ايماقتار • 30 ماۋسىم، 2020

اكىمى وقشاۋلانعان وبلىستاعى ىندەتپەن كۇرەس ويداعىداي ما؟

182 رەت كورسەتىلدى

جۇقپالى ىندەتتىڭ تارالۋى جەتىسۋ جەرىندە دە ءورشىپ تۇر. قازىرگە دەيىن وبلىستا كوروناۆيرۋس ينفەكتسياسىن جۇقتىرعاندار سانى 700 ادامنان استى. وبلىستىق دەنساۋلىق ساقتاۋ باسقارماسىنىڭ مالىمەتىنشە، ايماقتاعى ىندەتپەن كۇرەس جۇمىسى قالىپتى ءجۇرىپ جاتىر. قازىر بارلىق ەمحانار مەن اۋرۋحانالار نەگىزگى قىزمەتىن اتقارۋدا. وڭىردەگى "جەدەل جاردەم" ستانساسى دا قالىپتى رەجيمدە جۇمىس ىستەپ تۇر ەكەن، - دەپ جازادى Egemen.kz

"بۇگىنگە دەيىن وبلىستا تۇرعىندار تاراپىنان شاعىمدانۋشىلار كوپ بولعانىمەن، اۋرۋحانالاردا ورىن تاپشىلىعى سەزىلە قويعان جوق. ادامداردىڭ ءوز دەنساۋلىعىنا الاڭداۋى ورىندى، سوندىقتان كەز كەلگەن سۇراق بويىنشا ەمدەۋشى دارىگەر مەن "جەدەل جاردەم" قىزمەتىنە حابارلاسۋشىلاردىڭ سانى ارتقانى انىق. مۇنداي جاعدايدىڭ تالدىقورعان قالاسى بويىنشا كوبەيگەنى بايقالدى. بىراق، دارىگەرلەر ءار شاعىم بويىنشا جۇمىس ىستەپ جاتىر. "جەدەل جاردەم" قىزمەتى اسا اۋىر جاعدايداعى ناۋقاستارعا ءبىرىنشى كەزەكتە كومەك كورسەتۋدە. قالا اۋرۋحانالارىندا ورىن سانى جەتكىلىكتى. ناۋقاستىڭ سيپاتىنا قاراي اۋرۋحانالارعا ءبولىپ ورنالاستىرۋ قولعا الىنعان"، دەدى بىزگە وبلىستىق دەنساۋلىق ساقتاۋ باسقارماسىنىڭ ءباسپاسوز حاتشىسى ءلايلىم اۋباكىروۆا.

الايدا، وبلىس ورتالىعىنداعى جاعداي باقىلاۋدا بولعانىمەن، 2 ملن تۇرعىنى بار وبلىستاعى احۋالدى تولىققاندى وڭ باعالاۋعا كەلمەيدى ەكەن. اسىرەسە، اۋىلدىق ءوڭىر تۇرعىندارى تاراپىنان مەديتسينا مەكەمەلەرىنە كومەك سۇراپ كەلۋشىلەر سانى ارتىپتى. مۇنداي جاعداي الماتى قالاسى ماڭىنداعى اۋدانداردا بايقالىپ وتىر ەكەن. مىسالى، ىلە، تالعار، ەڭبەكشىقازاق، قاراساي اۋداندارىنا قاراستى اۋىلداردىڭ تۇرعىندارى مامان دارىگەرلەردىڭ تاپشىلىعى مەن "جەدەل جاردەم" ستانساسىنىڭ جۇمىسىنا كوڭىلى تولمايتىنىدىعىن ايتىپ، شاعىمدانۋدا. جالپى الماتى وبلىسىنىڭ جەكەلەگەن اۋداندارىندا "جەدەل جاردەم" قىزمەتىنىڭ ءبىر بريگاداسى 10 000 تۇرعىنعا قىزمەت كورسەتۋگە ءماجبۇر ەكەن. سونداي-اق، وبلىستىڭ دەنساۋلىق ساقتاۋ سالاسىندا كادر تاپشىلىعى قاتتى سەزىلىپ وتىر. بۇعان دەيىن وبلىس اكىمىنىڭ ەسەبىندە ايماقتا 214 مامانعا سۇرانىس بار ەكەنى ماسەلە رەتىندە كوتەرىلگەن ەدى.

سوعان قاراماستان وبلىس دارىگەرلەرى دەرتپەن كۇرەستە بارلىق مۇمكىندىكتى پايدالانۋدا. ولاردىڭ قاتارىندا قاپشاعاي قالاسىنىڭ اق جەلەڭدى ابزال جاندارى دا بار. دەرەك بويىنشا، قازىرگە دەيىن قاپشاعاي قالاسىندا 170 ادام "ۆيرۋستىق پنەۆمونيا" دياگنوزىمەن اۋرۋحاناعا جاتقىزىلعان. قالاداعى اۋرۋحانىڭ تەراپيا جانە بالالار اۋرۋلارى بولىمشەلەرى قايتا جابدىقتالىپ، پروۆيزورلىق بولىمگە اينالىپ، ورىن سانى 180 توسەككە دەيىن كوبەيگەن. بارلىق پالاتالاردا وتتەگى تاسىمالدايتىن باللوندار ورناتىلعان. قالا بويىنشا 7 "جەدەل جاردەم" كولىگى تۇراقتى ءجۇرىپ تۇر. ال ىندەتپەن كۇرەس پەن حالىققا مەديتسينالىق جاردەم كورسەتۋ جۇمىستارى پانفيلوۆ اۋدانىندا دا الگوريتم بويىنشا جۇرگىزىلۋدە. ەلدى مەكەندەردە تاۋلىك بويىنا كەزەكشىلىك ۇيىمداستىرىلعان ەكەن.

"اۋدان بويىنشا 3 جەدەل توپ قۇرىلعان. ولاردىڭ نەگىزگى جۇمىسى كۇندەلىكتى مونيتورينگ جاساۋ. اۋىر جاعدايداعى ناۋقاستاردى قاراپ، الگوريتم بويىنشا قانداي تەكسەرۋلەر جاساۋ قاجەتتىگىن جانە ەمدەلۋ باعىتتارىن ايقىندايدى. اۋداندا 30 ورىندىق گوسپيتال، 20 ورىندىق پروۆيزورلىق ءبولىم جۇمىس ىستەيدى. اكىمشىك مەديتسينا قىزمەتكەرلەرىنە قولداۋ كورسەتىپ وتىر. جۇىسقا شىققان قىزمەتكەرلەردىڭ بارلىعى قوناق ۇيگە ورنالاستىردى. ولاردى تاسىمالداۋعا ارنايى كولىك بەكىتىلىپ، كۇندەلىكتى مەديتسينا كوللەدجىنىڭ 12 ستۋدەنتتەرى ۆولونتەرلىق كومەك كورسەتۋدە. ياعني، ەرىكتىلەر ناۋقاستارعا ۇيىنە تەگىن الاتىن دارىلەرىن جەتكىزىپ بەرۋ، باسقا دا قىزمەتتەرگە كومەكتەسەتىن بولادى"، دەيدى پانفيلوۆ اۋدانى اكىمىنىڭ ءباسپاسوز حاتشىسى نۇربول قاناعات.

ايتپاقشى، كوروناۆيرۋس ىندەتى وبلىس اكىمى اماندىق باتالوۆتى دا اينالىپ وتپەدى. پتر تەست ناتيجەسىندە ۆيرۋستىق ينفەكتسيا جۇقتىرعانى انىقتالعان ايماق باسشىسى قازىر تالدىقورعانداعى كوپسالالى اۋرۋحانانىڭ پروۆيزورلىق بولىمىندە وقشاۋلانعان. سونداي-اق، ىندەت جۇقتىرعان كەربۇلاق اۋدانىنىڭ اكىمى ماحاببات بيگەلديەۆ تە ءتيىستى ەم-دوم قابىلداۋدا.

"وبلىس اكىمنىڭ جاعدايى جاقسى. پروۆيزورلىق بولىمشەدە ەم قابىلداۋدا. جاقىندا اكىم اۋرۋحانانىڭ تۇتاس بولىمشەسىندە ءبىر ءوزى عانا جاتىر دەگەن سىبىس تاراعان ەدى، بۇل – جالعان. قازىر اماندىق باتالوۆ باسقا ەمدەلۋشىلەرمەن بىرگە دارىگەرلەر باقىلاۋىندا، ول جاتقان بولىمدە ون ءبىر ادام وقشاۋلانعان"،  دەيدى وبلىس اكىمىنىڭ ءباسپاسوز حاتشىسى عالىمۇرات جۇكەل.

 

الماتى وبلىسى

سوڭعى جاڭالىقتار

ىرىستى ىنتىماقتىڭ ۇيىتقىسى

ەلباسى • بۇگىن، 01:03

ينۆەستيتسيا ءۇشىن تارتىمدى ەل

تاۋەلسىزدىكتىڭ 30 جىلدىعى • بۇگىن، 00:38

كونە مۇرالار – حالىق قازىناسى

رۋحانيات • بۇگىن، 00:12

اتام ايتقان جارىق جۇلدىز

تاۋەلسىزدىكتىڭ 30 جىلدىعى • بۇگىن، 00:04

يراننىڭ تاڭداۋى

ساياسات • كەشە

ۇقساس جاڭالىقتار