"مەن ءۇش رەت جۇرەگىمە وتا جاساتتىم, سوندىقتان اۋرۋدى ءبىرىنشى كەزەكتە مەن جۇقتىرۋىم مۇمكىن. ءومىر سۇرگىم كەلەدى, سوندىقتان بەتپەردە تاعامىن. باسقالارعا دا كەڭەس بەرەمىن", دەيدى سەرۋەنگە شىققان زەينەتكەر.
"قازىر ۆيرۋس اۋا ارقىلى تارايدى. مەن جاقىندارىما, وزىمە جۇقتىرىپ العىم كەلمەيدى", دەپ قىسقا جانە ناقتى جاۋاپ بەردى قالا تۇرعىندارىنىڭ ءبىرى.
"مەنىڭ ويىمشا, دالادا ءجۇرىپ, جاقىن جەردە ەشكىم بولماسا, بەتپەردە تاقپاۋعا بولادى. ال قوعامدىق ورىنداردا مىندەتتى تۇردە تاعۋ قاجەت. بۇل – الەۋمەتتىك جاۋاپكەرشىلىك!", دەپ سەنىمدى جاۋاپ بەردى ازاماتشا.
"ارينە, ءوزىڭىز ءۇشىن دە, باسقالار ءۇشىن دە وتە قاجەت! اۋرۋحانالاردا كوپتەگەن ادامدار جاتىر. بىراق بۇل وتپەلى كەزەڭدى ەڭسەرۋىمىز كەرەك. قالا, ەل بولىپ بىرگە جەڭۋدى تىلەيمىن", دەپ وپتيميستىك پىكىر ءبىلدىردى تاعى ءبىر ساۋالناما قاتىسۋشىسى.
بايقاعانىمىزداي, رەسپوندەنتتەردىڭ كوپشىلىگى گيگيەنا مەن سانيتاريا نورمالارىن ساقتاۋ تالاپتارىنا تۇسىنىستىكپەن قارايدى جانە ولاردى ۇستانادى. ادامدار قازىر بۇنىڭ ومىرلىك قاجەتتىلىك جانە تۋىستار مەن دوستار الدىنداعى الەۋمەتتىك جاۋاپكەرشىلىك ەكەنىن تۇسىنەدى. ەستەرىڭىزگە سالا كەتەيىك, باس مەملەكەتتىك سانيتارلىق دارىگەردىڭ قاۋلىسىنا سايكەس, تۇرعىندار ءۇشىن قورعانىس بەتپەردەلەرىن عيماراتتاردا, سونداي-اق كولىك پەن كوشەدە تاعىپ ءجۇرۋ مىندەتتەلگەن. بۇل رەتتە اتالعان تارماق ادامداردى تالاپتى ورىنداۋعا مىندەتتەيدى جانە بۇزىلعان جاعدايدا كىنالىلەرگە اكىمشىلىك شارالار قولدانىلادى. نۇر-سۇلتان اكىمدىگى قالا تۇرعىندارى مەن قوناقتارىنان گيگيەنا جانە سانيتاريا نورمالارىن (بەتپەردە تاعۋ, الەۋمەتتىك قاشىقتىقتى ساقتاۋ, قوعامدىق ورىندارعا بارماۋ) ساقتاۋدى سۇرايدى.
