بۇگىن قالالىق ءماسليحات دەپۋتاتى ميراس شەكەنوۆ, نۇر-سۇلتان اكىمدىگىنىڭ "استانا - ادالدىق الاڭى" جوبالىق كەڭسەسىنىڭ وكىلدەرى, Nur Otan پارتياسىنىڭ قالالىق فيليالى, سىبايلاس جەمقورلىققا قارسى ءىس-قيمىل اگەنتتىگىنىڭ دەپارتامەنتى, سونداي-اق قالالىق جاستار ساياساتى باسقارماسىنىڭ ەرىكتىلەرىنەن تۇراتىن ارنايى مونيتورينگ توبى ءدارى-دارمەك باعاسىنىڭ نەگىزسىز قىمباتتاۋى, سونداي-اق رەتسەپتسىز ساتىلۋى دەپەكتەرى بويىنشا دارىحانالارعا كەزەكتى مونيتورينگ جۇرگىزدى.
ء"دارىحانالاردى ءدارى-دارمەكپەن قامتاماسىز ەتۋ جاقسارۋدا. بىراق سۇرانىسقا يە بىرقاتار ءدارى-دارمەكتەر بويىنشا ماسەلەلەر بار. كوپتەگەن پروۆيزورلار مەن فارماتسەۆتتەردىڭ شاعىمدارى بويىنشا كوتەرمە جەتكىزۋشىلەر مەن ديستريبيۋتورلار بىرقاتار ءدارى-دارمەكتى شەكتى باعاسىنان قىمباتقا ساتۋدا. سوندىقتان, ءبىز كەلەسى مونيتورينگتى ءىرى جەتكىزۋشىلەرگە, ولاردىڭ دارىحانالارعا ساتۋ كەزىندەگى كوتەرمە باعالارىن شەكتى باعالارمەن سالىستىرا وتىرىپ جۇرگىزەمىز. وسىعان بايلانىستى كەيبىر ءدارىحانالار قازىرگى ۋاقىتتا سۇرانىسقا يە ءدارى-دارمەكتەردى ساتىپ الۋدان باس تارتۋدا", – دەيدى قالالىق ءماسليحات دەپۋتاتى ميراس شەكەنوۆ.
ء"بىز ءتورت ءدارىحانانى ارالادىق, ولاردىڭ ەكەۋىندە انتيبيوتيكتەردى رەتسەپتسىز ساتۋ فاكتىسىن انىقتادىق. تاعى ءبىر ءدارىحانادا شەكتى باعادان قىمباستقا ساتۋ فاكتىسى تىركەلدى: "گەپارين" پرەپاراتى ءبىر امپۋلا ءۇشىن ءۇش مىڭ تەڭگەدەن ساتىلعان, ءوز باعاسى – 500 تەڭگە", – دەدى نۇر-سۇلتان اكىمدىگىنىڭ "استانا - ادالدىق الاڭى" جوبالىق كەڭسەسىنىڭ ۇيلەستىرۋشىسى ساۋلە بيسەمباەۆا.
ماتەريالدار قالالىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنە, سونداي-اق ودان ءارى تەكسەرۋ ءۇشىن پوليتسيا دەپارتامەنتىنە جىبەرىلەدى. س.بيسەمباەۆانىڭ ايتۋىنشا, قازىرگى ۋاقىتتا ەلوردا تۇرعىندارىنان ءدارى-دارمەكتەردىڭ قىمباتتاۋىنا قاتىستى 40-تان استام ءوتىنىش تۇسكەن. حابارلانعانداي, نۇر-سۇلتاندا ءدارى-دارمەك باعاسىن نەگىزسىز كوتەرگەندەرمەن كۇرەس كۇشەيدى. ءدارى-دارمەكتىڭ باعاسى قىمباتتاعانى انىقتالسا, ازاماتتار ءىKOMEK 109 بىرىڭعاي بايلانىس ورتالىعىنا, سونداي-اق +7 775 160 55 32 WhatsApp نومىرىنە حابارلاما جىبەرۋىنە بولادى.
سونىمەن قاتار ءدارى-دارمەكتەردىڭ شەكتى باعاسىن dari.kz قوسىمشاسى ارقىلى, ndda.kz رەسمي سايتىنان نەمەسە adilet.zan.kz سىلتەمەسى ارقىلى قر دەنساۋلىق ساقتاۋ ءمينيسترىنىڭ بۇيرىعىمەن تەكسەرۋگە بولادى. ۇكىمەت پەن ەلوردا اكىمدىگى ءدارى-دارمەكتەردى ساتىپ الۋ مەن اكەلۋ راسىمدەرىن جەڭىلدەتۋ, لوگيستيكا بويىنشا قولداۋ كورسەتۋدە. سونىمەن بىرگە, قالالىق پروكۋراتۋرا, پوليتسيا دەپارتامەنتتەرى, مەملەكەتتىك كىرىستەر, ەكونوميكالىق تەرگەۋ, فارماتسەۆتيكالىق باقىلاۋ قىزمەتكەرلەرىنەن تۇراتىن ءموبيلدى توپ ءدارى-دارمەكپەن الىپساتارلىق فاكتىلەرىن بولدىرماۋ ءۇشىن كۇندەلىكتى جۇمىس ىستەيدى. اتاپ ايتقاندا, I-teka قوسىمشاسىن قولدانا وتىرىپ, الەۋمەتتىك جەلىلەردەگى (Instagram, Facebook, telegram, WhatsApp) حابارلامالاردى زەردەلەۋ ارقىلى باعالار ۇنەمى قاداعالانادى.
