نەگىزى بۇعان دەيىنگى ماتچتار ەلورداداعى «استانا ارەنادا» ءوتىپ جۇرگەنى بارشاعا بەلگىلى. الايدا جىل باسىندا ىشكى جوندەۋگە بايلانىستى جابىلعان ستاديوننىڭ قۇرىلىس جۇمىستارى ءالى كۇنگە دەيىن بىتپەي جاتقان كورىنەدى. سوندىقتان قفف باسشىلىعى تاۋەكەلگە بارماي-اق, العاشقى ماتچتى الماتىدا وتكىزگەندى ءجون دەپ شەشىپتى. «ۇلتتار ليگاسىنداعى بەلارۋس قۇراماسىنا قارسى ويىندى ورتالىق ستاديوندا وتكىزەمىز. ال ۇيدە وتكىزەتىن تاعى ەكى ماتچتىڭ قايدا وتەتىنى ءالى بەلگىسىز», دەيدى ۇلتتىق قۇراما كوماندالارى دەپارتامەنتىنىڭ ديرەكتورى.
سونداي-اق قايرات نۇرداۋلەتوۆ ۋەفا باسشىلىعى 1000 ادامعا دەيىن ستاديونعا جانكۇيەر كىرگىزۋگە رۇقسات بەرگەنىن مالىمدەدى. «ارينە ەڭ الدىمەن بارلىعى سول ەلدەگى ەپيدەميالىق جاعدايعا بايلانىستى ەكەنىن ەسكەرگەن ءجون. مىسالى, ماتچ قابىلدايتىن ەلدە جاعداي تۇراقتى دەپ سانالسا بارلىق سانيتارلىق تالاپتى ساقتاپ, جانكۇيەر كىرگىزۋگە بولادى. ال ماتچ ىندەت كەڭ تارالىپ جاتقان ەلدە بولسا وندا فۋتبولشىلار جانكۇيەرسىز وينايدى», دەيدى ول.
ايتا كەتەيىك, قازاقستان قۇراماسى ۇلتتار ليگاسىنىڭ س ديۆيزيونىندا البانيا, بەلارۋس جانە ليتۆا فۋتبولشىلارىمەن ءبىر توپتا ونەر كورسەتەدى.
