رۋحانيات • 31 شىلدە، 2020

قۇربان ايتتىڭ ءبىرىنشى كۇنىندە 17 997 وتباسىنا ەت تاراتىلدى

45 رەت كورسەتىلدى

قۇربان ايتتىڭ ءبىرىنشى كۇنىندە 17 997 وتباسىنا ەت تاراتىلدى، دەپ Egemen.kz حابارلايدى.

قادىرلى جاماعات!

قازاقستان مۇسىلماندارى ءدىني باسقارماسىنىڭ قوعام الدىنداعى نەگىزگى 4 قىزمەتىنىڭ ءبىرى – قايىرىمدىلىق شارالارىن ۇيىمداستىرۋ. قمدب كومەككە مۇقتاج جانداردى قولداۋ، قاۋىپتى ىندەتتى الدىن الۋ ماقساتىندا WWW.QURBAN2020.KZ سايتىن ىسكە قوسقان بولاتىن.

جوبا ماقساتى – قايىرىمدىلىققا دانەكەر بولۋ، حالىقتىڭ دەنساۋلىعى مەن ومىرىنە تونگەن قاۋىپتى سەيىلتۋگە ۇلەس قوسۋ، قۇربان شالۋعا نيەت بىلدىرگەن جاندارعا كارانتين جاعدايىندا وڭتايلى جول ۇسىنۋ، ت.ب.

 قۇرمەتتى قاۋىم!

WWW.QURBAN2020.KZ جوباسى بويىنشا جۇيەلى ەسەپ بەرىپ تۇراتىنىمىز جايلى وسىعان دەيىن وزدەرىڭىزگە حابارلاعانىمىزداي، 2020 جىلدىڭ 31 شىلدەسى ساعات 15:00-دەگى مالىمەت بويىنشا رەسپۋبليكا دەڭگەيىندە 3225 ادام قۇرباندىق شالۋعا تاپسىرىس بەردى. بۇدان بولەك 1000-نان استام ادام اللا رازىلىعى ءۇشىن قوسىمشا قۇرباندىق مالىن اكەلىپ تاپسىردى. بۇگىن، ياعني قۇربان ايتتىڭ ءبىرىنشى كۇنىندە ەلىمىز بويىنشا 4 700 مال شالىندى. ونىڭ ىشىندە قوي – 4341، ءىرى قارا – 274، ەشكى – 83، تۇيە – 2. بۇعان قوسا 22 كاسىپورىن مەن مەكەمەلەر قۇرباندىق مالىن تاپسىردى. بارلىق مالىمەتتى جيناقتاپ ايتقاندا، ەلىمىز بويىنشا 17 997 وتباسىنا قۇرباندىق ەتى تاراتىلدى.

قادىرلى وتانداستار!

حالقىمىزدا "قايىرىمدىلىق جاساساڭ، قايىرىن ءوزىڭ كورەسىڭ" دەگەن ناقىل ءسوز بار. بارشاڭىز شىنايى نيەتپەن قۇربان شالىپ، مۇقتاج وتباسىلارعا مەرەكەلىك قۋانىش سىيلاپ، ساۋاپتى ىسكە ورتاقتاسىپ وتىرسىزدار.

اسا قامقور، ەرەكشە كەڭشىلىك يەسى بولعان اللا تاعالا وسى امالدارىڭىزدىڭ ساۋابىن ارتتىرىپ، ءوز قۇزىرەتىندە قابىلدىققا جازعاي. ساۋابى مول قايىرىمدىلىق ءىستىڭ جاقسىلىعى وزدەرىڭىزگە ەسەلەپ قايتىپ، حالىقتىڭ العىسى مەن باتاسىنا بولەنە بەرىڭىزدەر. كومەك العان جانداردىڭ سىزدەرگە جولداعان دۇعا-تىلەكتەرى قابىل بولعاي. جاراتقان جاببار يەمىز مەرەيلەرىڭىزدى ۇستەم ەتىپ، ەكى دۇنيەنىڭ نىعمەتى مەن قۇرمەتىنە بولەنۋدى ءناسىپ ەتكەي. ءامين! 

سوڭعى جاڭالىقتار

ۇقساس جاڭالىقتار