مەديتسينا • 03 شىلدە، 2020

قوستانايداعى پروۆيزورلىق ستاتسيونار دارىگەرلەرى جۇمىسقا شىعۋدان باس تارتتى

580 رەت كورسەتىلدى

بۇگىن قوستاناي وبلىسىندا ىندەت جۇقتىرۋ جاعدايى بۇرىن-سوڭدى بولماعان رەكوردتىق كورسەتكىشكە جەتىپ، ءبىر كۇندە بىردەن 48 ناۋقاستان Covid-19 انىقتالدى. كۇن ساناپ اسقىنىپ بارا جاتقان كۇردەلى اھۋالعا قاراماستان، ءبىر-ەكى كۇن بۇرىن ۋاقىتشا پروۆيزورلىق ستاتسيونار قىزمەتىنە كوشكەن قالالىق اۋرۋحانانىڭ بىرنەشە دارىگەرى جۇمىسقا شىعۋدان باس تارتىپ وتىر. باستى سەبەپ – اسا قاۋىپتى ايماق سانالاتىن پروۆيزورلىق ستاتسيونارداعى قاراپايىم سانيتارلىق تالاپتاردىڭ ساقتالماۋى.

پروۆيزورلىق ستاتسيوناردا جۇمىس ىستەيتىن دارىگەر ءبىر كيگەن قورعانىش كوستيۋمدى ەكىنشى قايتارا ەشكىمگە كيۋگە بولمايدى. مۇنداي كوستيۋم قاۋىپتى سانالاتىندىقتان، ونى ورتەپ جويىپ جىبەرۋ كەرك. ىندەت جۇقتىرماۋدىڭ بۇلجىماس قاعيداسى وسىنى تالاپ ەتەدى. بىراق  2 شىلدە كۇنى كەزەكشىلىككە شىققان دارىگەرلەرگە ستاتسيونار باسشىلىعى بۇرىن كيىلگەن ەسكى قورعانىش كوستيۋمدەرىن بەرگەن. بۇل كوستيۋمدەردىڭ كەيبىرى  جىرتىلعان، باس كيىمدەرى تەر ءسىڭىپ كىرلەپ، سارعايىپ كەتكەن. ونى دارىگەرلەردەن الىنعان فوتوسۋرەتتەردەن ايقىن كورۋگە بولادى. – مۇندا وكپەسى قابىنعان، سۋىق تيگەن، قىزۋى كوتەرىلگەن، ءىشى اۋىرىپ كەلگەن ءار ءتۇرلى اۋىر ناۋقاستار جاتىر. ولاردان كورونوۆيرۋسقا ارنايى  اناليز الىنىپ، تالداۋعا جىبەرىلەدى. تالداۋ قورىتىندىسى شىققانشا، ءبىراز ۋاقىت بارلىعى وسىندا ءبىر پالاتادا بىرگە جاتادى. تالداۋ قورىتىندىسى بويىنشا Covid-19 انىقتالعان ناۋقاستار وسى جەردەن ينفەكتسيالىق بولىمگە جىبەرىلەدى. وسى ۋاقىت ارالىعىندا Covid-19 راستالعان ناۋقاستىڭ جانىنداعى ادامعا ىندەت جۇقتىرۋى مۇمكىن-اۋ دەگەن ماسەلەگە ەشكىم باس قاتىرىپ جاتقان جوق. باسشىلىق الگى كوستيۋمدەردى حيميالىق وڭدەۋدەن وتكىزدىك دەيدى. بۇل وكىنىشكە قاراي قاۋىپسىزدىك شارالارىنا قايشى كەلەدى عوي. مۇنىڭ سىرتىندا بىزدە دارىگەرلەرگە ارنالعان قورعانىش شلەمى، بەتپەردە، رەسپيراتورلار ءجيى جەتپەي قالىپ جاتادى. كەيدە جاي ماسكا تاعامىز، كەيدە بەتىمىزگە داكە وراپ الۋعا تۋرا كەلەدى.   

1

بۇل ەڭ الىدمەن ءبىزدىڭ دەنساۋلىعىمىزعا قاۋىپ توندىرەدى. ءبىز اۋىرساق، ورنىمىزعا كىم جۇمىس ىستەيدى؟ جامان ايتپاي جاقسى جوق، بۇلاي كەتە بەرسە، تاياۋ ارادى دارىگەرلەردىڭ  ىشىندە ىندەت بۇرق ەتە قالۋى مۇمكىن. بۇل ىندەت قوي. مۇلدەم تىزگىندەۋگە كەلمەيدى. ونى تىزگىندەۋ ءۇشىن اۋەلى ءوزىڭدى، اينالاڭدى قاۋىپسىزدەندىرۋ كەرەك. مەن پالاتادى جوتەلىپ، تىنىسى تارىلىپ جاتقان ناۋقاستارعا ۇنەمى قيىن بولسا دا ماسقا كيىپ جاتىڭىزدار، ءجيى اۋىستىرىپ كيىڭىزدەر. ويتكەنى باسقالاردىڭ وبالىنا قالۋلارىڭىز مۇمكىن دەپ ۇنەمى ايتامىن. قازىر ادامدار كۇن سايىن كوز جۇمىپ جاتىر. ءبىز الدىڭعى شەپتە جۇرگەن سوڭ، بارلىعىن كورىپ، ءبىلىپ ءجۇرمىز.

وسىنداي جاعدايدان كەيىن، كەشە 3 دارىگەرگە جۇمىستان باس تارتۋعا تۋرا كەلدى. ونىڭ ىشىندە 1 حيرۋرگ، 1 جالپى پراكتيكا دارىگەرى جانە مەن بارمىن. بىراق ءبىز ءوز كەزەكشىلىگىمىزدى تولىق اتقارىپ شىقتىق. ويتكەنى كوزىمىز كورىپ تۇر عوي، ناۋقاستارعا ينە سالىپ، ءدارى بەرەتىن ادام جوق. مۇنىڭ سىرتىندا، ناۋقاستارعا پسيحولوگيالىق كومەك اۋاداي قاجەت. بارلىعىن قورقىنىش-ۇرەي بيلەپ العان. ەشقايسىسى ءوزىنىڭ تالداۋ قورىتىندىسىن بىلمەيدى. تالداۋ ناتيجەلەرى ۇزاق جۇرەدى. تولعان كۇر-كۇرس جوتەل. كەيبىرەۋلەر وتباسىمەن بىرگە جاتىر. وسىنىڭ ءبارىن ەل ءالى دۇرىس تۇسىنبەي جاتىر. ءوزىمىزدى ءوزىمىز قورعاماساق، وندا داۋا جوق، جاپپاي قىرىلۋ عانا قالادى، - دەدى جۇمىستان باس تارتقانداردىڭ ءبىرى -   دارىگەر-تراۆماتولوگ رومان لاۆرينەنكو.

2

دارىگەردىڭ  ايتۋىنشا، پروۆيزورلىق ستاتسيوناردا قازىر ماماندار جەتىسپەيدى. اسىرەسە، مەدبيكەلەر تاپشى. سوندىقتان كەيبىر كۇندەرى 12 ساعات بويى 1 مەدبيكە 40 ادامعا قاراعان كەزدەر بولعان. ءبىزدىڭ جۇمىستان باس تارتۋىمىزدىڭ تاعى ءبىر سەبەبى – وسى ماسەلە. ءبىزدىڭ اۋرۋحانادا قازىر بوس ورىن جوق.  مىسالى، كەشە ءبىز كەزەكشىلىككە شىققاندا، ستاتسيوناردا شامامەن 210 ادام جاتتى.  كەزەكشى دارىگەر – ەكەۋ-اقپىز. 200 ادامعا 2 ادام قالاي ەم جاسايدى؟ مۇمكىن ەمەس قوي. ارى كەتكەندە 1 دارىگەرگە 25-30 ناۋقاستان كەلۋ كەرەك.   باسشىلار دارىگەر ماماندار جوق دەيدى. ولاي بولسا، وزدەرى نەگە شىقپايدى؟ بۇگىنگىدەي اۋىر كەزەڭدە كرەسلوسىن تاستاپ، پالاتاعا شىقسا ەشتەمەسى كەتپەيدى. قازىر "ۋاتساپ" ارقىلى بۇيرىق بەرىپ قويىپ، كابينەتتە تىعىلىپ وتىراتىن ۋاقىت ەمەس.  

3

جۇمىستان باس تارتقان دارىگەرلەرگە ەمدەۋ مەكەمەسىنىڭ باسشىلىعى ءبىر ايلىق اقىسىز ەڭبەك دەمالىسىنا شىعۋعا ءوتىنىش جازۋعا نەمەسە جۇمىستان مۇلدە كەتۋگە كەڭەس بەرىپتى.

ءبىز بۇل ماسەلە جونىندە وبلىستىق دەنساۋلىق ساقتاۋ باسقارماسىنىڭ ءباسپاسوز حاتشىسى كسەنيا جىلقىباەۆاعا ساۋال جىبەرىپ ەدىك، ەشقانداي جاۋاپ بولمادى. 

قوستاناي وبلىسى

سوڭعى جاڭالىقتار

دوللار قىمباتتادى

قارجى • كەشە

ۇقساس جاڭالىقتار