ايماقتار • 13 شىلدە، 2020

تارازدا "زاڭسىز كولىك تۇراعى" جەدەل-الدىن الۋ ءىس-شاراسى باستالدى

28 رەت كورسەتىلدى

تاراز پوليتسەيلەرى زاڭسىز كولىك تۇراقتارىنا قارسى كۇرەستى كۇشەيتۋدە. بۇل تۋرالى Polisia.kz-كە سىلتەمە جاساي وتىرىپ Egemen.kz حابارلايدى.

9 شىلدە كۇنى تاراز قالاسىندا "زاڭسىز كولىك تۇراعى" جەدەل-الدىن الۋ ءىس-شاراسى باستالدى، وعان وبلىس ورتالىعىنىڭ پوليتسيا باسقارماسى پاترۋلدىك پوليتسيا باتالونىنىڭ قىزمەتكەرلەرى مەن ەۆاكۋاتور قاتىستى.

جەدەل الدىن الۋ ءىس-شاراسىنىڭ ءبىرىنشى كۇنى پوليتسيا قىزمەتكەرلەرى كولىك كوپ جۇرەتىن جول ۋچاسكەلەرىنە، ونىڭ ىشىندە باۋىرجان مومىش ۇلى كوشەسىندەگى "قايقارمەت" بازارىنىڭ جانە "ديانا" ساۋدا ورتالىعىنىڭ جانىندا، قازىبەك بي كوشەسىنىڭ بويىنداعى "تسەنترالنىي" گاسترونومىنىڭ الدىنداعى جول ۋچاسكەلەرىنە نازار اۋداردى. – قالا تۇرعىندارى كوبىنەسە الەۋمەتتىك جەلىلەردە وسى ۋچاسكەلەردە زاڭسىز قويىلعان كولىكتىڭ سالدارىنان كولىك كەپتەلىسى مەن جولدىڭ تار بولۋىنا شاعىمدانادى، – دەپ اتاپ ءوتتى تاراز قالاسى پوليتسيا باسقارماسىنىڭ باستىعى اسىلحان زاۋربەكوۆ.

سونداي-اق قۇقىق قورعاۋ قىزمەتكەرلەرى كوپ قاباتتى ۇيلەردىڭ اۋلالارىنداعى گۇلزارلارعا، بالالار مەن سپورت الاڭدارىنا، باسقا دا ينفراقۇرىلىم نىساندارىنا كولىكتەردى زاڭسىز قويۋ دەرەكتەرىن تەكسەردى.

ناتيجەسىندە، ءبىر تاۋلىك ىشىندە قر اقبتك-ءنىڭ 597-بابى "اۆتوكولىك قۇرالدارىن توقتاتۋ نەمەسە تۇرۋ ەرەجەلەرىن بۇزۋ" بويىنشا 30 ادام اكىمشىلىك جاۋاپكەرشىلىككە تارتىلدى. جالپى، اعىمداعى جىلدىڭ التى ايىندا اتالعان باپ بويىنشا وبلىستا 514 بۇزۋشىلىق انىقتالدى. "زاڭسىز كولىك تۇراعى" جەدەل-الدىن الۋ ءىس-شاراسى جالعاسىپ جاتىر.


سوڭعى جاڭالىقتار

ۇقساس جاڭالىقتار