باستى پارتيانى قازاقستاننىڭ ەڭبەك سىڭىرگەن قايراتكەرى, "استانا وپەرا" جەتەكشى ءسوليسى تالعات مۇساباەۆ ورىندايدى. اتاقتى باريتوننىڭ ايتۋىنشا, كورسەتىلىم ءۇشىن "اباي" وپەراسى بەكەر تاڭدالماعان.
"بۇل سپەكتاكل "استانا وپەرا" رەپەرتۋارىندا ايتۋلى ورىنعا يە. وسىناۋ جاۋھار تۋىندىنىڭ قويىلىمى ءۇشىن تەاتر قر مەملەكەتتىك سىيلىعىن يەلەنگەنى بارشاعا ءمالىم. اتى اڭىزعا اينالعان وپەرانىڭ تەك ءبىزدىڭ عانا ەمەس, سونداي-اق وزگە دە قازاقستاندىق وپەرا تەاترلارىنىڭ افيشاسىنا ءسان بەرىپ, كوركىن قىزدىرىپ كەلە جاتقاندىعى قۋانتادى. بيىل اباي قۇنانباي ۇلىنىڭ 175 جىلدىق مەرەيتويىن اتاپ وتۋدەمىز. باس قالا كۇنىندە ءدال وسى سپەكتاكلدىڭ كورسەتىلۋى ايرىقشا ءماندى دەپ ويلايمىن. بارشا كورەرمەندەرىمىزگە, سونىڭ ىشىندە تەاترىمىزدىڭ ترانسلياتسيالارىن بەلسەندى تۇردە باقىلاپ وتىراتىن شەتەلدىك تىڭدارماندارىمىزعا بۇل سپەكتاكلدە وتە جوعارى دەڭگەيدە كورىنىس تاپقان قازاقستاننىڭ مادەنيەتى مەن ونەرىن ۇسىنۋعا قۋانىشتىمىز", - دەپ وي بولىسكەن ءارتىس ءسوزىن ءارى قاراي جالعادى: - اباي پارتياسى – قازاق وپەرالىق رەپەرتۋارداعى باريتونعا ارناپ جازىلعان ەڭ جارقىن ءارى كورنەكتىسى. قاراپايىم ەمەس وسىناۋ ءرولدى ورىنداعاندى قاتتى ۇناتامىن. بارشا قازاقستاندىقتار سياقتى, مەن ءۇشىن دە اباي – ۇلى ويشىل, اقىن, فيلوسوف. ادام بويىنداعى يگى دە اسىل دۇنيەنىڭ بارلىعى وسى قاھارماننىڭ مىنەزىنەن كورىنىس تاپقان دەپ ەسەپتەيمىن. پارتيانى ورىنداۋ وڭاي ەمەس, سەبەبى ورىنداۋشىعا ۇلكەن جاۋاپكەرشىلىك ارتىلعان – وسى بەينەنىڭ بارلىق تەرەڭدىگىن پاش ەتۋ جۇكتەلگەن. مۋزىكالىق جاعىنان وتە كۇردەلى. سەبەبى پارتيا ليريكالىق باريتون ءۇشىن ەمەس, وتە "مىقتى" باريتون داۋىسقا ارناپ جازىلعان. ونى ءمىنسىز ورىنداپ شىعۋ ءۇشىن, دراماتۋرگيا مۋزىكامەن ۇيلەسە شىعۋى ءتيىس. جاس كەلە كەمەلدىكتىڭ شەكسىز ەكەنىنە كوزىڭ جەتىپ, ساحناعا شىققان سايىن ەرەكشە رەڭكتەر تاباسىڭ, ءوزىڭ ءۇشىن تىڭ ءمان-ماعىنا كورىپ, ابايدىڭ ءماتىنىن باسقاشا وقىپ شىعاسىڭ", – دەدى سوليست تالعات مۇساباەۆ.
"استانا كۇنى – ءاردايىم وتباسىمىزبەن اتاپ وتەتىن كەرەمەت مەرەكە. مەن مۇندا 2007 جىلى ەلباسىنىڭ استانا مادەنيەتىن دامىتۋ ءۇشىن "شىعارماشىل جاستاردى تارتۋ" باعدارلاماسى بويىنشا قونىس اۋداردىم. شاقىرتۋ العانىما قۋاندىم, سەبەبى شىن جۇرەكتەن ۇلكەن ءىستىڭ – ەلوردادا اسقاق ونەردى دامىتۋدىڭ ءبىر بولىگى بولعىم كەلدى. بۇل قالامەن ەلىمىزدىڭ جاڭا ءداۋىرى تىكەلەي بايلانىستى. ءسوزسىز, بۇگىندە ول – مادەنيەت, ساياسات, ەكونوميكا ورتالىعى. نۇر-سۇلتان مەنىڭ تۋعان قالاما اينالدى, ءدال وسى جەردە بالالارىم دۇنيەگە كەلىپ, ءوسىپ-ءونىپ جاتىر. باس قالامىزدا ءوز-ءوزىڭدى دامىتۋعا بارلىق مۇمكىندىكتەر بار جانە ەڭ باستىسى, بۇل جەردە شىعارماشىلىققا ارنالعان كەڭىستىك بار. ءتۇرلى كونتسەرت زالدارى سالىنىپ, تەاترلار, اكادەميالار بوي كوتەرۋدە... قالا تۇرعىندارى مەن قوناقتارىن وسىناۋ تاماشا مەيراممەن قۇتتىقتايمىن. حالقىمىزعا تەك قانا باقىت, بيىك بەلەستەر, اسقاق ارماندارىڭىزدىڭ ورىندالۋىن, بەيبىتشىلىك پەن كەلىسىم تىلەيمىن. قالامىزدا بۇرىنعىداي وركەندەپ, بۇدان دا جاقسى ءارى كۇشتىرەك بولۋعا مۇمكىندىك بەرەتىن ۇيلەسىمدىلىك سالتانات قۇرا بەرسىن", - دەگەن ىزگى تىلەكپەن ءارتىس ءسوزىن اياقتادى.
