ايماقتار • 15 شىلدە، 2020

بار مەن جوقتىڭ اراسى...

29 رەت كورسەتىلدى

سوڭعى كۇندەرى الماتىدا ونلاين-بريفينگتەردىڭ بارلىعى دەرلىك قالانى قاجەتتى ءدارى-دارمەكپەن قامتاماسىز ەتۋگە قاتىستى بولدى. قالا اكىمىنىڭ جۋرناليستەرمەن قاشىقتان وتكىزگەن جيىنى دا ءدال وسى ماسەلەگە ارنالدى.

وسىعان دەيىن حابارلانعانداي، قازاقستانعا دارىلىك پرەپاراتتارىمەن 3 بورت كەلگەن ەدى. الماتى قوسىمشا تاعى 3 ملن-نان استام ءدارى كۇتىپ وتىر، ونىڭ ىشىندە دەنە قىزۋىن تۇسىرەتىن پرەپاراتتار، انتيكواگۋليانتتار جانە انتيبيوتيكتەر بار.

سونىمەن، دۇيسەنبى كۇنى كەزەكتى رەت الماتى بيلىگى شاھاردا قاجەتتى پرەپاراتتار جەتكىلىكتى ەكەنىن رەسمي تۇردە مالىمدەدى. الايدا الەۋمەتتىك جەلىدە كوپتەگەن ءدارى-دارمەكتىڭ ءالى دە قات ەكەندىگى تۋرالى اقپاراتتار كەزىپ ءجۇر. ال الماتى قالاسى اكىمىنىڭ ورىنباسارى ساپاربەك تۇياقباەۆتىڭ ايتۋىنشا، كوپشىلىك ىندەتتىڭ ور­شۋى­نەن قورقىپ وتىر. سوندىقتان بۇل دۇربەلەڭ تۋعىزىپ، جۇرت دارىلەردى جاپ­پاي ساتىپ الىپ جاتىر. ونىڭ ايتۋىنشا، قازىر قالادا 185 مىڭ دانا پاراتسە­تا­مول بار. 16 شىلدەدەن باستاپ ايدىڭ سوڭىنا دەيىن 2،2 ملن دانا تاعى كەلۋى ءتيىس. بۇعان قوسىمشا ارنايى قور تاعى 3 ملن قاپتامامەن قامتاماسىز ەتىل­مەك.

– بۇل ءۇشىن ەلدى دۇرلىكتىرۋدىڭ قا­جەتى جوق. وكىنىشكە قاراي ءالى دە الەۋ­مەتتىك جەلىلەردە حايپ جاساپ وتىر­عان ادامدار بار. قالاداعى الەۋ­مەت­تىك ماڭىزى بار 10 ءدارىحانانى ءدارى-دار­مەك­پەن قامتاماسىز ەتۋدى شەكتەپ وتىر­عان جوقپىز. بارىنە بەرىپ جاتىر­مىز. ءبىز بۇل ءىستى ۇيىمداستىرۋعا كەز كەلگ­ەن ۋاقىتتا ىقپال ەتە الامىز، – دەيدى س.تۇياقباەۆ.

اكىم ورىنباسارى باسقا دا دارى­حا­نالارعا وزدەرىن قاجەتتى پرەپاراتتارمەن تولىقتىرىپ وتىرۋ ءۇشىن اكىمدىككە حابارلاسۋ قاجەتتىگىن ايتادى. قىسقاسى، قالا بيلىگى ءدارى-دار­مەك تاپشىلىعىن جويۋدىڭ بارلىق تەتىك­تە­رىن قاراستىراتىنىن العا تارتىپ وتىر.

– ەگەر كىمدە-كىم جاي عانا حايپ جا­­سا­عىسى كەلسە – ءوز شارۋاسى. ءبىز بۇكىل ينفرا­قۇ­رىلىمدى دايىنداپ وتىرمىز. ءالى كۇنگە دەيىن ء«دارى-دارمەك جەتىسپەي جاتىر، كورسەتىلىپ جاتقان ساندار دۇرىس ەمەس» دەپ بايبالام سالۋ – بۇل ەندى شەكتەن اسقاندىق. بارلىق اقپاراتتى ءبىز مالىمدەۋگە دە، دالەلدەۋگە دە دا­يىن­بىز، – دەيدى س.تۇياقباەۆ.

ونىڭ ايتۋىنشا، 2 اپتا بۇرىن پاندەمياعا بايلانىستى جەكەلەگەن دارىلەرگە سۇرانىس ەداۋىر ءوسىپ كەت­كەن. «پاراتسەتامولدى قالانىڭ جال­پى تۇتىنۋى مامىر ايىندا 50 مىڭ بولسا، سوڭعى ەكى اپتادا كۇنىنە 100 مىڭ ساتىلدى. بۇرىن جىل بويى تەر­مو­مەتردىڭ 100 مىڭى ساۋدالانسا، 2-3 كۇندە 50 مىڭ تەرمومەتر ساتىلىپ كەتكەن. سوندىقتان سۇرانىستىڭ وسۋىنە بايلانىستى دا تاپشىلىق تۋىنداپ وتىر. قازىر ماسەلەنى تۇراقتاندىرۋ ءۇشىن كۇنىنە 2 رەت مونيتورينگ جاساپ وتىرمىز. باستاپقىدا ءدارىحانالاردىڭ ينفراقۇرىلىمى سۇرانىسقا دا­يىن ەمەس بولاتىن. ماسەلە شەشىلدى. سوڭعى ءبىر اپتادا ۇلكەن دۇرلىگۋ جوق»، دەپ سەندىردى ول.

اكىمنىڭ ورىنباسارى قازىر ءدارىحا­نا­لاردا 6 مىڭ تەرمومەتر بار ەكەنىن ايتادى. 1 شىلدەدەن باستاپ الماتى ءدارى­حانالارىنا 900 مىڭعا جۋىق ءدارى جەت­كىزىلگەن.

«ودان بولەك كۇندەلىكتى بۇكىل كومپانيالاردا، ءدارىحانالار قويماسىندا دا ءدارىنىڭ بىزدەگى قورىنا مونيتورينگ جاساپ وتىرمىز. 846 مىڭ دانا ءدارى بار. 1 اي كولەمىندە كەرەكتى پرەپاراتتاردىڭ 3 ملن 685 قاپتاماسى كەلۋى ءتيىس. پارا­تسە­تامولدىڭ 185 مىڭ داناسى بار. 16 شىل­دەدەن باستاپ اي سوڭىنا دەيىن 2،2 ملن قاپتاماسى كەلەدى. سوندىقتان كەيبىر ازاماتتاردىڭ ءدارى جوق دەپ دابىل قاققانى شىندىققا سايكەسپەيدى»، دەدى س.تۇياقباەۆ.

سونىمەن قاتار الماتىدا فار­ما­تسەۆتيكالىق ءوندىرىس پەن جەكە قور­عا­نىس قۇرالدارى ءوندىرىسى بويىنشا بىرنەشە جوبا قولعا الىنباق.

«وندىرىسكە كەلەر بولساق، فارما­تسەۆ­تيكالىق ءوندىرىس پەن جەكە قور­عا­نىس قۇرالدارى ءوندىرىسى بويىنشا بىرنەشە جوبانى قاراستىرىپ جاتىرمىز. فارماتسەۆتيكالىق ءوندى­رىس بىردەن قۇرىلا قويمايتىنى بەل­گى­لى. بىراق بۇل ماسەلەنى جۇيەلى تۇردە شەشۋگە بولاتىنىن تۇسىندىك. «الا­تاۋ» ارنايى ەكونوميكالىق ايما­­عىن­دا مەديتسينالىق بۇيىمدار شى­عا­راتىن كلاستەر جاساۋ تۋرالى شە­شىم قابىلداندى. 2044 جىلعا دەيىن جە­ڭىل­دىك قاراستىرىلماق. ينفرا­قۇرىلىم دايىن. قازىر 4 جوبا قاراستىرىلىپ جاتىر. 2 جوبا باستال­عا­لى تۇر. اتاپ ايتقاندا، ماتاعا جات­پايتىن ماتە­­ر­ي­ال ءوندىرىسى. بۇل بار­لىق جەكە قور­عا­نىس قۇرالدارى – ماسكا، وباعا قارسى كوستيۋمدەر ءوندى­رى­سى. ەگەر ءبىز وسى ءوندى­رى­ستى جولعا قوي­ساق، يمپورتقا تاۋەل­دى بولمايمىز. جوبانى جىل سوڭى­نا دەيىن اياقتاۋ جوسپارلانعان»، دەدى س.تۇياقباەۆ.

ال فارماتسەۆتيكالىق قىزمەتتى قول­­داۋ جانە دامىتۋ قاۋىم­داس­تى­عى­نىڭ پرەزيدەنتى مارينا دۋرمانوۆا دەن­ساۋ­لىق ساقتاۋ مينيسترلىگىنىڭ №104 بۇي­رى­عىنا سايكەس، ءدارىنىڭ شەك­تى باعاسى بەل­گىلەنگەنىن ايتادى.

«بىزدە ءدارى باعاسىن مەملەكەت رەت­تەيدى. سوندىقتان ءاربىر ءوزىن قۇر­مەت­تەي­تىن بيزنەسمەن وسى شەكتى باعادان اسىپ كەتپەيدى. ويتكەنى ءبىرىنشى مارتە وعان ۇلكەن كولەمدە ايىپپۇل سالى­نا­دى. ەكىنشى رەت كاسىپورىننىڭ جۇ­مى­­سى 6 ايعا توقتاتىلۋى مۇمكىن. بيز­نەس جابىلدى دەپ ساناۋعا دا بولا­دى»، دەيدى م.دۋرمانوۆا. ونىڭ ايتۋىنشا، ءدارىحانالار تاراپىنان زاڭ­بۇزۋ­شى­لىق تىركەلمەگەن.

«بىزدە شەكتى باعا بار. مىسالى، پاراتسەتامول بۇرىن 70-80 تەڭگە بولعان. شەكتى باعاسى – 128 تەڭگە. ودان قىمبات بولۋى مۇمكىن ەمەس. ءدارىحانالاردىڭ بىرەۋى دە بۇل باعانى كوتەرگەن ەمەس. باعانى كوتەرۋ تۋرالى اڭگىمە بولدى. بىراق باعا قىمباتتامادى»، دەدى ول.

ال قالا اكىمىنىڭ ورىنباسارى قالا دارى­حانالارىنداعى باعانى ارنايى كو­ميس­سيا باقىلاۋدا ۇستاپ وتىرعانىن ايتتى. «باعا كوتەرۋ بويىنشا ءبىر دە ءبىر دەرەك كەزدەسپەدى. ءبىز قاتاڭ باقى­لاۋعا الماس بۇرىن بىرەۋلەر 3 پارا­تسەتامول ورنىنا 100 قاپتاما ساتىپ الىپ وتىرعان. سوسىن ونى ينتەرنەت ارقىلى ساتىپ وتىرعان. بۇل دەرەك­تەر­دى ءبىز پوليتسياعا بەردىك. 11 دەرەك انىق­تال­دى»، دەدى س.تۇياقباەۆ.

 

الماتى

 

سوڭعى جاڭالىقتار

قحل: ۆيزا بەرمەي جاتىر

حوككەي • بۇگىن، 15:18

COVID-19 ادامنان يتكە جۇققان

كوروناۆيرۋس • بۇگىن، 14:15

قيىن كەزەڭ ارتتا قالدى - مينيستر

قازاقستان • بۇگىن، 11:14

ۇقساس جاڭالىقتار