قازاقستان • 07 تامىز، 2020

ەرتىس وزەنىنىڭ القابىنا ەرەكشە قورعالاتىن تابيعي اۋماق مارتەبەسى بەرىلۋى مۇمكىن

9 رەت كورسەتىلدى

ءتيىستى جوبانى قازىر ەكولوگيا، گەولوگيا جانە تابيعي رەسۋرستار مينيسترلىگى دايىنداۋدا، دەپ حابارلادى پاۆلودار قالاسىنىڭ جۇرتشىلىعىمەن كەزدەسۋدە  قر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ. «ەرتىس وزەنىنىڭ القابىنا مارتەبە بەرۋ ءۇشىن بۇرىن اياقتالماعان تەحنيكالىق-ەكونوممكالىق نەگىزدەمە پىسىقتالىپ جاتىر»، - دەدى ول. –بۇگىنگى تاڭدا قازاقستان اۋماعىنىڭ شامامەن 9% ەرەكشە قورعالاتىن تابيعي اۋماق مارتەبەسىنە يە. بۇۇ مەن باسقا دا حالىقارالىق ۇيىمداردىڭ ۇسىنىسى بويىنشا بۇل كورسەتكىشتى 10 جىل ىشىندە 12%-كە دەيىن ارتتىرۋ كەرەك. ال ەرتىس وزەنىنىڭ القابى وسىنداي اۋماق تىزىمىنە ەنۋى مۇمكىن».

ەكو-بەلسەندىلەرمەن دە ءوڭىردىڭ ەكولوگياىق وزەكتى ماسەلەلەرى تالقىلاندى. ءمينيستردىڭ ايتۋىنشا، قازىردە پاۆلودار وبلىسى بويىنشا جول كارتاسىنىڭ جوباسى جاسالىپ جاتىر. وندا وڭىردەگى ەكولوگيالىق جاعدايدى جاقسارتۋ ءۇشىن شارالار بەلگىلەنەدى. بۇل رەتتە مينيسترلىك قالا جۇرتشىلىعىمەن بىرگە جۇمىس ىستەۋگە نيەتتى.

كەزدەسۋدە سونىمەن قاتار، كاسىپورىنداردا ەڭ وزىق قولجەتىمدى تەحنولوگيالاردى (وقت) ەنگىزۋ، جاسىل جەلەك سانىن ارتىرۋ، حالىقتىڭ ەكولوگيالىق مادەنيەتىن جاقسارتۋ جانە ەكولوگيالىق زاڭنامانى بۇزعانى ءۇشىن ايىپپۇلدى قاتايتۋ ماسەلەسى قوزعالدى.

ماسەلەن، حالىقتىڭ پاۆلودار قالاسىندا ۋلى وندىرىستەردى سالۋعا تىيىم سالۋ تۋرالى وتىنىشىنە جاۋاپ رەتىندە مينيستر ناقتى ەلدىمەكەندەگى نەمەسە وڭىردەگى لاستانۋ دەڭگەيىنە قاتىستى حالىقارالىق تاجىريبەنى قازاقستاندا ەنگىزۋ جوسپارلانىپ وتىرعانىن جەتكىزدى. جاڭا ەكولوگيالىق كودەكسكە ءتيىستى نورمالار ەنگىزىلگەن.

«قالاي بولعاندا دا، كەز-كەلگەن قاۋىپتى ءوندىرىستى سالۋ كەزىندە قوعامدىق تىڭداۋلار وتكىزىلۋى مۇمكىن»، - دەپ اتاپ ءوتتى مينيستر. «سونداي-اق، جاڭا ەكوكودەكس جوباسىندا حالىقتىڭ جوبالاردىڭ قابىلدانۋىنا اسەر ەتۋىن كۇشەيتۋگە ارنالعان تارماقتار بار. جاسىل جەلەكتەر تۋرالى سۇراقتارىڭىزعا كەلسەك، ول جول كارتاسىنا ەنگىزىلەدى. قورشاعان ورتانى لاستايتىن كاسىپورىنداردىڭ تابيعاتتى قورعاۋ ءىس-شارالار جوسپارىنا اعاش ەگۋدى ەنگىزۋدى جوسپارلاپ وتىرمىز. ءبىز مۇنى ERG كومپانياسىمەن دە تالقىلايتىن بولامىز. سونىمەن قاتار، ءۇش جىل ىشىندە اعاش كەسكەنى ءۇشىن نورماتيۆتىك-قۇقىقتىق بازانى قاتايتۋ، وتەماقى رەتىندە اعاش وتىرعىزۋ مەن ولارعا كۇتىم جاساۋدى تالاپ ەتۋ جوسپارلانۋدا.

قوقىس لاقتىرۋعا، اعاشتاردى كەسۋگە، بەلگىلەنبەگەن ورىنعا كولىك قويۋعا جانە ت.ب. جول بەرەتىن تومەن ەكولوگيالىق مادەنيەت ماسەلەسىن ايتا كەلىپ، مينيستر مۇنداي زاڭبۇزۋشىلىقتار ءۇشىن جازا كۇشەيتىلەتىنىن اتاپ ءوتتى. كەلەسى اپتادا، ونىڭ ايتۋىنشا، مەكتەپتەردە ەكولوگيالىق مادەنيەت ءپانىن ەنگىزۋ ءۇشىن ءبىلىم مينيسترلىگىمەن بىرلەسىپ ونلاين دوڭگەلەك ۇستەل وتكىزۋ جوسپارلانۋدا.

ايتپاقشى، كەزدەسۋدە قر پرەزيدەنتىنىڭ ەكولوگيا ءپانىن ەلىمىزدىڭ ورتا جانە جوعارى وقۋ ورىندارىندا مىندەتتى ءپان رەتىندە ەنگىزۋ تۋرالى باستاماسىنا قولداۋ ءبىلدىرىلدى.

«جاڭا تەحنولوگيالارعا كەلەتىن بولساق، ءبىز جاڭا ەكولوگيالىق كودەكستىڭ جوباسىنا ەڭ وزىق قولجەتىمدى تەحنولوگيالار نورماسىن ەنگىزدىك. وعان 1300-گە جۋىق ءبىرىنشى ساناتتاعى كاسىپورىندار كوشۋى ءتيىس. ياعني شىعارىندىلار كولەمىن ەداۋىر تومەندەتەتىن تەحنولوگيالاردى ەنگىزۋ كەرەك. ەگەر قورشاعان ورتانى لاستايتىن كەم دەگەندە 50 كاسىپورىندى وسىعان كوشىرسەك، ماسەلەنىڭ 80% شەشىلەدى. ءبىز وسى رەتتە كاسىپورىنداردى تەكسەرۋدى باستادىق. ەۋروپادا وقت ەنگىزۋ ءۇشىن 15 جىل قاجەت بولعان. قازاقستاندا بارلىق جۇمىس ىستەيتىن كاسىپورىندار 2035 جىلعا قاراي وقت جۇيەسىنە كوشۋى ءتيىس. 2025 جىلدان باستاپ سالىنعان بارلىق كاسىپورىندا جۇمىس ىستەپ تۇرعان وقت بولۋى كەرەك. كاسىپورىندار بۇل رەتتە ۇنەمدەلگەن اقشانى وقت ەنگىزۋگە سالۋعا ىنتالانۋى ءۇشىن مەملەكەت ەميسسيا تولەتۋدەن باس تارتۋعا دايىن»، - دەدى م.مىرزاعاليەۆ.

ء«بىز بۇگىنگى كوتەرىلگەن بارلىق شارالاردى جاڭا ەكولوگيالىق كودەكس جوباسىندا قاراستىردىق. ونىڭ كوپشىلىك اراسىندا بەلسەندى تالقىلانۋىن تەك قانا قولدايمىز. الايدا وندا ەكولوگيا مەن ەكونوميكانىڭ اراسىنداعى بالانس ساقتالۋى قاجەت. قالانىڭ ەكو-بەلسەندىلەرىنە ءوڭىردىڭ ەكولوگيالىق پروبلەمالارىنا نازار اۋدارۋداعى ۇلكەن جۇمىسى ءۇشىن العىس ايتقىم كەلەدى»، - دەدى ماعزۇم مىرزاعاليەۆ.

سوڭعى جاڭالىقتار

شىعىسقا قار ءتۇستى

ايماقتار • كەشە

ۇقساس جاڭالىقتار