ايماقتار • 12 شىلدە، 2020

اۋرۋحاناعا كاسىپكەرلەر كومەك بەردى

251 رەت كورسەتىلدى

جۋىردا قىزىلوردا قالاسىنىڭ اكىمى نۇرلىبەك نالىباەۆ وبلىستىق جۇقپالى اۋرۋلار اۋرۋحاناسىنىڭ دارىگەرلەرىمەن كەزدەسىپ، ەمدەۋ مەكەمەسىنىڭ ماسەلەسىمەن تانىسقان ەدى. شاھار باسشىسى وسى كەزدەسۋدەن كەيىن شۇعىل تۇردە ناۋقاستارعا قاجەتتى وتتەگى كونتسەنتراتورىن الىپ بەرۋگە كاسىپكەرلەردى جۇمىلدىردى، دەپ حابارلايدى Egemen.kz.   

ماسەلە ءبىر كۇننىڭ ىشىندە شەشىلىپ، «ولجاس» جشس ديرەكتورى               تالعات جۇماتوۆ اۋرۋحاناعا 1 ملن 700 مىڭ تەڭگە تۇراتىن وتتەگى كونتسەنتراتورىن تارتۋ ەتتى. سونىمەن قاتار، 1 ملن 100 مىڭ تەڭگە بولاتىن جانار-جاعارماي تاللونىن تابىستادى.  

ال "ياسساۋي" جشس ديرەكتورى  كاحار داداشوۆ ىندەتپەن كۇرەستە ايانباي اتسالىسىپ، العى شەپتە جۇرگەن اق حالاتتى ابزال جاندارعا 1 ملن تەڭگە قارجىلاي قولداۋ ءبىلدىردى. كۇندىز-ءتۇنى ايانباي ەڭبەك ەتىپ جۇرگەن 10 دارىگەرگە 100 مىڭ تەڭگەدەن ۇلەستىرىلدى.  

- ىندەتتىڭ ىرگە جايۋىنا جول بەرمەۋ بارلىعىمىزدىڭ مىندەتىمىز. وسى ورايدا اركىم قولىنان كەلگەنىن جاساپ، كەسەلمەن كۇرەسكە ۇلەس قوسۋى كەرەك دەپ ويلايمىز. ءبىزدىڭ بۇل ءىسىمىزدى باسقا دا كاسىپكەرلەر قولداسا ەكەن دەيمىز، - دەدى "ولجاس" جشس ديرەكتورى تالعات جۇماتوۆ.

ءوز كەزەگىندە جۇقپالى اۋرۋلار اۋرۋحاناسىنىڭ باس دارىگەرى اينا مۇحامبەتوۆا ۇجىمى اتىنان كۇردەلى كەزەڭدە قول ۇشىن سوزىپ جاتقان جاندارعا جانە جان-جاقتى قولداۋ جاساۋعا ىقپال ەتىپ وتىرعان ايماق باسشىسى مەن قالا اكىمىنە ريزاشىلىعىن جەتكىزدى.

سوڭعى جاڭالىقتار

ۇقساس جاڭالىقتار