ساياسات • 07 تامىز، 2020

سەناتور پارلامەنتتەگى قىزمەتىن قورىتىندىلاۋدا

17 رەت كورسەتىلدى

بيىل سەنات دەپۋتاتى رەتىندە قىزمەتىن اياقتايتىن سارسەنباي ەڭسەگەنوۆ اتىراۋ وبلىسىنىڭ تۇرعىندارىمەن كەزدەسىپ، مۇنايلى ولكەنىڭ جوعارى پالاتاداعى وكىلى رەتىندە اتقارعان جۇمىسىن قورىتىندىلاۋدا.

كەزدەسۋ بارىسىندا سەناتور ەلىمىزدىڭ الەۋمەتتىك-ەكونوميكالىق دامۋىنا جانە حالىقتىڭ ءال-اۋقاتىن ارتتىرۋعا ايتارلىقتاي ىقپال ەتكەن زاڭدارعا توقتالىپ ءوتتى.

ناقتى ايتقاندا، سارسەنباي ەڭسەگەنوۆ رەسەي جالعا العان تايسويعان پوليگونىنىڭ اۋماعىنان قىزىلقوعا اۋدانىنىڭ 750 گەكتار جەرى قايتارىلعانىن تىلگە تيەك ەتتى. كوپ جىلدار بويى رەسەي تاراپىمەن جۇرگىزىلگەن كەلىسسوزدەردەن كەيىن جالعا بەرۋ جونىندەگى كەلىسىمشارتقا وزگەرىستەر ەنگىزىلىپ، ءۇلكەن اۋماقتى الىپ جاتقان جايىلىم جەرى زاڭدى تۇردە ءوڭىر تۇرعىندارىنىڭ يگىلىگىنە قايتارىلعان ەدى. سونىڭ ارقاسىندا جەرگىلىكتى شارۋالار مال ءوسىرۋدى قولعا السا، مۇناي-گاز كومپانيالارى ەكى بىردەي جاڭا كەن ورنىن يگەرە باستادى.

سونىمەن قاتار سەناتور تايسويعانداعى شارۋاشىلىق قوجالىقتارىنا ارنايى بارىپ، شارۋالارمەن كەزدەستى. تۇرعىندار پوليگوندى رەسەيگە جالعا بەرۋگە قاتىستى كەيبىر ماسەلەلەردىڭ وڭ شەشىلۋىنە بايلانىستى جەر الىپ، ءوز كاسىبىن باستاۋعا مۇمكىندىك تۋعانىن ايتتى. بۇگىندە جەرگىلىكتى شارۋالار اسىل تۇقىمدى جىلقى مەن ءىرى قارا مالىن وسىرگەنى ءۇشىن مەملەكەت تاراپىنان كورسەتىلەتىن قولداۋلاردىڭ يگىلىگىن كورىپ وتىر. قازىرگى تاڭدا بۇرىنعى پوليگون اۋماعىندا 33 شارۋا قوجالىعى جۇمىس ىستەپ جاتىر.

جۇمىس ساپارى كەزىندە سارسەنباي ەڭسەگەنوۆ ايماقتاعى بارلىق اۋداننىڭ جانە وبلىس ورتالىعىنىڭ تۇرعىندارىمەن كەزدەسۋلەر وتكىزەدى. وسىعان دەيىنگى كەزدەسۋلەردە سەناتور ءماسليحات دەپۋتاتتارىنا، كاسىپكەرلەرگە، ۇكىمەتتىك ەمەس ۇيىمدار مەن اكىمدىكتەرگە «سايلاۋ تۋرالى»، «ساياسي پارتيالار تۋرالى»، «ارداگەرلەر تۋرالى» زاڭدارعا جانە باسقا دا ماڭىزدى زاڭنامالىق اكتىلەرگە ەنگىزىلگەن تۇزەتۋلەردىڭ قالاي تالقىلانىپ، قابىلدانعانىن ايتىپ بەردى.

سونىمەن قاتار ول ءوڭىر حالقىنا وزىنە سەنىم ءبىلدىرىپ، قولداۋ كورسەتكەنى ءۇشىن العىسىن جەتكىزىپ، قازىرگىدەي كۇردەلى كەزەڭدە ازاماتتاردى جۇدىرىقتاي جۇمىلىپ ارەكەت ەتۋگە شاقىردى.

جۇمىس كەستەسىنە سايكەس سەناتور ەندى اتىراۋ وبلىسىنىڭ ماحامبەت، يندەر، يساتاي جانە قۇرمانعازى اۋداندارىنىڭ سايلاۋشىلارىمەن كەزدەسەدى.

سوڭعى جاڭالىقتار

اتىراۋدا 9 بالانى يت تالادى

ايماقتار • بۇگىن، 19:57

ۇقساس جاڭالىقتار