قوناققا كەلگەن بالاقاي اجەسى مەن تاتەسىنىڭ ۇيىنە قوناققا كەلگەن ەكەن, الايدا وعان ءۇيدىڭ مەكەن-جايىن ايتىپ قويۋدى ۇلكەندەر ەسكەرمەپتى. اۋلاداعى وزىندەي ۇساق بالالارميەن لەزدە ءتىل تابىسىپ, ويناپ كەتكەن بالا ءبىر كەزدە ەكى-ءۇش كوشەنى قۋالاپ, كەتىپ قالادى. تاتەسى كوزدەن تاسا قىلماي, سىرتتاي باقىلاپ جۇرسە دە بۇل كەزدە قىراعىلىعىن جوعالتىپ العان ەكەن, بالالار زىم-زيا بولىپ كەتكەندە عانا ىزدەۋگە كىرىسەدى. جانى قىسىلىپ, ساسقان ايەل ايماقتىڭ ءبارىن ءوزى ءسۇزىپ شىققانىمەن ەش ناتيجە شىعارا الماي سوسىن "102" تەلەفونىمەن پوليتسيانىڭ كومەگىنە جۇگىنەدى.
وقيعا ورنىنا جەدەل جەتكەن كريمينالدىق پوليتسيا ءبولىمىنىڭ قىزمەتكەرلەرى بالانىڭ ءتۇر-ءتۇسى مەن كيگەن كيىمىن انىقتاپ, ماڭايدى ءجىتى شولۋعا كىرىسەدى. كورگەن ادامدار مەن بىرگە ويناعان بالالار دا تابىلادى. اقىرى, قۇرامىندا پوليتسيا اعا لەيتەنانتى بەكجان سارسەنبەكوۆ پەن پوليتسيا لەيتەنانتى ءادىل قالين بار پەتروپاۆل قالالىق پب پاترۋلدىك پوليتسيا باتالونىنىڭ ەكيپاجى "City Mall" ساۋدا ءۇيى اۋدانىنداعى اۋلالاردىڭ ءبىرىندە ويناپ وتىرعان بالالاردىڭ اراسىنان ىزدەۋدەگىبالانى تابادى.
ول قاننەن-قاپەرسىز قۇربىلارىمەن ويناپ وتىرادى, الايدا اجەسى مەن تاتەسىنە الدەقاشان قايتقىسى كەلگەنىن, بىراق قايتار جولدى ۇمىتىپ قالعانىن ايتادى.
ءسويتىپ, جوعالعان بالا تابىلىپ, بارلىق تاراپ قۋانىپ قالدى. بالانىڭ تۋىستارى پوليتسياعا الەۋمەتتىك جەلىلەر ارقىلى العىستارىن جەتكىزدى.
پەتروپاۆل
