"دوستار, سوڭعى اپتالاردا مادەنيەت, ونەر جانە سپورت سالاسى قايراتكەرلەرىنىڭ سىرقاتتانىپ قالعانى تۋرالى حابارلار بىرىنەن سوڭ ءبىرى جەتىپ جاتىر. قۋانىشقا وراي, كوبى جازىلىپ, ساۋىعىپ كەتىپ جاتىر, تەك, وكىنىشتىسى, ءبارى ەمەس. كوز جۇمعان ادامداردىڭ ىشىندە مادەنيەت, ونەر سپورت قايراتكەرلەرى دە بار. جازۋشى, اقىن, كومپوزيتور, كينورەجيسسيور, ستسەناري جازۋشىسى, تەاتر زەرتتەۋشى, عالىم, وقىتۋشى, ونەر ساڭلاقتارى... ورنى تولماس قازا, كوكىرەك تولى وكىنىش... بۇگىن قوجامياروۆ اتىنداعى مەملەكەتتىك رەسپۋبليكالىق ۇيعىر مۋزىكالىق كومەديا تەاترىنىڭ ءارتىسى زەناتگۇل اقباروۆا, مەملەكەت قايراتكەرى, پروفەسسور, جازۋشىلار وداعىنىڭ مۇشەسى مىرزاگەلدى كەمەل, ادەبيەت زەرتتەۋشىسى قادىربەك ۋاليەۆ دۇنيە سالدى. پروديۋسەر مۇرات ەرعاليەۆتەن ايىرىلعانىمىز تۋرالى دا حابار جەتتى. مادەنيەت جانە سپورت مينيسترلىگى جانە جەكە ءوز اتىمنان قايتىس بولعانداردىڭ وتباستارىنا, تۋعان-تۋىستارىنا قايعىرىپ كوڭىل ايتامىن. بەكەم بولىڭىزدار. مۇرات اعانى جاقسى تانۋشى ەدىم. مۇرات ءاجىم ۇلى بۇكىل سانالى عۇمىرىن تەلەۆيزيا سالاسىنا ارناپ, ەلىمىز ەگەمەندىككە قول جەتكىزگەن سىندارلى ساتتە ونىڭ دامۋىنا ولشەۋسىز ۇلەس قوستى. شەت مەملەكەتتەردە دە كەڭىنەن تانىمال بولعان "ازيا داۋىسى", "جاس قانات" بايقاۋلارىن جوعارى دەڭگەيدە ۇيىمداستىرىپ, جاس دارىندارعا ونەر الەمىنە جول اشتى. مۇرات ەرعاليەۆتىڭ مەيىرىمدى, پاراساتقا تولى جارقىن بەينەسى بارشا جاقىن ادامدارىنىڭ جۇرەگىندە ساقتالادى", - دەدى مينيستر.
مينيستر بۇل كۇرەستە ادامزاتتىڭ جەڭەتىنىنە سەنىمدىلىك ءبىلدىردى.
"بۇل ىندەت ەشكىمگە اياۋشىلىق بىلدىرمەيدى. بۇكىل ۇلت - مەملەكەت, دارىگەرلەر, ەرىكتىلەر, مەتسەناتتار, جاناشىر جاندار - ءبارى ادامزاتقا كەسىرىن تيگىزىپ, ادام ءومىرىن قيىپ جاتقان كوروناۆيرۋسقا قارسى كۇرەسۋ ءۇشىن بىرىگىپ وتىر. ادام ومىرىنەن اسقان قۇندىلىق جوق ەكەنى حاق. بۇل كۇرەستە ادامزاتتىڭ جەڭەتىنىنە سەنىمدىمىن! بارشاڭىزعا مىقتى دەنساۋلىق تىلەيمىن, جاقىندارىڭىزدى قورعاپ, قارىم-قاتىناستى ازايتىپ, سانيتارلىق نورمالاردى ساقتاڭىزدار دەگىم كەلەدى. سىرقاتتانىپ قالعانداردىڭ وسى سىناقتان امان-ەسەن ءوتىپ, جازىلىپ كەتۋىن تىلەيمىن. ساقتانىپ جۇرىڭىزدەرشى! ءبىز قيىندىقتى مىندەتتى تۇردە ەڭسەرەمىز", - دەپ جازدى اقتوتى رايىمقۇلوۆا.
