"قادىرمەندى جۋرناليستەر قاۋىمى! قۇرمەتتى ارىپتەستەر!
كەز كەلگەن قوعامنىڭ دامۋى, مەملەكەتتىڭ ءوسىپ-وركەندەۋى سول قوعامنىڭ ىشكى تۇراقتىلىعىنا, بەرەكە-بىرلىگىنە, ۇلتتىق قۇندىلىقتارىنىڭ ساقتالۋىنا, مەملەكەتتىك مىقتى يدەولوگياسىنا بايلانىستى. ال مۇنى قالىپتاستىراتىن, ەڭ ءبىرىنشى, عالىمدار مەن زيالىلار, اقىن-جازۋشىلار مەن جۋرناليستەر.
جۋرناليستەر – قوعامنىڭ جاناشىرى! قوعام تىرشىلىگىندەگى قىلت ەتكەن قيىندىققا ءبىرىنشى بوپ ءۇن قاتىپ, تىعىرىقتان شىعار جول ىزدەيتىن دە جۋرناليستەر قاۋىمى!
ورالحان بوكەەۆ اعامىز كەزىندە: “اقيقات ءسوزدىڭ بايگەسى - مىلتىقسىز مايدان. جابىسى قالىپ جارىمدا, سايگ ۇلىك وزعان!” دەگەن ەكەن.
بۇگىن, مىنە, سول اقپارات مايدانىندا “قارۋىم - قالام, ءورىسىم - قاعاز” دەپ, اقيقاتتىڭ اردا جۇگىن ارقالاپ جۇرگەن جۋرناليستەر قاۋىمىنىڭ كاسىبي مەرەكەسى!
ەندەشە, ءوزىمنىڭ جانە مينيسترلىك ۇجىمىنىڭ اتىنان بارشا ارىپتەستەرىمىزدى شىن جۇرەكتەن قۇتتىقتايمىن!", دەدى ايدا بالاەۆا.
سونداي-اق مينيستر جۋرناليستەرگە العىس ايتتى.
"راسىندا دا, جۋرناليستيكا - شىعارماشىلىق ءورىستى عانا ەمەس, كاسىبي ورشىلدىك پەن اسا تەرەڭ مادەنيەتتىلىكتى, جان-جاقتى بىلىمدىلىك پەن ىشكى تاربيەلىلىكتى قاتار تالاپ ەتەتىن كىرپياز ماماندىق. ويتكەنى, عۇلاما عالىممەن دە, ءبىرتۋار دارىنمەن دە, قاراپايىم قاۋىممەن دە تەڭ سويلەسىپ, تامىرىن تابۋ - ەكىنىڭ بىرىنە بۇيىرا بەرمەيتىن دارا قاسيەت. اسقاق ابىروي.
ءوز باسىم وسىنداي قاسيەت پەن ابىرويدى وتاندىق جۋرناليستيكامىزدى بۇگىنگىدەي تاماشا بيىككە كوتەرگەن مايتالمان اعا بۋىننان باستاپ وسى كۇنى اقپارات اعىنىمەن الىسقان ءاربىر ءتىلشىنىڭ بويىنان كورەمىن. كورىپ قانا قويماي, سىزدەردە بار ەرەكشە تالعامپازدىقتى سەزەمىن.
سوندىقتان دا, وسىنداي تالعامدى قوعامدا قالىپتاستىرىپ, اينالامىزعا ادال اقپارات جەتكىزۋگە اتسالىسقان اۋىر دا ابىرويلى ەڭبەكتەرىڭىز ءۇشىن رياسىز العىسىمدى جەتكىزەمىن!
قالامىمدارىڭىزدان قاسيەت كەتپەسىن! ەل يگىلىگىن تۋ ەتكەن ەڭبەگىمىزدە تابىستارعا بىرگە جەتەيىك!
سىزدەرگە زور دەنساۋلىق, وتباسىلارىڭىزعا اماندىق, باقىت پەن بەرەكە تىلەيمىن!", دەدى ايدا بالاەۆا.
