ەڭ الدىمەن, ءلاززات رىسىمبەكقىزى ءدارى-دارمەك تۋرالى قالا تۇرعىندارى اراسىندا ازداپ دۇرلىگۋ بولىپ وتىرعانىن العا تارتىپ, وسى جاعداي جونىندە پىكىرىن ءبىلدىردى.
"بۇگىندە قالامىزدا جرۆي, پنەۆمونيا جانە تۇماۋدىڭ باسقا دا تۇرلەرىمەن اۋىرعاندار سانى كوبەيۋدە. وسى سەبەپتى حالىق رەتسەپتسىز بوساتىلعان دارىلەردى جاپپاي ساتىپ الۋدا. بۇل دۇرىس ەمەس. دارىلەردىڭ مەرزىمى مەن ساقتاۋ جولدارى بار. ەگەر ول دۇرىس ساقتالماسا, ادام اعزاسىنا كەرى اسەر ەتەدى. سوندىقتان دارىلەردى, مەيلىنشە, دارىگەردىڭ نۇسقاۋلىعىمەن ساتىپ الۋ كەرەك. وسى رەتتە قالامىزدا ءدارى تاپشىلىعى تۋرالى شاعىم تۇسپەگەنىن, الايدا ءدارىحانالاردا دارىلەردىڭ تەز تاۋسىلىپ جاتقانى تۋرالى اقپاراتتار كەلگەنىن ايتا كەتەيىن. ياعني قويمالاردا دارىلەر بار, بىراق دارىحانالارعا جەتكەن سوڭ, تەز تاۋسىلىپ قالۋدا", دەدى دەپارتامەنت باسشىسىنىڭ ورىنباسارى.
ونىڭ ايتۋىنشا, قالادا 730-داي ءدارىحانا بار. ونىڭ 60%-ى ۇلكەن, قالعانى – كىشى ءدارىحانالار. كىشى ءدارىحانالاردا دارىلەردىڭ قورى از بولادى. ال ۇلكەن كومپانيالاردىڭ ءدارى-دارمەك قورى جەتكىلىكتى. قازىرگى تاڭدا ءبىز 77 ءدارىنىڭ تۇرىنە مونيتورينگ جۇرگىزدىك. سونىڭ ىشىندە 240 مىڭ قاپتامادا (ۋپاكوۆكا) پاراتسەتامول بار ەكەنىنە كوز جەتكىزدىك. سونداي-اق دارىگەردىڭ نۇسقاۋىنسىز بەرىلەتىن وزگە دە دارىلەردىڭ جەتكىلىكتى بولىپ شىقتى.
بۇدان بولەك, ل.قاشقىنباەۆا دارىحانالارداعى باعانىڭ ءوسىپ كەتپەۋىنە مونيتورينگ جۇرگىزەتىندىكتەرىن العا تارتتى. ونىڭ ايتۋىنشا, 2019 جىلى قر دەنساۋلىق ساقتاۋ مينيسترلىگىنىڭ 104-بۇيرىعىمەن 6191 دارىلىك زاتتاردىڭ تۇرىنە شەكتەۋلى باعالار كورسەتىلگەن. ەگەر ءدارىحانا يەلەرى وسى شەكتەۋدى ەسكەرمەي, دارىلەردىڭ باعاسىن نەگىزسىز كوتەرەتىن بولسا ۇلكەن دارىحانالارعا 100 اەك, ال كىشى دارىحانالارعا 70 اەك مولشەرىندە ايىپپۇل سالىناتىنىن ەسكەرتتى.
