بۇل يگى ءىستىڭ باستاۋىندا اۋداندىق جاستار رەسۋرستىق ورتالىعىنىڭ كوروناۆيرۋسپەن اۋىراتىندارعا كومەك كورسەتۋ بويىنشا كوتەرگەن چەللەندجى تۇردى.
جاستاردىڭ باستاماسىن اۋدان حالقىنىڭ بەلسەندى تۇردە قولداعانىن ايتا كەتكەن ءلازىم. مىسالى, وتكەن جۇمادا اۋدانداعى ەراليەۆ اۋىلىنىڭ تۇرعىندارى كەنشىلەر استاناسىنداعى ءتورت اۋرۋحاناعا 1 توننا قىمىز بەن 200 كيلو قۇرت جەتكىزدى. وسىنشاما مولشەردەگى قىمىزدى اۋىل تۇرعىندارى ءبىر كۇننىڭ ىشىندە جيناعان ەكەن. بۇل يگى ءىستى ۇيىمداستىرۋدىڭ باسى-قاسىندا ەراليەۆ اۋىلىنىڭ تۇرعىنى ەرلان ءتۇسىپوۆ ءجۇرىپتى.
"قازاق قىمىزىنىڭ مىڭداعان اۋرۋعا شيپا ەكەندىگى ەجەلدەن بەلگىلى. ءبىز ناۋقاستاردىڭ اۋرۋدى جەڭۋىنە كومەك بەرگىمىز جانە كوروناۆيرۋسپەن كۇندىز جانە تۇندە كۇرەسىپ جاتقان دارىگەرلەرگە قولداۋ كورسەتكىمىز كەلدى. جاڭاارقانىڭ بال قىمىزى بارلىعىنا كۇش-قۋات بەرىپ, اۋىرعاندار تەزىرەك ەمدەلىپ شىقسا دەگەن تىلەك بار!", – دەيدى ول اعىنان اقتارىلىپ.
ال جەكە كاسىپكەر قايرات ومىربەكوۆ شيپالى سۋسىندى قاراعاندىعا تەگىن جەتكىزىپتى.
جاڭاارقا اۋدانىنىڭ جومارت تا بەلسەندى جاستارى وبلىس ورتالىعىمەن عانا شەكتەلىپ قالماي, جەزقازعان, تەمىرتاۋ, ساتباەۆ, اباي قالالارىنىڭ, سونداي-اق, نۇرا مەن جاڭاارقا اۋداندارىنىڭ اۋرۋحانالارىنا بەس توننادان استام قىمىز, ءبىر تونناعا جۋىق قۇرت, ىرىمشىك جانە ساۋمال جيناپ, جەتكىزىپ بەردى.
بۇدان بولەك, اتالعان اۋداندا قۇرباندىق شالۋ راسىمدەرى وتكىزىلىپ, ءىرى قارا مالدىڭ ەتى مۇقتاج جاندارعا تاراتىلىپ بەرىلدى. سونىمەن قاتار, اۋدانداعى اۋرۋحانالارعا تۇرعىندار اتىنان ىستىق تاماق جەتكىزىلدى. جاڭاارقالىقتار بۇل جاقسى ىستەردىڭ الداعى ۋاقىتتا دا جالعاسىن تاباتىنىنا بەك سەنىمدى.
قاراعاندى وبلىسى
