الماتى قالاسىنىڭ حالىقارالىق اۋەجايىنا دارىلىك پرەپاراتتار تيەلگەن ەكى بىردەي ۇشاق كەلىپ قوندى. رەسەيدەن 55 توننا مەديكامەنت جەتكىزىلدى. اۋە لاينەرىمەن كەلگەن جۇك قۇرامىندا الەۋمەتتىك ماڭىزدى 10-نان استام پرەپارات, شامامەن 3 ملن قاپتاما, سونىڭ ىشىندە دەنە قىزۋىن تۇسىرەتىن جانە COVID-19-عا قارسى باسقا دا دارىلىك قۇرالدار بار. تىزىمدە ازيتروميتسين, تسەفتازيديم, يبۋپروفەن, فراكسيپارين, مەترونيدازول, تسەفترياكسون, گەپارين, نيمەسۋليد, لەۆوفلوكساتسين, مەروپەنەم ۇنتاعى, ەنوكساپارين-بينەرگيا جانە باسقا دا دارىلەر قامتىلعان.
مەديتسينالىق پرەپاراتتاردى ازاماتتىق اۆياتسيا كوميتەتىنىڭ ارنايى بورتتارىمەن جەدەل جەتكىزۋ – ۇكىمەتتىڭ نارىقتى ەڭ قاجەتتى دارىلەرمەن شۇعىل تولىقتىرۋ ءۇشىن جۇزەگە اسىرعان شارالارىنىڭ ءبىرى. ەندىگى جەردە نارىقتى قامتاماسىز ەتۋ ءۇشىن جانە ءدارىحانا جەلىلەرىن قاجەتتى پرەپاراتتارمەن ۇنەمى تولىقتىرىپ وتىرۋ ءۇشىن وسىنداي رەيستەر تۇراقتى تۇردە ورىندالادى.
دەنساۋلىق ساقتاۋ مينيسترلىگى تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ حابارلاۋىنشا, دارىلىك قۇرالدار مەن پرەپاراتتار دەكلاراتسيالاۋ ارقىلى ءۇش كۇن ىشىندە سەرتيفيكاتتالادى.
الماتىعا اكەلىنگەن دارىلىك پرەپاراتتاردى ءتورت ءىرى فارماتسەۆتيكالىق كومپانيا دارىحانالارعا جەتكىزۋمەن اينالىسادى. بۇل «مەدسەرۆيس پليۋس» كفك» جشس, «حيمفارم» اق, «نوبەل الماتى فارماتسەۆتيكالىق فابريكاسى» اق, INKAR جەلىلەرى. «حيمفارم» اق وكىلى:
– كومپانيا بارلىق قاجەتتى شارانى قولعا الىپ, تەك ءوز كاسىپورنىندا ءدارى ءوندىرۋ كولەمىن ۇلعايتىپ قانا قويماي, سونىمەن بىرگە رەسەيدەگى سەرىكتەستەرىمەن – ۆيرۋسقا قارسى پرەپاراتتار شىعاراتىن «اكريحين» كومپانياسىمەن بايلانىسقا شىقتى. ولار وندىرەتىن ۆيرۋسقا قارسى پرەپاراتتار قازاقستاندىق «حيمفارم» كومپانياسىندا شىعارىلمايدى. وسى سەرىكتەستىكتىڭ, سونداي-اق ماسكەۋدەن كولىكتىك اۋە بورتىن ۇيىمداستىرۋ ءۇشىن ەكى مەملەكەتتىڭ كورسەتكەن جەدەل قولداۋى ارقىلى قازاقستانعا «وسەلتاميۆير» پرەپاراتىنىڭ ۇلكەن پارتياسى بار رەيس كەلدى. اتالعان پرەپارات ديستريبيۋتەرلىك كومپانيالارعا دەرەۋ بەرىلىپ, ەلىمىزدىڭ ءدارىحانالارىنا جاقىن كۇندەرى جەتكىزىلەدى, – دەپ مالىمدەدى.
ءبىر اتاپ وتەرلىگى, رەسەي فەدەراتسياسىنان كەلگەن جۇكتەن وزگە, الماتىعا شىلدەنىڭ سوڭىنا دەيىن شامامەن الەۋمەتتىك ماڭىزى بار 4,2 ملن قاپتاما ءدارى-دارمەك جەتكىزىلەدى دەپ كۇتىلۋدە.
– ۇكىمەتتىڭ قولداۋىنىڭ ناتيجەسىندە ەڭ قاجەت پرەپاراتتار جەتكىزىلدى. مۇندا وتە قاجەت ءدارى-دارمەكتىڭ 13 ءتۇرى بار. ءۇندىستاننان دا جۇك كەلەدى دەپ جوسپارلانعان, – دەدى «INKAR» جشس باس ديرەكتورى ءاليا ەرىمبەتوۆا.
الماتىدا قالا اكىمى باقىتجان ساعىنتاەۆتىڭ تاپسىرماسى بويىنشا ءدارى-دارمەكتەردى ىركىلىسسىز جەتكىزۋ ءۇشىن وندىرۋشىلەرمەن, ءىرى جەتكىزۋشىلەرمەن جانە ءدارى-دارمەك ديستريبيۋتەرلەرىمەن بەلسەندى جۇمىس جۇرگىزىلۋدە. بارلىق فارمكومپانيالار 1 شىلدەدەن باستاپ دارىحانالارعا الەۋمەتتىك ماڭىزى بار 581 مىڭ دانا پرەپارات جەتكىزدى. ونىڭ ىشىندە پاراتسەتامول, اسپيرين, ينگاۆيرين, يبۋپروفەن, ازيتروميتسين جانە باسقا دارىلەر, سونىمەن قاتار تەرمومەتر بار.
ءدارى-دارمەككە دەگەن سۇرانىس ارتقان كەزدە قالا اكىمدىگى, جەتكىزۋشىلەر مەن ءدارىحانالار جەلىسى ءوزارا كەلىسىمگە قول قويىپ, ناتيجەسىندە الەۋمەتتىك ماڭىزى بار ءدارى-دارمەكتىڭ 41 ءتۇرى دەرەۋ جەتكىزىلەتىن 105 ءدارىحانا ناقتىلانعان بولاتىن. ءدارى-دارمەك جەتكىزۋ, باعاسىن كوتەرمەۋ جانە ءبىر قولعا ءۇش قاپتامادان ارتىق ءدارى بەرمەۋ ءتارتىبى رەتكە كەلتىرىلۋدە. سونىمەن قاتار اتالعان 105 ءدارىحانادا دارىلەردىڭ ءوتۋ پروتسەسىنە, ولاردىڭ 10 ءتۇرىنىڭ جانە تەرمومەترلەردىڭ قانشا قالعانىنا كۇن سايىن مونيتورينگ جۇرگىزىلەدى.
قالا اكىمى ب.ساعىنتاەۆ الماتىدا ءدارى-دارمەكتىڭ تۇراقتى قورىن قۇرۋ ءۇشىن 5 ملرد تەڭگە بولىنگەنىن حابارلادى. بۇل قارجى جەتكىزۋشىلەردىڭ اعىمداعى باعامەن 6-8 ايعا جەتەتىن ءدارى-دارمەك ساتىپ الۋىنا جانە ونى حالىققا قولجەتىمدى باعامەن وتكىزۋىنە باعىتتالۋدا.
الماتى
