اتىراۋ وبلىسىنىڭ باس مەملەكەتتىك سانيتار دارىگەرى سادۋاقاس بايعابىلوۆتىڭ ايتۋىنشا, قازىرگى ۋاقىتتتا شەكتەۋ شارالارى, اقپاراتتىق-ءتۇسىندىرۋ جۇمىستارى مەن زەرتحانالىق زەرتتەۋلەر كولەمىن ءبولۋدىڭ ناتيجەسىندە ايماقتا ەپيدەميولوگيالىق جاعداي تۇراقتانۋدا.
"جالپى العاندا, كوروناۆيرۋس ينفەكتسياسىن جۇقتىرعاندار ىشىندە تەڭىز كەن ورنى قىزمەتكەرلەرىنىڭ ۇلەسى - 40 پايىز. سونىمەن بىرگە, بىزدە شىلدە ايىنىڭ العاشقى جارتىسىندا ورتاشا ءوسىم 3,5-نان 5%, ءتىپتى 10% -عا دەيىن باردى. بۇگىندە بۇل كورسەتكىش 1,5%-دان 2%-عا دەيىن تومەندەدى. تاۋلىگىنە ورتا ەسەپپەن 40-160-تان باستاپ 190-200 جاعداي تىركەلىپ وتىر. ەگەر تۇرعىندار شەكتەۋ شارالارىن, سونداي-اق, الەۋمەتتىك قاشىقتىقتى ساقتاسا, 3 تامىزدان كەيىن كارانتين شارالارىن جەڭىلدەتۋ ماسەلەسى قارالادى", - دەدى سادۋاقاس بايعابىلوۆ.
ايتا كەتەيىك, ناۋرىز ايىنان بەرى وڭىردە كوروناۆيرۋس ينفەكتسياسىن انىقتاۋ ءۇشىن 142 000 پتر-تەستىلەۋ جاسالىپ, 7 زەرتحانا ىسكە قوسىلدى. ونىڭ ىشىندە ءبىر زەرتحانا - مەملەكەتتىك. ءار زەرتحانا جوسپارلى ەمدەۋگە جاتقىزۋ, تاۋەكەل توبى, سونىمەن بىرگە سكرينينگ جانە كەن ورنىنىڭ قىزمەتكەرلەرىنە بايلانىستى ءوز دەڭگەيىنە ساي پتر-تەستىلەۋ جۇرگىزەدى.
