تاراز قالاسىندا ءدارى تاپشىلىعىن بولدىرماۋ ماقساتىندا بەرىلگەن تاپسىرماعا وراي, قالا اكىمىنىڭ ورىنباسارى الماس سادۋباەۆ جانە پروكۋراتۋرانىڭ, سىبايلاس جەمقورلىققا قارسى ءىس-قيمىل اگەنتتىگى دەپارتامەنتىنىڭ, پوليتسيا, سانەپيدقاداعالاۋ قىزمەتكەرلەرىنىڭ وكىلدەرىنەن قۇرالعان جۇمىسشى توپ قالاداعى ءدارىحانالاردى ارالاپ, زەردەلەۋ جۇمىستارىن جۇرگىزدى. ءدارىحانالاردا بۇگىنگى تاڭدا تۇرعىندارعا اسا قاجەتتى ۆيرۋسقا قارسى تاپشى ءدارى-دارمەكتەردىڭ باعاسىن كوتەرمەۋ, تاپشىلىقتى قولدان جاساپ, جاسىرماۋ تۋرالى ءتۇسىندىرۋ جۇمىستارى جۇرگىزىلدى. بۇگىنگى تاڭدا قالا ءدارىحانالارىندا انتيبيوتيكالىق, جۇرەك-قان تامىرلارىن شيراتاتىن تسەفيم, تسەفامەد, سۋمامەد, ازيتروميتسين, ازيترو, اسپيرين كارديو, ارديوماگنيل جانە ترومبولول سياقتى ءدارى-دارمەكتەردىڭ جەتىسپەۋشىلىگى بايقالادى. دارىلەردىڭ باعاسىن نەگىزسىز كوتەرگەن دارىحانالارعا اكىمشىلىك شارالار قولدانىلاتىن بولادى. قازىرگى تاڭدا تاراز قالاسىندا باعانى نەگىزسىز كوتەرگەن 10 ءدارىحانا انىقتالىپ, ولارعا قۇقىق قورعاۋ ورگاندارى ماماندارىمەن حاتتاما تولتىرىلعان.
جامبىل وبلىسى
