رۋحانيات • 27 ماۋسىم، 2020

الماتىدا اۋەزوۆتىڭ قايتقان كۇنىن ەسكە الدى

233 رەت كورسەتىلدى

ۇلى جازۋشى ماڭگىلىك دامىلداپ جاتقان رايىمبەك داڭعىلى بويىنداعى ەسكى زيراتقا كەزىندە ابايدىڭ سۇيىكتى ۇلى ءابدراحماننىڭ سۇيەگى اماناتقا قويىلعانىن ەشكىم بىلە بەرمەيدى. مۇحاڭمەن بىرگە مۇندا قانىش ساتپاەۆ، شاكەن ايمانوۆ، ءىلياس وماروۆ، كۇلاش بايسەيىتوۆا، قاسىم امانجولوۆتاردىڭ دا جۇرەگى ماڭگى تىنىستاپ جاتىر، دەپ جازادى Egemen.kz

بۇگىن زامانامىزدىڭ زاڭعار جازۋشىسى دۇنيەدەن وزعانىنا 59 جىل بولدى. اۋەزوۆتىڭ جانازاسىندا ءسوز سويلەگەن عابيت مۇسىرەپوۆ: "اۋەزوۆ بىزگە ورنىن ەمەس، ارتىندا قالعان باي مۇراسىن قالدىرىپ كەتتى. اۋەزوۆتىڭ ورنىن ەشكىم باسا المايدى"، دەگەن ەكەن. 

1970 جىلداردىڭ ورتا شەنىنەن باستاپ و دۇنيەلىك بولعان قازاقتىڭ يگى جاقسىلارىنىڭ "كەڭساي" زيراتىنا جەرلەنە باستاعان كۇنىنەن باستاپ بۇل قورىم بيلىكتىڭ كوزىنەن دە، كوڭىلىنەن دە تاسا بولا باستادى. مەملەكەت تاراپىنان ءبولىنىپ جاتقان قارجىنىڭ ماردىمسىزدىعىنان زيرات كۇتىمى تۋعان-تۋىسقاندارىنىڭ موينىندا قالدى. كەيىنگى تولقىن تاريحي قۇندىلىعىن ەستەن شىعارىپ، "ورىس زيراتى" دەگەن كوزقاراستىڭ جەتەگىندە كەتە مە دەگەن قاۋىپ تە جوق ەمەس.

مۇحتار اۋەزوۆتىڭ ۇلى مۇرات اۋەزوۆ بۇل كۇنى ارتىندا قالعان ۇرپاقتارىنان باسقاسىنىڭ ەسكە الىپ، باسىنا جان بارا بەرمەيتىنىن ايتادى. حاكىم ابايدىڭ 175 جىلدىعىندا سەمەيدە – قاراۋىلدا – اباي بولسا، الماتىدا اۋەزوۆ بولۋى ءتيىس ەدى. بىراق ءىس جۇزىندە ولاي بولماي تۇر.

"قازاقتىڭ ماڭدايالدى ازاماتتارى جەرلەنگەن قورىمدى مەملەكەت ءوز قامقورلىعىنا الار كەز كەلدى: تۋىسقان ازەربايجان ەلىندە ءاربىر قوناق كەلىپ كورەتىن ەكى تاعىلىمدى قابىرستان بار: ءبىرى – شاھيتتەر قابىرستانى، ەكىنشىسى – ۇلتتىق پانتەون. ولاردىڭ ۇلتتىق مادەنيەتىنىڭ ءبىر بولشەگى رەتىندە قالىپتاسىپ كەتكەن. وسى ءۇردىستى وزبەك، تۇرىكمەن باۋىرلارىمىز دا قولعا الدى. جازۋشىلار وداعى، الماتى قالاسىنىڭ اكىمشىلىگى وسىندا جەرلەنگەن قايراتكەرلەردىڭ كارتاسىن جاساپ، ونى ايشىقتى جەرگە ورناتىپ قوياتىن كەز كەلدى. كۇنى ەرتەڭ مەملەكەتتىلىگىمىزدىڭ قالىپتاسۋىنىڭ باسى-قاسىندا جۇرگەن تۇلعالارىمىزدىڭ ناق وسى قورىمدا جەرلەنگەنى ەستەن شىعىپ، قاتارداعى زيرات ەسەبىندە قالۋى ابدەن مۇمكىن. مۇندا جەرلەۋ راسىمدەرى كۇنى بۇگىنگە دەيىن جالعاسىپ كەلەدى. كۇنى ەرتەڭ اۋەزوۆ – ساتپاەۆ، ايمانوۆتاردىڭ بەيىتىنە اپارار سوقپاق تا تەمىر قورشاۋلاردىڭ ورتاسىندا قالۋى مۇمكىن"، دەيدى.

اۋەزوۆتىڭ ارتىندا قالعان ۇرپاقتارى بۇگىن جىلداعى ءداستۇر بويىنشا جازۋشىنىڭ باسىنا باراپ، ارۋاعىنا قۇران باعىشتاپ، اكە رۋحىمەن تىلدەسىپ قايتتى. 

 

سوڭعى جاڭالىقتار

پاگانيني

ونەر • كەشە

وتىز جىلدىققا وي قورىتقان

قازاقستان • كەشە

ۇقساس جاڭالىقتار