سۋرەت: nazarmedia.kz
ەلەكتروندىق ەڭبەك بيرجاسىنداعى وزگەرىستەرگە قاراپ, سۇرانىس پەن ۇسىنىستىڭ قىس ايلارىندا قۇبىلۋى قالىپتى جاعداي دەپ پايىمداۋعا بولادى. بىرەر ايدا جۇمىسشى ماماندىقتار سۇرانىستىڭ جارتىسىنا جۋىعىن قۇراپ, 48,9 مىڭ (47,6%) بوس جۇمىس ورنى جاريالانعان. ناقتى كاسىپتەردىڭ ىشىندە جۇمىس بەرۋشىلەر تاراپىنان ەڭ كوپ سۇرانىسقا يە بولعان مەيىرگەر (1,9 مىڭ بوس جۇمىس ورنى), سانيتارلار مەن اۆتوموبيل جۇرگىزۋشىلەرى (ارقايسىسى 1,8 مىڭنان), ماتەماتيكا ءپانىنىڭ مۇعالىمدەرى (1,7 مىڭ) ەكەن.
سالالىق بولىنىستە سۇرانىس بارلىق بوس ورىنداردىڭ 66,4%-ىن قۇرايتىن بەس نەگىزگى سالادا شوعىرلانعان. ادەتتەگىدەي, 33 مىڭنان استام حابارلاندىرۋ جاريالانعان ءبىلىم سالاسى كوش باستاپ تۇر. بۇل دەگەنىڭىز – جالپى ساننىڭ ۇشتەن بىرگە جۋىعى وسى سالاعا تيەسىلى دەگەن ءسوز. ودان كەيىن وزگە دە قىزمەت تۇرلەرىندە – 11,4 مىڭ (11,1%), دەنساۋلىق ساقتاۋ مەن الەۋمەتتىك قىزمەت كورسەتۋ سالاسىندا 9,7 مىڭ (9,5%) بوس ورىن ورنالاسقان. سول سەكىلدى كادرلارعا جوعارى قاجەتتىلىك مەملەكەتتىك باسقارۋدا (7 مىڭ), وڭدەۋ ونەركاسىبىندە (6,9 مىڭ) تىركەلگەن.
وڭىرلىك بولىنىستە بوس ورىنداردىڭ ەڭ كوپ سانى استانا قالاسىندا (8,9 مىڭ), تۇركىستان (7,3 مىڭ), قاراعاندى (7,1 مىڭ) وبلىستارىندا, سونداي-اق الماتى قالاسىندا (6,9 مىڭ) تىركەلىپتى. جۇمىس ىزدەپ, تۇيىندەمە جاريالاعانداردىڭ قاتارىندا تۇركىستان وبلىسىنىڭ (23 مىڭ) تۇرعىندارى كوش باستاعان. سونداي-اق اتىراۋ (12,2 مىڭ), ماڭعىستاۋ (11,3 مىڭ), قىزىلوردا (10,9 مىڭ) وبلىستارىنىڭ تۇرعىندارى جوعارى بەلسەندىلىك تانىتقان. مەگاپوليستەردە دە وسىعان ۇقساس كورسەتكىشتەر بايقالعان.
جىل باسىندا جۇمىس بەرۋشىلەر ەڭ جوعارى جالاقىنى بۇرعىلاۋ جونىندەگى سۋپەرۆايزەرلەرگە (ورتا ەسەپپەن 991 مىڭ تەڭگەدەن باستاپ), ءوندىرۋشى ونەركاسىپتەگى ۋچاسكە باستىقتارىنا (876 مىڭ تەڭگەدەن باستاپ), باس گەولوگتەرگە (803 مىڭ تەڭگەدەن باستاپ) ۇسىنىپتى. جۇمىس ىزدەۋشىلەر تاراپىنان جالاقى بويىنشا ەڭ جوعارى ۇلەس جاڭا ونىمدەردى ازىرلەۋ جونىندەگى جوبا جەتەكشىلەرىنىڭ (1,3 ملن تەڭگە), جەكە سەكتورداعى كوممەرتسيالىق ديرەكتورلاردىڭ (1,2 ملن تەڭگە), ىسكە قوسۋ مەن سىناقتار جونىندەگى ينجەنەرلەردىڭ (ورتا ەسەپپەن 865 مىڭ تەڭگە) تۇيىندەمەلەرىندە بايقالعان.
