وتكەن جىلى اشىلىپ, ءوز شارۋاشىلىعىن قاربىز-قاۋىن ەگۋمەن باستاعان بەينەۋ اۋدانىنداعى ءبىر عانا شارۋاشىلىق بيىل 25 مىڭ توننا ءونىم بەرۋدى جوسپارلاپ وتىر.
– بيىل قاۋىن مەن قاربىزعا قوسىپ, كارتوپ پەن قيار ەكتىم. بۇيىرسا, الداعى ۋاقىتتا وزگە دە ونىمدەر ەگىپ, اۋىل تۇرعىندارىن جەرگىلىكتى ونىممەن قامتۋدى جوسپارلاپ وتىرمىن. قازىرگى تاڭدا قاربىزدىڭ ءبىر كيلوسى 120 تەڭگەدەن ساتىلۋدا. ارينە, وزگە وڭىرلەردەن كەلەتىن ونىمدەر بار. باسەكەگە قابىلەتتىلىكتى ارتتىرۋ قاجەت. وسى ورايدا جەرگىلىكتى اكىمدىكتەن قولداۋ سۇرادىق, – دەدى شارۋا قوجالىعىنىڭ يەسى سەگىزباي ەرەجەپوۆ.
ال بەينەۋلىك تاعى ءبىر كاسىپكەر ءالىپباي كارىباەۆتىڭ جىلىجايىندا قيار جانە دامدەۋىش اسكوكتەر وسىرىلەدى. جالپى كولەمى 0,2 گەكتاردى قۇرايتىن جىلىجاي كەشەنىندە 10 توننا قيار ءونىمىن الۋ جوسپاردا بار. بۇدان بولەك, اۋدانداعى ەكى شارۋاشىلىقتا قاۋىن-قاربىز بەن كوكونىس ونىمدەرىن وسىرەدى. ماسەلەن, «بەرەكەت» شارۋا قوجالىعى 3,5 گەكتار جەرگە قاۋىن-قاربىز ەگىپ, 2019 جىلى 5 توننا قاۋىن, 15 توننا قاربىز الدى. بيىل ءونىمدى كوبەيتىپ, قاۋىننان 10 توننا, قاربىزدان 15 توننا جانە كارتوپ پەن قيار ەگىپ, 2 توننا كارتوپ, جارتى توننا قيار الۋدى جوسپارلاپ وتىر.
– 2019 جىلى 10 گەكتار جەردەن 50 توننا قاربىز, 40 توننا قاۋىن, قىزاناق پەن قياردان 15 توننا جانە دامدەۋىش بۇرىشتاردان 5 توننا ءونىم الدىق. بيىل وسى ونىمدەرگە قوسا ءسابىز دە ەكتىك. الداعى ۋاقىتتا تونناعا جاقىن ءسابىز الامىز دەپ وتىرمىز جانە قاۋىن مەن قاربىز, قىزاناق پەن قياردان دا بىلتىرعىدان كوپ ءونىم بولادى دەپ كۇتۋدەمىز, – دەيدى «نازار» شارۋا قوجالىعىنىڭ وكىلى حاميت تارعىن.
– وزىمىزدەن شىعاتىن ءونىم ەڭ الدىمەن جەرگىلىكتى نارىقتى قامتاماسىز ەتىپ, سودان كەيىن وزگەلەردى قامتۋى قاجەت. باعاسى دا ساي بولۋى كەرەك. كاسىپكەرلەردىڭ ۇسىنىستارى نازارعا الىنىپ, قولداۋ كورسەتىلىپ كەلەدى, – دەدى بەينەۋ اۋدانى اكىمىنىڭ ورىنباسارى راحىمجان شالباەۆ.
سونداي-اق جىلىجاي ونىمدەرىنىڭ كولەمىن ۇلعايتۋ قولعا الىندى. مىسالى, تۇپقاراعان اۋداندىق اۋىلشارۋاشىلىق جانە ۆەتەريناريا ءبولىمىنىڭ باسشىسى داۋلەت وتەباليەۆتىڭ مالىمەتىنشە, اۋداندا اۋماعى 5,1 گەكتار جەردى قامتيتىن جىلىجاي جۇمىس ىستەيدى.
– جىل سوڭىنا دەيىن اۋماعى 1 گەكتار بولاتىن جاڭا جىلىجاي اقشۇقىر اۋىلىندا ىسكە قوسىلادى دەپ جوسپارلانعان. قازىرگى تاڭدا قۇرىلىس جۇمىستارى جۇرگىزىلۋدە. جوبا قۇنى – 480 ملن تەڭگە, – دەدى داۋلەت وتەباليەۆ.
اۋداندا اۋىل شارۋاشىلىعىمەن اينالىسaتىن 317 شارۋاشىلىق جانە 3 جشس تىركەلگەن. ونىڭ 286-سى مال شارۋاشىلىعىمەن جانە 31-ءى ەگىن شارۋاشىلىعىمەن اينالىسادى.
– جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» باعدارلاماسى اياسىندا تۇپقاراعان اۋدانىنا شاعىن نەسيە الىپ, كاسىپتەرىن اشۋ جانە ودان ءارى دامىتۋ ءۇشىن 110 ملن تەڭگە بولىنگەن. 6 ايدىڭ قورىتىندىسى بويىنشا 9 كاسىپكەر 40 ملن تەڭگە قاراجات الدى. تاعى 7 جوبا كوميسسيا قاراۋىنا ۇسىنىلدى. شاعىن نەسيەلەر جۇمىسسىز ازاماتتارعا كاسىبىن اشۋعا, سونداي-اق ورتا جانە شاعىن كاسىپكەرلىكتەرىن ودان ءارى دامىتۋ ءۇشىن بەرىلەتىندىكتەن, الداعى ۋاقىتتا دا تۇرعىندارعا ءوز كاسىپتەرىن اشۋعا جانە دامىتۋعا سەپتىگىن تيگىزبەك, – دەدى د.وتەباليەۆ.
«ەلدە بولسا, ەرىنگە تيەدى» دەگەندەي, اۋىل ىرگەسىندەگى ونىمدەر اۋىل تۇرعىندارىن «الىستان اربالاۋدان» قۇتقاراتىنى انىق.
ماڭعىستاۋ وبلىسى
