اباي • 29 شىلدە، 2020

اباي مۇراسىنىڭ ۆيرتۋال كورمەسى وتەدى

58 رەت كورسەتىلدى

قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى ۇلى ويشىلىمىزدىڭ 175 جىلدىعىنا وراي قالىڭ جۇرتتىڭ نازارىنا "اباي مۇراسى – تاربيەنىڭ قاينار كوزى" ۆيرتۋال كورمەسىن ۇيىمداستىرادى، دەپ حابارلايدى Egemen.kz.

ەلباسىنىڭ جەكە ءارحيۆى، كىتاپحاناسى مەن مۋزەيىنىڭ قور ماتەريالدارىنان جاساقتالعان كورمە فيلوسوفيا، ادەبيەت، پوەزيا، مۋزىكا سالالارىمەن ۇشتاسقان كەمەڭگەردىڭ ميراسىنان سىر شەرتەدى.

"كورمە ماتەريالدارىنىڭ قاتارىناا كىرگەن ەلباسى ن. نازارباەۆتىڭ حالىق الدىندا سويلەگەن سوزدەرىنە قاراپ-اق قازاق حالقىنىڭ تاريحي ساناسى مەن مادەني مۇراسىن جاڭعىرتۋداعى اباي مۇراسىنىڭ ماڭىزدىلىعىن اڭعارۋعا بولادى. تۇڭعىش پرەزيدەنتتىڭ ءار بايانداماسى قازاق ادەبيەتىنىڭ ىرگەتاسىن قالاعان ويشىلدىڭ شىعارماشىلىعىنا تالداۋ جاسايتىندىقتان، عىلىمي زەرتتەۋگە تاتيدى.

جاھاننىڭ مادەني-گۋمانيتارلى كەڭىستىگىندە قازاقستاننىڭ بەينەسى مەن مەملەكەتتىك، ۇلتتىق بىرەگەيلىگى ەلباسىنىڭ ەل شەكاراسىنان تىس اباي مۇراسىن جۇيەلى ناسيحاتتاۋىمەن تۇسپا-تۇس قالىپتاستى. اقىن ميراسىن الەمگە پاش ەتۋ جولىندا يۋنەسكو تاراپىنان 1995 جىل "اباي جىلى" دەپ جاريالاندى. 

1995 جىلعى 9 تامىزدا اباي قۇنانباي ۇلىنىڭ 150 جىلدىعىنا وراي الماتىدا وتكەن سالتاناتتى جيىندا ەلباسى بىلاي دەدى: "اباي جىلىن وتكىزگەن جاقسى. اباي جىرىن جاتتاعان دۇرىس. ال ونىڭ تەرەڭ ويى مەن  پىكىرى تەك ايتا جۇرەر اڭگىمە بولماي، كۇنبە-كۇنگى تىرلىگىمىزگە ءبىر كىرپىش بوپ قالانىپ جاتاتىن ناقتى ىسكە اينالسا، تىپتەن قۇبا-قۇپ. ول ۇيرەتكەن تاعىلىم مەن ول كوكسەگەن مۇراتتاردى شىن قاستەرلەي بىلگەنىمىزدىڭ، ادىلەت پەن ابزالدىق ۇستازى الدىنداعى پەرزەنتتىك قارىزىمىزدى تەرەڭ ءتۇسىنىپ، وتەي العاندىعىمىزدىڭ بىردەن-ءبىر بەلگىسى دە وسى.

ۇلى ويشىلدىڭ ەسىمى مەن مۇراسىن ساقتاۋ جولىندا جاسالعان بۇل جۇمىستاردىڭ ارقاسىندا قازاق حالقى دا، جەر-جاھان وركەنيەتى دە اباي الەمىن اشىپ، اقىن شىعارماشىلىعىنىڭ تەرەڭ مانىمەن تانىسا الدى. داناگوي اعارتۋشى شەتەلدىك كلاسسيكتەردىڭ قالامىنان تامعان تۋىندىلاردى اۋدارۋ ارقىلى جەرلەستەرىن الەم مادەنيەتىمەن تانىستىردى. بۇگىندە ءححى عاسىردىڭ وكىلدەرى ابايدى ادامزاتقا ورتاق قۇندىلىقتاردىڭ تۇتقاسى دەپ قابىلدايدى. ولاردىڭ تۇسىنىگىندەگى اباي –  قىرعي قاباقتان ازات بەيبىتشىل ۇستانىمداردىڭ ۇلگىسى، ەلباسى باستامالارىنىڭ نەگىزىنە الىنعان ابىرويدىڭ تۇعىرى. مۇنى بەينەلەيتىن اتالمىش كورمە اباي مۇراسىنىڭ حالىق قازىناسى ەكەنىن دايەكتەيدى. قوعامنىڭ رۋحاني تىرەگىنە اينالعان ويشىلدىڭ ميراسى قۇندىلىقتار ساباقتاستىعىن ساقتاپ قالا بەرمەك"، - دەلىنگەن كىتاپحانانىڭ حابارلاماسىندا. 

سوڭعى جاڭالىقتار

اراق ساتىلمايتىن اۋدان

ايماقتار • كەشە

ەرلىككە تولى سۋرەتتەر

رۋحانيات • كەشە

ۇقساس جاڭالىقتار