ايماقتار • 15 شىلدە، 2020

الماتىدا ەكى ادامدى قۇتقارعان حقو قىزمەتكەرى ماراپاتتالدى

33 رەت كورسەتىلدى

"ازاماتتارعا ارنالعان ۇكىمەت" مەملەكەتتىك كورپوراتسياسى ەكى ادامدى قۇتقارۋ كەزىندە تانىتقان باتىلدىعى مەن ەرلىگى ءۇشىن ناۋرىزباي اۋدانىنىڭ حقو مامانى ەرجان ابدىرازاقوۆتى باسقارما ءتورايىمىنىڭ العىس حاتىمەن ماراپاتتادى، دەپ حابارلايدى Egemen.kz.

سونداي-اق ەرجانعا مەملەكەتتىك كورپوراتسيانىڭ كاسىپوداق قىزمەتىنىڭ دامۋىنا قوسقان ۇلەسى ءۇشىن "ەڭبەك داڭقى" مەدالى تابىستالدى.

باسقارما ءتورايىمى مەن كاسىپوداق ۇيىمى اتىنان بەرىلگەن ەكى ماراپاتتى "ازاماتتارعا ارنالعان ۇكىمەت" مەملەكەتتىك كورپوراتسياسىنىڭ الماتى قالاسىنداعى فيليالىنىڭ ديرەكتورى دانيار قىرىقباەۆ تابىس ەتتى. ءوز اتىنان فيليال بىسشىسى ەرجان ابدىرازاقوۆقا ەستەلىك سىيلىق – قول ساعاتتى سىيعا تارتتى.

10

ەستەرىڭىزگە سالساق، 1 ماۋسىمدا الماتى قالاسىنىڭ ناۋرىزباي اۋداندىق حقو قىزمەتكەرى ەرجان ابدىرازاقوۆ ءوز ءومىرىن قاتەرگە تىگىپ، ەكى ادامدى اجالدان قۇتقارىپ قالدى. كەيىن بەلگىلى بولعانداي، ولار كارىز قۇدىقتارىنىڭ بىرىندە جوندەۋ جۇمىستارىن جۇرگىزگەن "الماتى سۋ" كومپانياسىنىڭ قىزمەتكەرلەرى بولعان. جۇمىس كەزىندە ولار گاز تۇتىنىمەن ۋلانىپ، ەسىننەن تانعان. ەرجان ابدىرازاقوۆ ولاردى قۇتقارۋ ءۇشىن قۇدىققا العاشقىلاردىڭ ءبىرى بولىپ ءتۇستى.

ك

ەكى ادامنىڭ جانىنا اراشا بولعان ەرجان اۋرۋحاناداعى ولاردىڭ ءحال-جاعدايىن ءبىلىپ قانا قويماي، ۋلانعانداردىڭ ءبىرى نۇرجان قالبايدى  اۋرۋحانادان شىعارىپ العان. زارداپ شەككەن ەكىنشى ازامات اسقار قاينازاروۆ اۋرۋحانادان شىلدە ايىنىڭ باسىندا شىعارىلدى.

"تومەنگە ءتۇسۋ كەرەك پە، جوق پا دەگەن ويىما دا كەلمەدى، ولاردى ولىمنەن امان الىپ قالۋ كەرەك. سول ساتتە ءوزىمدى ەمەس، سولاردى قۇتقارۋ عانا ويىمدا بولدى. ەكى ازاماتتىڭ دا اۋرۋحانادان شىققانىنا جانە ءدىن اماندىعىنا قۋانىشتىمىن. بۇل – مەن ءۇشىن ەڭ قىمبات سىي"، – دەيدى ەرجان.

ايتا كەتۋ كەرەك، ەرجاننىڭ ەرلىگىن ەستىگەن تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆ وعان قوڭىراۋ شالىپ، باتىلدىعى ءۇشىن جەكە العىسىن ءبىلدىردى.

"ەرجان ابدىرازاقوۆ مەملەكەتتىك كورپوراتسيادا 2007 جىلدان بەرى جۇمىس ىستەيدى. وسى ۋاقىت ارالىعىندا ول ءوز ءىسىنىڭ بىلگىر مامانى ەكەنىن بىرنەشە رەت دالەلدەدى. ءبىزدىڭ ۇجىمدا وسىنداي ادال جانە جاۋاپتى قىزمەتكەردىڭ جۇمىس ىستەيتىنىن ءبىز ماقتان تۇتامىز"، – دەدى "ازاماتتارعا ارنالعان ۇكىمەت" الماتى قالالىق فيليالىنىڭ ديرەكتورى دانيار قىرىقباەۆ.

سوڭعى جاڭالىقتار

ۇقساس جاڭالىقتار