ەگەر وقىرمان ەسىندە بولسا, ماۋسىم ايىنىڭ سوڭىنداعى ءدارى-دارمەكتەر تاپشىلىعىنا بايلانىستى الماتى اكىمى باقىتجان ساعىنتاەۆتىڭ شەشىمىمەن ىندەتكە قارسى پرەپاراتتاردى كوتەرە ساتىپ الۋدى قارجىلاندىرۋ ءۇشىن پايىزسىز 5 ملرد تەڭگە بولىنگەن ەدى. بۇدان باسقا, كوۆيدتى ستاتسيونارلاردى ءدارى-دارمەك پرەپاراتتارىمەن قامتاماسىز ەتۋ ماقساتىندا رەزەرۆتىك قور قۇرۋ ءۇشىن تاعى 5 ملرد تەڭگە ءبولىندى. قازىرگى كەزدە پرەپاراتتاردىڭ جارتىجىلدىق قورىن جاساۋدا جانتالاس جۇمىستار ءجۇرىپ جاتىر دەسەك تە بولادى.
دەليدەن جەتكىزىلگەن ءدارى-دارمەكتەردە لەگىندە ەناكسوپارين, گەپارين, قابىنۋعا, باكتەريالارعا قارسى – وفلوكساتسين, پرەدنيزالون, دەكسامەتازون, تسەفترياكسون, مەروپەنەم, پاراتسەتامول, ۆيرۋسقا قارسى – وسەلتاميۆير بار.
"وتكەن جۇمادان باستاپ ءدارى-دارمەكتەرگە دەگەن سۇرانىستىڭ تومەندەگەنى, ۇزاق كەزەكتىڭ ازايعانى بايقالادى. جالپى, جاعداي وڭالىپ كەلەدى. تۇراقتىلىق قورى ارقىلى دارىحانالارعا پرەپاراتتاردى جەتكىزۋمەن قاتار, ءبىز كوۆيدتى گوسپيتالدەردى ءدارى-دارمەكتەرمەن جەدەل قامتاماسىز ەتۋ ءۇشىن رەزەرۆتىك قوردى جاساپ جاتىرمىز. ءدارى-دارمەكتەردىڭ جارتىجىلدىق قورى فارماتسەپتيكالىق كومپانيالاردىڭ قويمالارىندا ساقتالادى, قاجەت بولعان كەزدە بۇل پرەپاراتتار ستاتسيونارلارعا بولىنەدى", – دەيدى الماتى اكىمدىگىنىڭ قالانى ءدارى-دارمەك پرەپاراتتارىمەن قامتاماسىز ەتۋ جونىندەگى ۇيلەستىرۋشىسى زاڭعار سالىمباەۆ.
ونىڭ كەلتىرگەن مالىمەتتەرى بويىنشا, الماتىعا 23 شىلدەدە تۇركيادان "كلەكسان" پرەپاراتى جەتكىزىلەدى. جەتكىزۋشى بۇل پرەپاراتتىڭ شامامەن 40 مىڭ بىرلىگىن اكەلەتىن بولادى. 31 شىلدەگە دەيىن قوسىمشا تاعى 150 مىڭ بىرلىكتەگى كلەكسان جەتكىزۋ جوسپارلانعان. جالپى, الداعى اپتادا 300 مىڭعا جۋىق انتيكوگۋليانت تاسىمالدانادى.
بۇل – قالاعا 10 شىلدەدەن باستاپ قاجەتتى ءدارى-دارمەكتەردى جەتكىزگەن جەتىنشى رەيس. شىلدەنىڭ سوڭىنا دەيىن تاعى ەكى رەيس كەلەدى دەپ كۇتىلۋدە. قالاعا جەتكىزىلگەن ءدارى-دارمەكتەردىڭ جالپى كولەمى شامامەن 7,5 ملن قاپتاما. كەدەندىك راسىمدەۋدەن سوڭ پرەپاراتتار قالا ءدارىحانالارىنا بولىنەتىن بولادى.
قالا اكىمدىگى تاراپىنان ءدارى-دارمەك جۇكتەرىنىڭ جەدەل راسىمدەلۋى ءۇشىن پارمەندى شارالار جۇزەگە اسۋدا. مكد-ءنىڭ الماتى قالاسى بويىنشا "جەتىسۋ" كەدەن پوستىسىنىڭ باسشىسى تالعات جاڭبىرباەۆ ءوزىنىڭ سوزىندە ەلىمىزگە كەلىپ جەتكەن مەديتسينالىق زاتتارى بار گۋمانيتارلىق جانە كوممەرتسيالىق جۇكتەردى راسىمدەۋ ۋاقىتىنىڭ ەداۋىر قىسقارعانىن اتاپ ءوتتى.
"گۋمانيتارلىق جۇكتەر كەدەندىك تولەمدەرسىز, تەز ارادا راسىمدەلۋدە. راسىمدەۋ ۋاقىتى 5-10 مينۋت. فارمكومپانيالاردىڭ كوممەرتسيالىق پارتيالارىن راسىمدەۋگە 10-20 مينۋت كەتەدى. ايتا كەتەرلىگى, ءبىز قازىر تاۋلىكتىك جۇمىس رەجيمىنە كوشتىك. بۇرىن تۇندە كەلگەن جۇك تاڭەرتەڭگىسىن راسىمدەلەتىن. ءبىز قازىر كەلگەن جۇكتى دەر كەزىندە راسىمدەپ, كۇندىز دە, تۇندە دە دامىل تاپپاي, جۇمىس جاساۋدامىز. ءبىز ۇنەمى بايلانىستامىز, ويتكەنى ومىرلىك ماڭىزى بار جۇك ءبىر مينۋتقا دا كەشىكپەۋى ءتيىس", – دەيدى تالعات جاڭبىرباەۆ.
الماتى
