وتكەن جىلى نۇر-سۇلتاندا ىسكە قوسىلعان "كاسىپكەر انا" جوباسىنا قازىردىڭ وزىندە جەتى جۇزگە جۋىق ءوتىنىش كەلىپ تۇسكەن. جوبا مىندەتى كوپ بالالى ايەلدەرگە, جالعىزباستى انالارعا, از قامتىلعان وتباسىلارعا, سونداي-اق مۇگەدەك بالالاردى تاربيەلەپ وتىرعان انالارعا ءوز ءىسىن باستاۋعا كومەكتەسۋ. بۇگىنگى تاڭدا جوبادا ونلاين رەجىمدە وقۋعا 1200-دەن استام ءوتىنىم كەلىپ ءتۇستى. العاشقى ىرىكتەۋدىڭ ناتيجەسىندە 500-گە جۋىق ايەل بارلىق تالاپتارعا سايكەس كەلەدى, ال قازىر 200-گە جۋىق ادام بىلىكتىلىكتەرىن ارتتىرۋدا.
"ينستاگرام ارقىلى جوبا تۋرالى بىلگەن سوڭ جاڭا ءبىلىم, ماشىقتار مەن داعدىلاردى يگەرۋگە شەشىم قابىلدادىم. مەن SMM مامانى ماماندىعىن تاڭداعانىما وكىنبەيمىن. بۇل سۇرانىسقا يە ماماندىق. اۋديتوريانى ساۋاتتى تارتۋدى, قىسقا, ناقتى جانە قىزىقتى جازۋدى ۇيرەندىم. ۇيدەن شىقپاي-اق, جۇمىس ىستەپ, اقشا تاباتىنىما, بالالارىمدى اسىراي الاتىنىما سەنىمىم نىعايدى. مەن سياقتى انالارعا كومەگى ءۇشىن "كاسىپكەر انا" جوباسىنا العىس بىلدىرەمىن", دەيدى جوبا قاتىسۋشىسى جازيرا ورىنباەۆا.
جوبا تۋرالى الەۋمەتتىك جەلىدەن بىلگەن مەرۋەرت اعزامقىزى دا ءوز تاجىريبەسىمەن ءبولىستى.
"جوبادا بىزگە پاراقشانى جۇرگىزۋدى, دۇرىس ساتۋدى جانە باسقا دا تاسىلدەردى ۇيرەتتى. "كاسىپكەر انا" جوباسى ماعان تەك كوپيرايتينگ بويىنشا ترەنينگتەرمەن عانا ەمەس, باسقالاي دا كوپ كومەكتەستى. جوباعا ءبىر ورىندا تۇرىپ قالماي, ءوز-ءوزىن دامىتۋعا تىرىساتىن مەن سياقتى انالار كەلدى. مۇندا تۋىسقاندار سياقتى ارالاسىپ, ءالى دە دوستىق قارىم-قاتىناسىمىزدى ۇزگەن جوقپىز. ەگەر مۇگەدەكتىگى بار بالاڭىز بولسا, ول ءۇشىن وڭالتۋدىڭ قانداي دا ءبىر قورلارى بار. بىراق انالار ءۇشىن مۇنداي قولداۋ, وڭالتۋ جوق. سوندىقتان بۇل جوبا بىزگە پسيحولوگيالىق تۇرعىدان كومەكتەسەدى. بۇل مۇمكىندىكتى بارىنشا پايدالانۋىمىز كەرەك. مەملەكەت مۇنداي جوبالاردى قولدايدى, ءوز كەزەگىندە بۇل جوبالار ءبىزدى قولدايدى", دەدى م. اعزامقىزى.
ەسكە سالايىق, وقىتۋ 11 نەگىزگى باعىتتا وتەدى. كارانتين كەزىندە "كاسىپكەر انا" جوباسى ونلاين رەجيمگە كوشتى. مۇندا بولاشاق IT جانە SMM ماماندارى, اسپازشىلار, گرافيكالىق ديزاينەرلەر, ماسساجشىلار, كونديتەر اسپازدار, پسيحولوگتار جانە باسقالار وقىتىلۋدا. جوباعا كوپ بالالى, جالعىزباستى, مۇگەدەك بالالاردى تاربيەلەپ وتىرعان انالار قاتىسا الادى.
