قازاقستان • 07 تامىز، 2020

15 اۋىلدىڭ تۇرعىندارى تازا اۋىز سۋعا قول جەتكىزدى

11 رەت كورسەتىلدى

جۇمىس ساپارى بارىسىندا قر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ماي اۋدانى، باسكول اۋىلىنداعى سۋ تازارتۋ ستانcاسىندا بولدى.

سۋ قۇبىرى جوباسى 2018 جىلى جۇزەگە اسىرىلىپ، 2019 جىلعى جەلتوقساندا اياقتالدى. جوبانى جۇزەگە اسىرۋ ءۇشىن 5 ميلليارد تەڭگەدەن بولىنگەن.

«نۇرا» توپتىق سۋ قۇبىرى» شجق رمك باس ديرەكتورىنىڭ ورىنباسارى ايگەرىم اقجانوۆا قۇرىلىستىڭ قۇنى 4،4 ملرد. ەكەنىن جەتكىزدى. قالعان قاراجات بيۋدجەتكە قايتارىلعان.

– بۇگىندە سۋمەن جابدىقتاۋ جۇيەسى تولىق قۋاتتا ىسكە قوسىلدى، - دەيدى ايگەرىم اقجانوۆا. - حالقى 200 ادامنان اساتىن 15 اۋىل قوسىلىپ وتىر. بۇل 10 مىڭنان استام ادام. سۋ تاۋلىك بويى تەست رەجىمىندە اقىسىز بەرىلەدى. سۋ تازارتۋ قوندىرعىسى نەمىس جابدىقتارىمەن جاراقتاندىرىلعان.

ايگەرىم اقجانوۆانىڭ ايتۋىنشا، سۋ قۇبىرىنىڭ وتكىزۋ قابىلەتى تاۋلىگىنە 4150 تەكشە مەتردى قۇرايدى، ونىڭ تەك 2500-ءى عانا تۇتىنىلادى.سۋدىڭ قورى 20 جىلعا جەتەتىندىكتەن، اقسۋ اۋىلدىق ايماعىن   سۋمەن جابدىقتاۋ جۇيەسىنە قوسۋعا بولادى.

- بۇل سۇراق كوتەرىلدى، - دەيدى ايگەرىم اقجانوۆا. - قازىر بيلىك جوبانىڭ تيىمدىلىگىن قاراستىرۋدا. ەگەر ماقۇلدانسا، ءبىز وسى قۇبىردى سالۋعا دايىنبىز.

ماي توپتىق سۋ قۇبىرىن قىزمەت كورسەتەتىن ۇيىمنىڭ بالانسىنا بەرۋ پروبلەمالىق ماسەلەلەردىڭ ءبىرى بولىپ تابىلادى. قازىرگى ۋاقىتتا قىزمەتتى «نۇرا» توپتىق سۋ قۇبىرى» شجق رمك كورسەتۋدە. بىراق بولاشاقتا سۋ قۇبىرىن سونىمەن قاتار، بەلوۆودسك توپتىق سۋ قۇبىرىنا قىزمەت كورسەتەتىن «كازۆودحوز» رمك-عا بەرۋ جوسپارلانۋدا.

قازىر ماي توپتىق سۋ قۇبىرىندا 11 ادام جۇمىس ىستەيدى. ايسايىنعى جالاقى شىعىنى شامامەن ميلليون تەڭگەنى قۇرايدى.

ماعزۇم مىرزاعاليەۆ سۋ قۇبىرىنىڭ جۇمىسىن جوعارى باعالادى. اۋىل تۇرعىندارىنىڭ تازا اۋىز سۋعا قول جەتكىزۋى ولاردىڭ ءومىر ءسۇرۋ ساپاسىن جاقسارتىپ، تۇرعىنداردىڭ اۋىلدان كوشپەۋىنە سەبەپشى بولادى دەگەن ۇمىتتە.

سوڭعى جاڭالىقتار

شىعىسقا قار ءتۇستى

ايماقتار • كەشە

ۇقساس جاڭالىقتار