وسى 1 شىلدەدەگى جاعداي بويىنشا, ۇلتتىق بانكتەگى ارنايى شوتقا 5 اي ىشىندە حالىقتان 214 ملرد تەڭگەدەن استام جارنالار مەن اۋدارىمدار كەلىپ ءتۇستى, ونىڭ 122,6 ملرد تەڭگەسى – جەڭىلدىك بەرىلگەن 15 سانات وكىلدەرى ءۇشىن اۋدارىلعان مەملەكەت جارنالارى. قازىرگى ۋاقىتتا جۇيەدە 14,5 ميلليوننان استام ازامات بار, ونىڭ ىشىندە شامامەن 11 ميلليونى – مەملەكەت ەسەبىنەن ساقتاندىرىلعاندار.
ايتا كەتەيىك, ۇكىمەت قاۋلىسىمەن شاعىن جانە ورتا بيزنەستىڭ 29 ساناتىنداعى قىزمەتكەرلەر – شامامەن 1 ملن ازامات 2020 جىلدىڭ 1 قازانىنا دەيىن جارنا تولەۋدەن بوساتىلدى. ولار كورسەتىلگەن كەزەڭگە دەيىن جالدامالى قىزمەتكەرلەر ءۇشىن اۋدارىم جاسامايدى جانە ولار ءۇشىن بورىشتىق مىندەتتەمەلەر جيناقتالمايدى. سونداي-اق قىزمەتكەرلەردىڭ ەڭبەكاقىسىنان جارنالار ۇستامايدى, بۇل رەتتە ولاردىڭ ساقتاندىرىلۋ مارتەبەسى سول قالپى قالادى. نولدىك سالىق ەسەپتىلىگىن تاپسىرۋ كەزىندە اۋدارىمدار تولەنبەگەنى ءۇشىن وسىماقىلار مەن ايىپپۇلدار دا ەسەپتەلمەيدى.
الەۋمەتتىك مەديتسينالىق ساقتاندىرۋ قورىنىڭ مەديتسينالىق قىزمەت جەتكىزۋشىلەرگە ءمامس پاكەتى بويىنشا كورسەتىلگەن مەديتسينالىق قىزمەتتەرى ءۇشىن جۇرگىزىلگەن تولەم شىعىندارىنا كەلسەك, اعىمداعى جىلدىڭ 5 ايىندا ولار الدىن الا تولەمدى ەسەپكە العاندا, 159 ملرد تەڭگەنى قۇرادى. 2019 جىلمەن سالىستىرعاندا مەديتسينالىق قىزمەتتەردى قارجىلاندىرۋ 58%-عا ارتتى. مەديتسينالىق وڭالتۋ بويىنشا – 9,6 ەسەگە جانە كونسۋلتاتسيالىق-دياگنوستيكالىق قىزمەتتەر بويىنشا – 6,5 ەسەگە ءوستى.
ءمامس جۇيەسى ەنگىزىلگەن ءبىرىنشى توقساندا مەديتسينالىق كومەكتى تۇتىنۋ كولەمى ايتارلىقتاي ۇلعايعانىن اتاپ ءوتۋ قاجەت: اۋرۋحاناعا جوسپارلى تۇردە جاتقىزۋدى 79 %-عا كوبەيتۋ ەسەبىنەن ستاتسيونارلىق كومەك – 13,4% - عا (2019 جىلدىڭ ۇقساس كەزەڭىمەن سالىستىرعاندا) ءوستى. وسى جىلعى ءبىرىنشى توقساننىڭ وزىندە 827 مىڭ پاتسيەنتكە, ونىڭ ىشىندە جوعارى تەحنولوگيالىق مەديتسينالىق قىزمەتتەردى قولدانا وتىرىپ 2302 پاتسيەنتكە, تاۋلىك بويعى ستاتسيونار جاعدايىنداعى مامانداندىرىلعان مەديتسينالىق كومەك كورسەتىلدى (2019 جىلمەن سالىستىرعاندا ءوسىم 16%-دى قۇرادى). اۋرۋحاناعا شۇعىل تۇردە ەمدەۋگە جاتقىزۋ 70%-دان 52%-عا دەيىن تومەندەدى, بۇل ەمدەۋ پروتسەسىنىڭ جانە پاتسيەنتتىڭ ساۋىعۋىنىڭ وڭ اسەرىن بايقاتادى. مەديتسينالىق وڭالتۋ شارالارى 35%-عا ارتتى.
سونىمەن قاتار, تج رەجيمى مەن ءىس-شارالارعا شەكتەۋ ەنگىزۋ ءمامس جۇيەسىندەگى مەديتسينالىق كومەكتى تۇتىنۋ كولەمىنە ايتارلىقتاي اسەر ەتتى: جوسپارلى ەمدەۋگە جاتقىزۋ 1 توقساننىڭ ورتاشا ايلىق كورسەتكىشىنەن 32%-عا, ونىڭ ىشىندە جتمق قولدانۋ - 47%-عا تومەندەدى; مەديتسينالىق وڭالتۋ – 2 ەسە, شۇعىل اۋرۋحاناعا جاتقىزۋ – 8%-عا ازايدى.
ء"بىز جەرگىلىكتى دەنساۋلىق ساقتاۋ باسقارماسىمەن تىعىز بايلانىستامىز. مەديتسينالىق مەكەمەلەر وزدەرىنە جۇگىنگەن ءاربىر تۇرعىنعا بارىنشا كومەكتەسۋگە تىرىسادى. قور تاراپىنان مەديتسينالىق قىزمەت جەتكىزۋشىلەرىمىزگە تۇرعىندارعا كورسەتكەن قىزمەتتەرىنىڭ اقىسى ۋاقىتىلى تولەنەدى جانە ولاردىڭ قىزمەتى باقىلاۋدا. ايتا كەتەيىك, قوردىڭ 1406 بايلانىس ورتالىعى تەك ءمامس جۇيەسى بويىنشا عانا ەمەس, توتەنشە جاعداي كەزىندە كوروناۆيرۋس بويىنشا جەدەل جەلى رەتىندە جاريالانعان. سوندىقتان, وتىنىشتەردى Qoldau-24/7 ءموبيلدى قوسىمشاسى ارقىلى دا قالدىرۋعا بولادى", - دەيدى الەۋمەتتىك مەديتسينالىق ساقتاندىرۋ قورىنىڭ نۇر-سۇلتان قالاسى بويىنشا فيليالى ديرەكتورىنىڭ ورىنباسارى ايناگۇل داۋلەتشينا.
Qoldau-24/7 الەۋمەتتىك مەديتسينالىق ساقتاندىرۋ قورىنىڭ ءموبيلدى قوسىمشاسىن Android سمارتفوندارىنا ارنالعان PlayMarket جانە Apple سمارتفوندارىنا ارنالعان AppStore ارقىلى جۇكتەۋگە بولادى.
