ايماقتار • 03 تامىز، 2020

"الماتى جاستارى 3.0" تۇرعىنۇي باعدارلاماسىنا كىمدەر ىلىگە الادى؟

101 رەت كورسەتىلدى

بۇل كۇندەرى 526 ءوتىنىش بەرۋشى وزدەرىنىڭ تولەم قابىلەتتىلىگىن راستاۋ ءۇشىن «تۇرعىنۇيقۇرىلىسجيناق بانكىنەن» جولداما الاتىن بولادى. تاعى 457 ادام رەزەرۆكە ەنگىزىلدى. 

بۇل تۋرالى الماتى قالاسىنىڭ اكىمى باقىتجان ساعىنتاەۆ Twitter-دەگى ءوزىنىڭ پاراقشاسىندا حابارلادى.

 

 

«الماتى جاستارى 3.0». جىل باسىنان بەرى تولەم قابىلەتتىلىگىن راستاۋ ءۇشىن 1035 ادام جولداما الدى. تىركەۋ تالابى جويىلعاننان كەيىن تاعى 526 جولداما الادى، ال 457-ءسى رەزەرۆكە ەندى. جۇمىس ىستەيتىن جاستارعا 5 پايىزدىق نەسيەنىڭ بەرىلۋى – باسپانالى بولۋدىڭ ەڭ ءتيىمدى مۇمكىندىگى»، - دەپ جازدى قالا اكىمى.

ءبىرىنشى كەزەڭ بارىسىندا 3220 ءوتىنىش ءتۇستى، ونىڭ ىشىندە 1035 ادامعا جولداما بەرىلدى. جۇمىسى بار جاستاردى تۇرعىن ۇيمەن قامتاماسىز ەتۋ جونىندەگى قالالىق باعدارلامانىڭ شارتتارىنا وزگەرىستەر ەنگىزىلگەن سوڭ 5471 ءوتىنىش ءتۇستى. باعدارلاما تالاپتارىنا ساي بولماعاندىقتان 2527 ءوتىنىش قابىلدانبادى، ال ءبىلىم سالاسىنىڭ قىزمەتكەرلەرى بەرگەن 1964 ءوتىنىش قارالۋ ۇستىندە.

باعدارلاما تالاپتارىنا 980 ادامنىڭ وتىنىشتەرى ساي كەلەدى، ولار دەنساۋلىق سالاسىندا جۇمىس جاسايتىن - 587; مادەنيەت سالاسىنداعى - 112; سپورت سالاسىنداعى - 23; جوو مەن عزي وقىتۋشىلىق پەن عىلىمي قىزمەتپەن اينالىساتىن - 170; باق سالاسىنداعى - 56; الەۋمەتتىك سالاداعى 32 ادام.

قابىلدانباعان وتىنىشتەردىڭ باسىم بولىگى جۇمىس ورىندارى نەمەسە قىزمەتتەرىنىڭ باعدارلاما تالاپتارىنا ساي كەلمەۋى سالدارىنان كەرى قايتارىلدى. ياعني، 36 ءوتىنىش بەرۋشىنىڭ جەكە باسپاناسى بار ەكەنى ، 46 ادامنىڭ ءوز باسپاناسىنان باس تارتقانى انىقتالدى، 152 ادامدا زەينەتكەرلىك تولەم بولماعان، 77 ادامنىڭ وتىنىشتەرى جوعارىدا اتالعان سەبەپتەرگە قاتىستى كەرى قايتارىلعان، ال 23 ادام العاشقى قابىلداۋ كەزىندەگى نەسيەلىك وتىنىشتەرىن ۇسىنعان.

ەسكە سالساق، قالا اكىمى باقىتجان ساعىنتاەۆتىڭ شەشىمى بويىنشا باعدارلاماعا قاتىسۋشى مەن ونىڭ وتباسى مۇشەلىرىنىڭ الماتىدا تۇراقتى تىركەۋدە بولۋى تالابى الىنىپ تاستالعان ەدى. وسىعان وراي، اعىمداعى جىلدىڭ 22 ماۋسىمىنان 6 شىلدە ارالىعىندا وتىنىشتەردى قابىلداۋ قايتا جۇرگىزىلگەن بولاتىن.

وتىنىشتەر مەن قۇجاتتاردى قابىلداۋ تولىقتاي اۆتوماتتاندىرىلعان. وتىنىشتەردى قابىلداۋ ەلەكتروندىق قولتاڭبا ارقىلى www.almaty-zhastary.kz سايتىندا ىسكە اسادى. جيناقتالعان باللداردى اۆتوماتتى تۇردە ەسەپتەۋ ءۇشىن ەلەكتروندى كالكۋلياتور ەنگىزىلگەن. بۇدان وزگە، سايتتاعى جەكە كابينەت ارقىلى بەرىلگەن ءوتىنىشتىڭ دەڭگەيىن جەكە كورۋگە دە بولادى. تۇرعىن زاەمدارىنىڭ اشىق ءارى ادال ءبولىنۋىن قامتاماسىز ەتۋ ءۇشىن باعدارلاماعا قاتىسۋشىلاردىڭ تولىق ءتىزىمى سايتتا جاريالانعان.

13 ميلليونعا دەيىنگى جەڭىلدەتىلگەن يپوتەكالىق زاەم جىلدىق 5% مولشەرلەمەمەن «تۇرعىنۇيقۇرىلىسجيناق بانكى» ارقىلى بەرىلەدى. وزدەرىنىڭ تولەم قابىلەتتىلىكتەرىن ويداعىداي راستاعان باعدارلاماعا قاتىسۋشىلار 60 كۇن ىشىندە ءبىرىنشى جانە ەكىنشى نارىقتا تۇرعىن ءۇيدى جەكە وزدەرى تاڭداي الادى.

سوڭعى جاڭالىقتار

الىستان جەتكەن العىس

ايماقتار • بۇگىن، 14:10

ۇقساس جاڭالىقتار