بەينەباقىلاۋ كامەرالارىنىڭ كومەگىمەن 48 219 قۇقىق بۇزۋشىلىق انىقتالدى

ايماقتار • 24 شىلدە، 2020

بەينەباقىلاۋ كامەرالارىنىڭ كومەگىمەن 48 219 قۇقىق بۇزۋشىلىق انىقتالدى

24 رەت كورسەتىلدى

الماتى وبلىسىندا سىرتقى بەينەباقىلاۋ كامەرالارى 50 مىڭعا جۋىق قۇقىق بۇزۋشىلىقتى تىركەگەن. بۇل تۋرالى Polisia.kz حابارلايدى، دەپ جازادى Egemen.kz

ايىم ءداۋىت

الماتى وبلىسىنىڭ ءتارتىپ ساقشىلارى التى اي ىشىندە سىرتقى بەينەباقىلاۋ كامەرالارىنىڭ كومەگىمەن 48 219 قۇقىق بۇزۋشىلىقتى انىقتاعان. تىركەلگەن ءتارتىپ بۇزۋ دەرەگى بويىنشا اكىمشىلىك حاتتامالار تولتىرىلىپ، قۇقىق بۇزۋشىنىڭ مەكەنجايىنا جولداندى.

– وبلىستاعى بەينەباقىلاۋ كامەرالارى "اۆتوۋراگان"، "كريس-پ" جانە "ينتەگرا" جۇيەلەرىندە جۇمىس جاسايدى. بەينەباقىلاۋ كامەرالارىمەن تىركەلگەن قۇقىق بۇزۋشىلىق اۆتوماتتى تۇردە وڭدەلىپ، وبلىستىق اكىمشىلىك پوليتسيا قىزمەتكەرلەرى تاراپىنان قۇقىق بۇزۋشىعا اكىمشىلىك ايىپپۇلدى تولەۋ تۋرالى حابار بەرىلەدى نەمەسە پوشتا جەلىسى ارقىلى مەكەنجايىنا حات جولدانادى، – دەپ ءتۇسىندىردى وبلىستىق پد اكىمشىلك پوليتسيا باسقارماسى باستىعىنىڭ ورىنباسارى نۇرجان تاڭاتاروۆ.

سونىمەن قاتار، قازىرگى ۋاقىتتا جاڭا جۇيە نەگىزىندە ايىپپۇل تولەۋشىگە اقپاراتتى پوليتسەيلەر ەمەس، پوشتا قىزمەتكەرلەرى جەتكىزەدى. بىرىكتىرىلگەن جۇيە بويىنشا ءتارتىپ بۇزۋشىلىق تۋرالى اقپاراتتى پوشتا قىزمەتكەرلەرى اكىمشىلىك پوليتسيا باسقارماسىنان ەلەكتروندىق نۇسقادا الادى. پوليتسەيلەردىڭ اقپاراتى بويىنشا، الماتى وبلىسى اۋماعىندا 270 بەينەكامەرا جول جانە قوعامدىق ءتارتىپتى قامتاماسىز ەتۋدە.

بەينەكامەرالاردىڭ تاۋلىك بويى تۇسىرگەن جازبالارى وڭدەلىپ، قۇقىق بۇزۋشىلىقتاردى انىقتاۋعا جانە قىلمىستاردى تەزىرەك اشۋعا مۇمكىندىك بەرەدى. سوندىقتان، پوليتسەيلەر كەلەشەكتە زاناماۋي تالاپتارعا ساي بەينەباقىلاۋ كامەرالارىن ورناتۋدى جوسپارلاۋدا.

– بيىل وبلىس تۇرعىندارىنان 92 ميلليونعا جۋىق اكىمشىلىك ايىپپۇل ءوندىرىلدى. قۇقىق بۇزۋشى قولدانىستاعى زاڭناماعا سايكەس ايىپپۇل سالىنعانى تۋرالى اقپاراتتى العان كۇننەن جەتى كۇن ىشىندە ايىپپۇلدىڭ جارتى سوماسىن تولەي الادى. نەمەسە، ءبىر اي مەرزىمدە تولىق وتەۋى ءتيىس. اكىمشىلىك ايىپپۇل ءبىر اي مەرزىمدە ەرىكتى تۇردە تولەنبەسە، ءتارتىپ ساقشىلارى ونى جەكە سوت ورىنداۋشىلارى ارقىلى ءماجبۇرلى تۇردە وندىرۋگە قۇقىلى، – دەپ تولىقتىردى نۇرجان تاڭاتاروۆ.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز