ايماقتار • 22 شىلدە، 2020

اۋعانستاندىق تۇلەكتەر قارمتۋ-دىڭ ديپلومىن الدى

21 رەت كورسەتىلدى

كەزىندە ەلباسى جوعارى ءبىلىم العان قاراعاندى مەملەكەتتىك تەحنيكالىق ۋنيۆەرسيتەتىن اۋعانستاننان كەلىپ وقىعان 13 ازامات ءتامامداپ، قولدارىنا كۇرەكتەي ديپلوم الدى، – دەپ حابارلايدى Egemen.kz اتالعان جوو-نىڭ ءباسپاسوز ورتالىعىنا سىلتەمە جاساپ.

ۇكىمەتارالىق كەلىسىمنىڭ ارقاسىندا ءبىلىم الۋعا قول جەتكىزگەن تۇلەكتەر "ەسەپتەۋ تەحنيكاسى جانە باعدارلامالىق قامتاماسىز ەتۋ"، "ينفورماتيكا"  جانە "قۇرىلىس" ءبىلىم بەرۋ باعدارلامالارى بويىنشا بولاشاق ماماندىقتارىنىڭ قىر-سىرىن يگەردى. سونىمەن بىرگە، ولاردىڭ اتالعان وقۋ ورنىنىڭ قوعامدىق جانە شىعارماشىلىق ومىرىنە بەلسەنە قاتىسقانىن دا ايتا كەتكەن ءجون.

اۋعانستاندىق جاستار IT-تەحنولوگيالار، زاماناۋي ازاماتتىق كەشەندەر مەن عيماراتتار قۇرىلىسى بويىنشا تاقىرىپتارعا ارنالعان ديپلومدىق جوبالاردى ءساتتى قورعادى. ولاردىڭ ىشىندەگى بىرنەشە تۇلەك قارمتۋ-دىڭ ماگيستراتۋراسىندا، سونداي-اق كانادا مەن تۇركيانىڭ جوعارى وقۋ ورىندارىندا ءارى قاراي ءبىلىم الۋدى جوسپارلاپ وتىر.

ايتا كەتۋ كەرەك، قارمتۋ-دا شەتەلدىك ستۋدەنتتەر ءۇشىن بارلىق جاعداي جاسالعان. ولار 2014 جىلى پرەزيدەنتتىك "ستۋدەنتتىك باسپانا" باعدارلاماسى بويىنشا سالىنعان "ارمانداستار ورداسى" تۇرعىن ءۇي كەشەنىندە تۇردى. مۇندا وقۋ ءۇشىن مۋلتيمەديالىق كومپيۋتەرلىك سىنىپتار، كونفەرەنتس-زال جابدىقتالعان. فيزيوكابينەت پەن اسحانا جانە دەنساۋلىق پۋنكتى بار.

ۋنيۆەرسيتەتتىڭ حالىقارالىق ىنتىماقتاستىق ورتالىعى مەن دەكاناتتار شەتەلدىك ستۋدەنتتەرگە قاجەتتى كومەك كورسەتتى. كوشى-قون جانە جەرگىلىكتى پوليتسيا قىزمەتتەرىنىڭ وكىلدەرىمەن، دىنتانۋشىلارمەن، اۋعانستان يسلام رەسپۋبليكاسى ەلشىلىگىنىڭ قىزمەتكەرلەرىمەن كەزدەسۋلەر ۇيىمداستىرىلىپ وتىردى.

ەسكە سالساق، بيىلعى تۇلەكتەر – اۋعانستاننان كەلىپ ءبىلىم الىپ جاتقان ستۋدەنت جاستار اراسىنداعى العاشقى قارلىعاشتار.

 

 

قاراعاندى وبلىسى

 

سوڭعى جاڭالىقتار

ۇقساس جاڭالىقتار