ىشكى تۋريزمگە يەك ارتار كەز كەلدى

الايدا توتەننەن كەلگەن جاعدايعا بايلانىستى قازىر شالعايداعى مەملەكەتتەر قولجەتىمسىز. سوندىقتان وتانداستارىمىز شەتەل ساپارىن كەيىنگە شەگەرىپ, ىشكى تۋريزمگە يەك ارتا باستادى. ارينە ەلىمىزدە بۇل سالادا وراسان جۇمىستار اتقارىلۋى قاجەت ەكەنى بەلگىلى, ولار – سەرۆيستى جاقسارتۋ, ينفراقۇرىلىمدى دامىتۋ, جاڭا تابيعي اۋماقتاردى يگەرۋ.

وسى جاعدايدى ەسكەرگەن تۇرعىندار, شەتەلدە دەمالىپ كەلگەندى دۇرىس دەپ ەسەپتەيدى. ونىڭ ۇستىنە كەي ەلدەردىڭ باعاسى ءبىزدىڭ ەلدەگى دەمالىس ايماقتارىمەن سالىستىرعاندا ارزانعا شىعاتىنىن دەما­لۋ­شىلاردىڭ وزدەرى ايتىپ جاتىر. سون­دىقتان ساياحاتشىلاردىڭ كوپ بولىگى قازاق­ستاندى ەمەس, شەتەلدى تاڭداپ جاتادى. جال­پى, ەلباسىنىڭ «رۋحاني جاڭعىرۋ», «نۇرلى جول» باعدارلامالارى وسى ىشكى تۋريزمگە قاراتىپ ايتىلعانىن كەيبىر جەرگىلىكتى باسقارۋشى ورگاندار ءالى تۇسىنە قويعان جوق سياقتى. ەگەر بارلىعى وسىنى ءتۇسىنىپ, باعدارلامادا ايتىلعانداردى ۇرانعا, ناۋقانعا اينالدىرماي جۇمىس ىستەسە, ەلىمىزدە ىشكى تۋريزم باياعىدا دامىپ كەتەر ەدى. دەگەنمەن بۇل سالانى جاقسارتۋعا ءالى دە كەش ەمەس. ەلىمىزدە جۇرت بىلمەيتىن ءالى قانشاما كورىكتى مەكەندەر بار. مىسال رەتىندە, اقمولا وبلىسى ەرەيمەنتاۋ اۋدانىندا ورنالاسقان كوبەيتۇزدى الايىق. بۇعان دەيىن بۇل كولدى جەرگىلىكتى حالىق بولماسا, بىلايعى جۇرت بىلە بەرمەيتىن. ەلدەگى كارانتيننىڭ ارقاسىندا كوبەيتۇز الەۋمەتتىك جەلى ارقىلى بۇكىل قازاقستانعا تەز تانىمال بولىپ كەتتى. ءبىر وكىنىشتىسى الىستان ات تەرلەتىپ كەلەتىن ساياحاتشىلار ءۇشىن ءتيىستى جاعداي جاسالماعان. اقمولا اكىمدىگى جوعارىدا ايتقان بارلىق ينفراقۇرىلىم ماسەلەسىن شەشسە, ىشكى ءتۋريزمدى جانداندىرۋداعى ەلەۋلى جۇمىس بولار ەدى دەپ ويلايمىز.

جالپى, ستاتيستيكا كومي­تە­­تىنىڭ ەڭ كەيىنگى مالىمەتى بويىن­شا, جىل سايىن 10,5 ملن-نان اسا قازاقستاندىق شەتەلدە دەما­لۋدى قۇپ كورەدى ەكەن. ونىڭ ىشىن­دە 9,5 ملن وتان­داسىمىز تمد ەلدەرىنە سايا­حاتتاسا, قالعانى الەمنىڭ وزگە مەملەكەتتەرىن تاڭداعان. ناقتى دەرەكتەرمەن ايتار بولساق, 4 362 746 ادام – رەسەي فەدەراتسياسىنا, 2 651 220 ادام – قىرعىز رەس­پۋب­ليكاسىنا, 2 392 582 ادام وز­­بەك­س­تان ەلى­نە ساياحاتتاعاندى ءجون سا­ناعان. بۇل تمد ەلدەرىنىڭ ارا­سىن­داعى ستاتيستيكا. ال 351 121 ادام – تۇركيادا, 189 881 ادام – قىتايدا, 161 237 ادام  ءباا-دە دەمالعان. سونداي-اق قازاق­ستاندىقتار ەڭ كوپ باراتىن ەل­دەردىڭ قاتارىندا مىسىر (119 616), گەرمانيا (56 174), تاي­لاند (47 122), وڭتۇستىك كورەيا (46 899) گرۋزيا (38 986) بار.

ال بىزگە كەلگەن شەتەلدىكتەر سانى 8,79 ملن ادامدى قۇرا­عان. كەيىنگى جىلدارمەن سالىس­تىر­عاندا بۇل كورسەتكىش 14,1%-عا وسكەن. بارلىق ەلدەردىڭ اراسىنان ءباا, ءۇندىستان جانە مالايزيا ەل­دەرىن ەرەكشە اتاپ وتۋگە بولادى. قازاق­ستانعا وتكەن جىلى اتالعان ەلدەردەن كەلۋ­شىلەر 50%, 49% جانە 44%-عا ارتتى. سونى­مەن قاتار گونكونگ (22%), پولشا (16%) جانە وڭتۇستىك كورەيادان (15%) كەلە­تىن تۋريستەر سانى ارتا تۇسۋدە. قازاق­ستاننىڭ تۋريس­تەردى تارتۋ بويىنشا نە­گىزگى شەتەلدىك نارىعى – رەسەيدەن كەلۋ­شى­لەردىڭ تۇراقتى ءوسىمى بايقالادى.

وسى ورايدا, ەل تۇرعىندارى دا ىشكى تۋريزمگە اقىرىنداپ دەن قويا باستادى. وزگە وڭىر­لەردەن نۇر-سۇلتان جانە الماتى قالالارىنا ساياحاتتاپ كەلەتىندەردى قوس­پا­عان­نىڭ وزىندە, قازاقستان بويىنشا ەڭ كوپ تۋريست باراتىن ايماق – شىعىس  قازاقستان وبلىسى. ەڭ سوڭ­عى دەرەك بو­يىنشا 346 562 ادام شىعىس تابيعاتىنا تامسانىپ قايتقان ەكەن. ونىڭ ىشىندە ەڭ كوپ دەمالۋشىلار التايعا –26 066 (ادام), الاكولگە – 68 722, بۇقتىرماعا – 8 883, ۇلانعا – 4 298 جانە كاتونقارا­عاي كۋ­رورت­تىق ايماعىنا – 3 324 ادام كەلگەن. سونداي-اق اق­مولا وبلى­سىنداعى ششۋچە-بۋراباي مەن زەرەندى كۋ­رورت­تىق ايماعىنا دا دەمالۋعا كەلە­تىندەردىڭ قاراسى قالىڭ. مى­سالى, 2018 جىلى بۇل ايماق­قا ەل بويىنشا 748 618 ادام سايا­حاتتاعان. سونىمەن قاتار قارا­عاندى وبلىسىنداعى قارقارالى كۋرورتتىق ايماعى مەن بالقاش كولىنە – 267 651 ادام, قوستاناي كۋرورتتىق ايماعىنا – 189 125 ادام, تۇركىستان جانە سارىاعاش كۋرورتتىق ايماعىنا  – 249 035 ادام ساياحات جاساعان.

ارينە بيىلعى جاعدايعا بايلانىستى جوعارىدا ءبىز اتاعان اي­ماقتاردا باعا كوتە­رىلۋى مۇمكىن. ويتكەنى نارىق زاڭى سولاي. قاي جەردە سۇرانىس ارتسا, سول جەردىڭ باعاسى كوتە­رى­لەتىنى ءبىز ايتپاساق تا بەلگىلى.