جالپى, ناتو-عا مۇشە ەكى ەل تابيعي بايلىقتار ءۇشىن كوپ ۋاقىتتان بەرى كەلىسە الماي كەلدى. ەندى وعان گرەكيا ءۇشىن دە تاريحي عيمارات سانالاتىن ايا سوفيانىڭ جاڭالىعى قوسىلدى. تۇركيا پرەزيدەنتى رەجەپ تايپ ەردوعان «سوڭعى كۇندەرى ءبىزدىڭ ەلگە قاتىستى تەرىس پىكىر ءبىلدىرىپ جۇرگەندەردىڭ نەگىزگى ماسەلەسى ايا سوفيا ەمەس ەكەنىن بىلەمىز. ولاردىڭ نەگىزگى نىساناسى – ەلدەگى مۇسىلماندار», دەدى تەلەارنالارعا بەرگەن سۇحباتىندا.
گرەكيانىڭ نارازىلىق بىلدىرۋىنە دە سەبەپ بار. ويتكەنى ايا سوفيا پراۆوسلاۆ حريستياندارى ءۇشىن كيەلى ورىن سانالادى. گرەكيا پرەمەر-ءمينيسترى كيرياكوس ميتسوتاكيس تۇركيانىڭ بۇل شەشىمىنە قاتىستى «بۇل كۇشتىڭ كورىنىسى ەمەس, السىزدىكتىڭ بەلگىسى» دەدى. سونىمەن بىرگە انكارانى «ماسەلە تۋدىرۋشى» دەپ اتاپ, وزگەرىستى ءححى عاسىرداعى جاھاندانۋدى كەلەمەجدەۋ دەپ تۇسىنەتىنىن
جەتكىزدى.
تۇركيا سىرتقى ىستەر ءمينيسترى گرەكيا مالىمدەمەسىنەن كەيىن «گرەكيا تاعى دا ءوزىنىڭ يسلام مەن تۇركيانىڭ جاۋى ەكەنىن دالەلدەدى», دەپ قىسقا قايىردى.
