ايماقتار • 01 تامىز، 2020

قوس دوڭگەلەكتى تۇلپاردى قىمقىرعانىمەن سىڭىرە المادى

25 رەت كورسەتىلدى

پەتروپاۆلدىڭ سەماشكو كوشەسىندە تۇراتىن 54 جاسار تۇرعىنىنىڭ قۇنى 130 مىڭ تەڭگە تۇراتىن "Phoenix" ماركالى ۆەلوسيپەدىن قىمقىرعان سۋىق قولدى ءىز سۋىتپاي، جەدەل ۇستالدى. وعان جاقىن اراداعى اۋلالاردىڭ بىرىندە تۇرعان بەينەكامەرانىڭ كومەگى ءتيدى. قوس دوڭگەلەكتى تۇلپارىنىڭ قولدى بولعانىن كورگەن قىزىلجاردىڭ 54 جاسار تۇرعىنى "102" نومىرىنە جەدەل حابارلاعان، - دەپ جازادى Egemen.kz

پوليتسيا قىزمەتكەرلەرى شامامەن ۇرلىق بولعان ۋاقىتتى بەينەدەن باقىلاعاندا ۆەلوسيپەد جەتەلەپ، اسىعا باسىپ بارا جاتقان قاسكويدى بىردەن كورەدى. ول جاقىن ماڭدا تۇراتىن 1972 جىلى تۋعان قالا تۇرعىنى بولىپ شىقتى. بەينەكامەراداعى كەتكەن باعدارىمەن جەدەل جەتكەن پوليتسەيلەر ونى ماساڭ كۇيىندە ۇستاپ، ۆەلوسيپەدتى يەسىنە قايتارىپ، ۇرىنىڭ ۇستىنەن قىلمىستى ءىس قوزعادى. قازىر وعان كەلۋى تۋرالى مىندەتتەمە تۇرىندەگى بۇلتارتپاۋ شاراسى قولدانىلعان.

پوليتسەيلەردىڭ جەدەل جۇمىسىنا رازى بولعان يەسى «كۇن سايىن جۇمىسقا جانە ساياجايعا ءمىنىپ بارىپ جۇرگەن اسىراۋشىمدى تاۋىپ بەرگەندەرىڭىزگە راحمەت» دەپ العىسىن جاۋدىرۋدا. «ۆەلوسيپەد يەلەرى قاۋىپسىزدىك شارالارىن كەز كەلگەن جاعدايدا ساقتاۋلارى ءتيىس. از ۋاقىتقا قالدىرسا دا ۆەلوسيپەدىن ۇرلاپ اكەتۋگە قارسى بەرىك تروسپەن بەكىتىپ كەتكەندەرى ءجون. مۇمكىندىگىنشە بەينەكامەرانىڭ باقىلاۋىنداعى ورىنداردى تاڭداعان دۇرىس. تاجىريبە كورسەتكەندەي، قاسكويلەر مۇنداي جەرلەردى اينالىپ وتەدى، سونىمەن بىرگە بەينەجازبالار قىلمىستى تەز اشۋعا مۇمكىندىك بەرەدى»، - دەپ اتاپ ءوتتى پەتروپاۆل قالاسىنىڭ پب باستىعى، پوليتسيا پولكوۆنيگى جاندوس مۇقاتوۆ.

سونداي-اق قىزىلجارلىقتار وزدەرىنىڭ قوس دوڭگەلەكتى كولىكتەرىن قالاۋى بويىنشا پوليتسيانىڭ مالىمەتتەر بازاسىندا تىركەي الادى. ول ۇرلىقتى تەز ارادا اشۋعا مۇمكىندىك بەرەدى. بۇگىنگى تاڭدا اتالمىش بازاعا 1116 ۆەلوسيپەد تىركەلگەن.

 

قىزىلجار

سوڭعى جاڭالىقتار

ۇقساس جاڭالىقتار