مەنىڭ اتى-ءجونىم – مارجان اندەكينا. 48 جاستامىن. الماتى قالاسىنىڭ تۇرعىنىمىن. ا.ن.سىزعانوۆ اتىنداعى ۇلتتىق عىلىمي حيرۋرگيالىق ورتالىقتىڭ اكىمشىلىگىندە ەڭبەك ەتەمىن. ءۇش بالانىڭ اناسىمىن. 12 ماۋسىمدا سىرقاتتانىپ قالدىم. دەنە قىزۋىم كوتەرىلىپ, تىنىسىم تارىلدى. كوك جوتەل قىستى. ءوزىمدى ءالسىز سەزىندىم. العاشىندا سۋىق تيگەن بولار دەپ, اسا ءمان بەرمەدىم. ۇيدە وزىمشە ەم-دوم قابىلدادىم. بىراق ودان وڭالا قويمادىم. كەرىسىنشە, كۇن وتكەن سايىن دەنساۋلىعىم كۇرت ناشارلاي ءتۇستى. سودان 15 ماۋسىمدا جەدەل جاردەم كولىگىن شاقىرتتىق. دارىگەرلەر №12 قالالىق اۋرۋحاناعا جەتكىزىپ, سول جەردە تەكسەردى. سول ارقىلى كوروناۆيرۋسكە شالدىققانىم انىقتالدى.
اۋرۋحانادا قاجەتتى ەم-دومنىڭ ءبارىن الدىم. بىردەن ايتا كەتەيىن, وندا تۇسكەن ءار پاتسيەنتكە اق حالاتتىلار ايرىقشا كوڭىل بولەدى, سىرقاتتانعان ادامداردىڭ ساۋىعىپ كەتۋى ءۇشىن قولايلى جاعدايدىڭ بارلىعى جاسالۋدا. ولار كۇنى-ءتۇنى تىنىمسىز ەڭبەك ەتۋدە. اسىرەسە ءبولىم مەڭگەرۋشىسى مارات تۇگەل ۇلى مەن ەمدەۋشى دارىگەر اسقار ورالحان ۇلىنىڭ ءبىلىمى مەن بىلىگىنە ايرىقشا ءتانتى بولدىم. №12 قالالىق اۋرۋحانانىڭ باسقا دا دارىگەرلەرى مەن مەدبيكەلەرىنە, سانيتارلارىنا العىسىم شەكسىز. سولاردىڭ كاسىبيلىگى مەن قامقورلىعىنىڭ ارقاسىندا ءبىر اپتا ىشىندە ءوزىمدى جاقسى سەزىنىپ, دەنساۋلىعىم تۇزەلدى. تاعى ەكى اپتا دارىگەرلەردىڭ قاراۋىمەن ۇيدە ەمدەلدىم. قازىر جاعدايىم جاقسى. اتى جامان ىندەتتەن ساۋىقتىم. وتباسىمنىڭ جانىندامىن, جۇمىسىم ءجۇرىپ جاتىر.
وسى ورايدا, ەل گازەتى ارقىلى اق حالاتتى ابزال جاندارعا تاعى ءبىر العىسىمدى ءبىلدىرىپ قويسام, ەش ارتىقتىعى جوق دەپ ويلايمىن.
مارجان اندەكينا,
الماتى قالاسىنىڭ تۇرعىنى
