پاۆلودار وبلىسىنىڭ اكىمى ابىلقايىر سقاقوۆ جاڭا ورىنباساردى اپپاراتتىق كەڭەس بارىسىندا تانىستىردى. ول ايزادا قۇرمانوۆا الەۋمەتتىك سالا جانە مەملەكەتتىك باسقارۋ ماسەلەلەرىن جاقسى بىلەدى, سونداي-اق اتقارۋشى جانە وكىلەتتى ورگانداردا باسشىلىق لاۋازىمداردا مول تاجىريبەگە يە ەكەنىن اتاپ ءوتتى.
ايزادا قۇرمانوۆا 1970 جىلى جەلەزين اۋدانىنىڭ اباي اۋىلىندا دۇنيەگە كەلگەن. 1992 جىلى پاۆلودار پەداگوگيكالىق ينستيتۋتىن, ال 2015 جىلى س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ ماگيستراتۋراسىن "مەملەكەتتىك جەرگىلىكتى باسقارۋ" ماماندىعى بويىنشا تامامداعان.
ەڭبەك جولىن 1992 جىلى ماي اۋدانىنداعى اقشيمان ورتا مەكتەبىنىڭ ورىس ءتىلى مەن ادەبيەتى مۇعالىمى بولىپ باستاعان. التى جىل بويى ديرەكتوردىڭ تاربيە ءىسى جونىندەگى ورىنباسارى, سودان كەيىن سول وقۋ ورنىنىڭ ديرەكتورى بولدى. 1998-2002 جىلدارى ەكىباستۇز قالاسىنداعى № 10 ورتا مەكتەپتە مۇعالىم جانە ديرەكتوردىڭ تاربيە ءىسى جونىندەگى ورىنباسارى بولدى.
2002 جىلى مەملەكەتتىك قىزمەتكە اۋىستى. ەكىباستۇز قالاسىنىڭ ىشكى ساياسات ءبولىمىنىڭ باستىعى, ەكىباستۇز قالاسى اكىمىنىڭ ورىنباسارى جانە پاۆلودار وبلىسى ىشكى ساياسات باسقارماسىنىڭ باستىعى قىزمەتتەرىن اتقاردى.
2011 جىلدان 2014 جىلعا دەيىن لەبياجى اۋدانىنىڭ اكىمى بولدى. 2014 جىلدان باستاپ 2016 جىلعا دەيىن - "Nur Otan" پارتياسى پاۆلودار وبلىستىق فيليالى توراعاسىنىڭ ءبىرىنشى ورىنباسارى.
2016 جىلعى ناۋرىزدان وسى ۋاقىتقا دەيىن قازاقستان رەسپۋبليكاسى پارلامەنتى ءماجىلىسىنىڭ دەپۋتاتى, ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى بولدى.
