وسىلايشا, قازىرگى ۋاقىتتا 103 زىعىر تۇقىمىن ءوندىرۋشى (ونىڭ 78-ءى قر اشم كەپىلدىگىمەن) جانە بيداي ۇنىن وندىرەتىن 94 كومپانيانىڭ (64-ءى قر اشم كەپىلدىگىمەن) ءوز ونىمدەرىن قىتايعا ەكسپورتتاۋعا قۇقىعى بار.
ەستەرىڭىزگە سالا كەتەيىك, وتكەن جىلى قىتايدا وتكەن ء"بىر بەلدەۋ, ءبىر جول" حالىقارالىق ىنتىماقتاستىق فورۋمى بارىسىندا بيداي ۇنىنىڭ ەكسپورتتىق پارتيالارىنا قويىلاتىن فيتوسانيتارلىق تالاپتار جونىندەگى حاتتاماعا, ال مەملەكەت باسشىسىنىڭ پەكينگە ساپارى اياسىندا قازاقستاننان قىتايعا ەكسپورتتالاتىن زىعىر تۇقىمىنا قويىلاتىن فيتوسانيتارلىق تالاپتار جونىندەگى حاتتاماعا قول قويىلعان بولاتىن. قۇجاتتارعا قول قويىلعاننان كەيىن قىتاي تاراپى ەكسپورت قۇقىعى بار كاسىپورىنداردىڭ تىزىلىمىنە بيداي ۇنى مەن زىعىر تۇقىمىن وندىرەتىن 55 كومپانيانى ەنگىزدى. حاتتامالار قازاقستاندىق اۋىل شارۋاشىلىعى تاۋارلارىن وندىرۋشىلەرگە ءونىمدى جەڭىلدەتىلگەن تارتىپپەن ەكسپورتتاۋ قۇقىعىن بەرەدى.
سوڭعى جىلدارى قازاقستان فەرمەرلەرى اراسىندا زىعىر ەگۋ كەڭىنەن تاراپ كەلەدى. بۇل داقىل وندىرىستە اسا قىمبات ەمەس ءارى كۇي تالعامايدى. سوندىقتان رەسپۋبليكادا ءوندىرىس كولەمى دە, زىعىر ەگۋمەن اينالىساتىن اۋىل شارۋاشىلىعى تاۋارىن وندىرۋشىلەردىڭ دە سانى ارتۋدا. الايدا, بۇل داقىلدى قارقىندى ەگۋ سالدارىنان وڭدەلگەن توپىراقتىڭ تەز سارقىلۋ قاۋپى بار.
بىرنەشە جىل ىشىندە قازاقستان زىعىر تۇقىمى مەن زىعىر مايىنىڭ ءىرى ەكسپورتتاۋشىسىنا اينالدى - جىل سايىن بارلىق داقىلدار ساتىپ الىنىپ, ەۋروپا مەن ازيانىڭ بىرقاتار ەلدەرىنە ەكسپورتتالادى. قازاقستاندىق زىعىردىڭ ءىرى يمپورتتاۋشىلارىنىڭ ءبىرى - قحر.
