احمەتجان ەسىموۆ قاسىم-جومارت توقاەۆقا قوردىڭ بيىلعى ناۋرىز ايىندا دارىگەرلەرگە, پوليتسيا جانە الەۋمەتتىك سالا قىزمەتكەرلەرى ءۇشىن 6 ميلليون بەتپەردە الۋعا قارجى بولگەنىن ايتتى.
"سامۇرىق-قازىنا" قورىنىڭ باسقارما توراعاسى پرەزيدەنتكە كومپانيانىڭ دەنساۋلىق ساقتاۋ مينيسترلىگىمەن بىرلەسە اتقارعان جۇمىستارى تۋرالى مالىمەت بەردى. بىرلەسكەن ءىس-ارەكەتتىڭ ناتيجەسىندە قور قارجىسىنا 100 جەدەل-جاردەم كولىگى, 1000 وتتەگى كونتسەنتراتورى, 50 وكپەنى جاساندى جەلدەتۋ اپپاراتى, 1000 يپۋلستىك وكسيمەتر جانە 3000 ۆيرۋسقا قارسى "اۆيفارير" ءدارىسى ساتىپ الىنعان.
احمەتجان ەسىموۆ مەملەكەت باسشىسىنا ەلباسى نۇرسۇلتان نازارباەۆتىڭ تاپسىرماسىنا سايكەس قوردىڭ نۇر-سۇلتان جانە الماتى قالالارىندا سالىناتىن جۇقپالى اۋرۋلاردىڭ الدىن الۋ جانە باقىلاۋ بويىنشا ەمحانالاردىڭ قۇرىلىسىنا قارجى بولەتىنىن جەتكىزدى.
قور توراعاسى پرەزيدەنتكە رەسەيمەن بىرلەسىپ قولعا الىنعان كوروناۆيرۋسقا قارسى ۆاكتسينا ءوندىرۋ جوسپارى جايىندا ايتتى.
كەزدەسۋدە "سامۇرىق-قازىنا" قورىنا قاراستى كومپانيالاردىڭ قازىرگى جاعدايى دا تالقىلاندى. احمەتجان ەسىموۆ بيىل ۇكىمەتكە 120 ميلليارد تەڭگە كولەمىندە ديۆيدەند تولەنەتىنىن, مۇنىڭ 2017 جىلمەن سالىستىرعاندا ون ەسە كوپ ەكەنىن ايتتى. بۇعان دەيىن «سامۇرىق-قازىنا» ۇلتتىق قورعا 50 ميلليارد تەڭگە قارجىنى مەرزىمىنەن بۇرىن اۋدارعان بولاتىن.
