كەزىندە ماڭعىستاۋلىق يحتيولوگ زۇلقاش بايمىرزاەۆ كاسپيگە اكەلىپ جەرسىندىرگەن كەفالدىڭ ءوزى برەندكە اينالعان ەدى. الايدا ءبىر كەزدەرى بالىق شارۋاشىلىعى دۇركىرەپ تۇرعان اقكەتىكتە بۇگىندە ءوندىرىس باسەڭدەپ, بالىق اۋلاۋ, ونى تازارتۋ, دايىنداۋ, كونسەرۆىلەۋ تۋرالى ەستەلىكتەر عانا ايتىلادى.
دەگەنمەن ءۇمىت وتى قايتا جانعانداي. قۇرىق پورتىنان 20 شاقىرىم وڭتۇستىكتە قولعا الىنعان تىڭ باستاما تەڭىزگە تەلمىرگەن تۇرعىنداردى جەرگىلىكتى ونىممەن قامتاماسىز ەتۋدى كوزدەيدى. اۋىل شارۋاشىلىعى مينيسترلىگى, ماڭعىستاۋ وبلىسىنىڭ اكىمدىگى, بالىق شارۋاشىلىعى كوميتەتى, «كاسپي» اكك» اق قولداۋىمەن جۇزەگە اسىپ جاتقان جوبانىڭ الەۋەتى زور.
2025 جىلدىڭ سوڭعى ايلارىندا «Organic Fish» كومپانياسى وڭىردە, جالپى ەلىمىزدىڭ تاريحىندا تۇڭعىش رەت تەڭىز اكۆامادەنيەتىن دامىتۋدى قولعا الدى. كاسپي تەڭىزىنىڭ اكۆاتورياسىنداعى ارنايى تور قورشاۋلارعا البىرت تۇقىمداس بالىقتاردىڭ العاشقى پارتياسىن سۋعا ءتۇسىردى.
قازىردە جوبا بەلسەندى كەزەڭگە ءوتتى. مامانداردىڭ ايتۋىنشا, شاباقتار اشىق تەڭىز جاعدايىنا ءساتتى بەيىمدەلىپ, تۇراقتى ءوسىم كورسەتىپ وتىر. باستاپقىدا ورتاشا سالماعى شامامەن 200 گرامم بولعان بالىقتار قازىر 300–350 گرامعا دەيىن جەتتى. قىسقا ۋاقىتتا بيوماسسا 50 پايىزدان استام ۇلعايىپ, بۇگىندە تور قورشاۋلارداعى بالىقتىڭ جالپى سالماعى 20 توننادان استى.
بالىق وسىرۋگە بۇل اۋماق كەزدەيسوق تاڭدالماعان. تابيعي سۋ الماسۋ ۇدەرىسى, تەڭىز اعىستارى, تابيعي تەمپەراتۋرالىق رەجىمى سۋ جاندىكتەرىنىڭ ءوسىپ-جەتىلۋىنە وتە قولايلى. جوبا تابيعي رەسۋرستاردى جاۋاپكەرشىلىكپەن پايدالانۋ قاعيداتتارىنا, نورۆەگيالىق وزىق تەحنولوگيالار مەن ستاندارتتارعا نەگىزدەلگەن. وسىلايشا, تەڭىز توسىندەگى تەمىر قورشاۋلاردا البىرتتار الاڭسىز ءارى ەركىن ءوسىپ كەلەدى.
ماڭعىستاۋ وبلىسى
