ءبىرجان نۇرىمبەتوۆ ءوز سوزىندە ەڭبەك جانە حالىقتى الەۋمەتتىك قورعاۋ مينيسترلىگى تسيفرلاندىرۋ دەڭگەيى بويىنشا جەتەكشى مەملەكەتتىك ورگانداردىڭ ءبىرى بولىپ تابىلاتىنىن اتاپ ءوتتى. تەك 2019 جىلدىڭ وزىندە عانا الەۋمەتتىك-ەڭبەك سالاسىنداعى كورسەتىلەتىن قىزمەتتەردى ەلەكتروندىق فورماتقا اۋىستىرۋ 2,2 ملرد تەڭگەنى ۇنەمدەۋگە مۇمكىندىك بەردى.
بۇگىنگى كۇنى ەڭبەكمينى بىرقاتار ماڭىزدى جوبالاردى جۇزەگە اسىرۋدا. ولاردىڭ ىشىندەگى ەڭ ماڭىزدىسى – قازاقستان حالقىنىڭ 100%-ى, ياعني 7 ملن وتباسى قامتىلعان "وتباسىنىڭ الەۋمەتتىك كارتاسى". وسى الەۋمەتتىك كارتا ءاربىر وتباسى قانداي ومىرلىك جاعدايدا ەكەنىن, كۇردەلى نەمەسە داعدارىس احۋالدان شىعارۋ بويىنشا جۇمىس الگوريتمىن كورسەتەدى.
"الەۋمەتتىك كارتالاردى قالىپتاستىرعاننان كەيىن كۇردەلى جانە داعدارىس جاعدايىندا بولعان 101 مىڭ وتباسى انىقتالدى. 12,7 مىڭ ادامدى جۇمىسقا ورنالاستىرۋ, 68,8 مىڭ ازاماتتى ەمحانالارعا تىركەۋ, 72,9 مىڭ بالانى بالاباقشالار مەن مەكتەپتەرگە تىركەۋ بويىنشا شارالار قابىلداندى. 1451 وتباسى كۇردەلى جانە داعدارىس جاعدايىنان شىعارىلدى", – دەدى ءبىرجان نۇرىمبەتوۆ.
تاعى ءبىر ماڭىزدى جوبا "قازاقستان ازاماتىنىڭ الەۋمەتتىك ID" جوباسى بولىپ تابىلادى. بۇل جوبا الەۋمەتتىك جاردەماقى الۋدىڭ اشىقتىعىن, ىڭعايلىلىعىن ارتتىرۋعا باعىتتالعان. الەۋمەتتىك ID بۇل اتاۋلى الەۋمەتتىك كومەك, قوعامدىق كولىكتە جەڭىلدىكپەن جول ءجۇرۋدى تولەۋدى, كوپبالالى جانە تابىسى از وتباسىلاردىڭ بالالارىنا مەكتەپتەردە تەگىن تاماقتانۋدى كوزدەيدى.
"بۇل جوبانىڭ پيلوتتىق نۇسقاسى رەسپۋبليكانىڭ 9 وڭىرىندە ىسكە اسىرىلدى. 102 مىڭ ID-كارتا بەرىلدى, 88 مىڭ ترانزاكتسيا جۇرگىزىلدى. بولاشاقتا ءبىز بۇل جوبانى بارلىق وڭىرلەردە تولىعىمەن قولدانۋدى جوسپارلاپ وتىرمىز", – دەدى ەڭبەكمينىنىڭ باسشىسى.
جۇمىسپەن قامتۋ جانە جۇمىسقا ورنالاستىرۋ سالاسىندا "ەلەكتروندىق ەڭبەك بيرجاسى" (بۇدان ءارى – ەەب) جانە "ەلەكتروندىق ەڭبەك شارتتارى" جوبالارى ىسكە اسىرىلۋدا.
بۇگىنگى تاڭدا ەەب – بۇل 214 مىڭ جۇمىس بەرۋشى, ميلليونداي جۇمىس ىزدەۋشى, Coursera ونلاين ءبىلىم بەرۋ پلاتفورماسى ارقىلى 1,5 مىڭ ساعاتقا جۋىق تەگىن ساباقتار.
"ەەب ارقاسىندا 1,2 ملن-نان استام ادام جۇمىس تابا الدى, ولاردىڭ ىشىندە 868 مىڭ ادام تۇراقتى جۇمىس ورىندارىنا, 341 مىڭى ۋاقىتشا جۇمىسقا ورنالاستىرىلدى", – دەپ اتاپ ءوتتى مينيستر.
"ەلەكتروندىق ەڭبەك شارتتارى" جوباسىنا 35 مىڭ ۇيىم قوسىلعان. ەندىگى 1,4 ملن ەلەكتروندىق شارت تىركەلدى, بۇنىڭ ءوزى جۇمىسكەرلەردىڭ ەڭبەك قۇقىقتارىن قورعاۋعا ىقپال ەتەتىن بولادى.
"2019 جىلدىڭ باسىندا مەملەكەتتىك قىزمەتتەردى اۆتوماتتاندىرۋ بولىگىندە ەلەكتروندىق قىزمەتتەردىڭ ۇلەسى 42%-دى قۇراپ ەدى, 2019 جىلدىڭ قورىتىندىسى بويىنشا ول 83%-عا ارتتى. بۇنداي وسىمگە ەgوv پورتالىنداعى 6 مەملەكەتتىك كورسەتىلەتىن قىزمەتتى ورنالاستىرۋ جانە 10 قىزمەتتى بەلسەندى فورماتقا اۋىستىرۋ ارقىلى قول جەتكىزىلدى. 2020 جىلدىڭ سوڭىنا دەيىن ءبىز ەلەكتروندىق قىزمەتتەردىڭ ۇلەسىن 100%-عا جەتكىزۋدى جوسپارلاپ وتىرمىز", – دەپ تۇيىندەدى ءوز ءسوزىن ءبىرجان نۇرىمبەتوۆ.
