىلىس سپيكەرىنىڭ پىكىرىنشە، قازاق حالقىنىڭ سان عاسىرلىق دانالىعىنىڭ كورىنىسى سانالاتىن ۇلى اقىننىڭ باي مۇراسى ەلىمىزدىڭ رۋحاني دامۋىنىڭ نەگىزى. ءماجىلىس توراعاسى اتاپ وتكەندەي، ادامزاتتىڭ ابايى اتانعان ۇلى كەمەڭگەردىڭ اسىل سوزدەرى بۇكىل الەمگە ورتاق قۇندى قازىنا. ال، تۋعان حالقى ءۇشىن اباي وسيەتى ادامگەرشىلىك اسىل قاسيەتتەردى بيىك ۇستاي وتىرىپ، العا جەتەلەۋشى رۋحاني زور كۇش. سونىمەن بىرگە، بارشا قازاقستاندىقتاردى ورتاق ماقساتقا بىرىكتىرە وتىرىپ، وركەنيەت بيىگىنە جەتەلەيتىن جارىق جۇلدىز ەكەنى ءسوزسىز.

سوڭعى جاڭالىقتار

ۆيرۋس مۋتاتسياعا ۇشىرادى

كوروناۆيرۋس • كەشە

ۇقساس جاڭالىقتار