ەكى كۇندە موتوكولىك جۇرگىزۋشىلەرى تاراپىنان جول قوزعالىسى ەرەجەسىن بۇزۋدىڭ 187 دەرەگى انىقتالدى. ونىڭ ىشىندە تۇنگى تىنىشتىقتى بۇزعاندار, كولىگىن زاڭسىز قايتا جابدىقتاعاندار, مىندەتتى تەحنيكالىق قاراپ-تەكسەرۋدەن وتكىزبەگەندەر, موتوشلەم پايدالانۋ جونىندەگى تالاپتاردى بۇزعاندار بار. تءيىستى قۇجاتسىز موتوكولىك باسقارعان 31, ماس كۇيىندە كولىك باسقارعان 5 دەرەك انىقتالىپ, 33 موتوكولىك ايىپ الاڭىنا قويىلدى.
سولاردىڭ ءبىرى 6 تامىز كۇنى قىزىلوردا قالاسىنىڭ ورتالىق كوشەسى بويىندا توقتاتىلعان. ونىڭ كولىگىن سپيرتتىك ىشىمدىك ءىشىپ جانە مەملەكەتتىك بەلگىسىز, ەش قۇجاتسىز باسقارىپ جۇرگەنى بەلگىلى بولدى.
قۇقىق بۇزۋشى ازاماتقا قاتىستى قر اقبتك-ءنىڭ 608 بابىنىڭ 6-بولىگىمەن, 612 بابىنىڭ 2-بولىگىمەن اكىمشىلىك حاتتاما راسىمدەلىپ, پروتسەسسۋالدىق شەشىم قابىلداۋ ءۇشىن اكىمشىلىك سوتقا جولداندى.
